“Огоҳлик− давр талаби” мавзусида йиғилиш ўтказилди

9 август куни Амударё туманининг Хитой овули ҳудудида жойлашган 85-сонли умумтаълим мактаби биносида 2-сектор раҳбари, туман прокурори Азиз Рўзметов, 3-сектор раҳбари, туман Ички ишлар бўлими бошлиғи Мухамметали Хожамуратов, Давлат хафвсизлик хизмати Амударё туман бўлими бошлиғи Санжар Назаров ҳамда 3-сектор ҳудудидаги 12 та овул ва маҳалла фуқаролар йиғини профилактика инспекторлари, фуқаролар йиғинлари раислари, ҳоким ёрдамчилари, хотин-қизлар фаоллари ва ёшлар етакчилари иштирокида йиғилиш бўлиб ўтди.

Йиғилишни Хитой овул фуқаролар йиғини раиси Давлатбай Атажанов очиб берди ва йиғилганларни кун тартибидаги масала билан таништириб ўтди.

Шундан сўнг, Давлат хафвсизлик хизмати Амударё туман бўлими бошлиғи Санжар Назаров ҳудуддаги овул ва маҳаллаларда жамоат тартибини сақлаш, ҳуқуқбузарликларнинг олдини олиш, ёшларнинг турли бузғинчи ва ёт ғоялардан асрашда маҳаллаларда фаолият олиб бораётган профилактика инспекторлари, ҳоким ёрдамчилари, хотин-қизлар фаоли, ёшлар етакчилари ҳамда уларнинг фаолиятини мувофиқлаштириб турувчи маҳалла раисларининг ўрни муҳим аҳамиятга эга эканлигини таъкидлади.

Шундан сўнг 3-сектор раҳбари − туман Ички ишлар бўлими бошлиғи Мухамметали Хожамуратов жорий йилнинг 1-2 июль кунлари Қорақалпоғистон Республикасининг Нукус шаҳрида бўлиб ўтган оммавий тартибсизликларнинг сабаби ва оқибатлари ҳақида гапириб, ёшларни тинчликнинг қадрига етиш, она Ватанга муҳаббат руҳида тарбиялаш, бузғунчиликка, тартибсизликка чорловчи ахборот ҳуружларидан ҳимоя қилиш зарурлигини, ижтимоий тармоқларда тарқалган барча ахборотлар ҳам ишончли бўлавермаслигини таъкидлади. Қолаверса, ёшларнинг маънавий дунёқараши бой бўлса, ёт ғояларга эргашмасликлари ва ҳеч қандай куч уларни тўғри йўлдан адаштира олмаслигини айтиб ўтди.

Шунингдек йиғилишда ёшларимиз эришаётган ютуқлар, хусусан, Ҳиндистоннинг Ченнай шаҳрида бўлиб ўтган 44-Бутунжаҳон шахмат олимпиадасида чемпионликни қўлга киритган жамоамиз аъзоларининг эришган ютуқлари ҳамда “Ёш китобхон оила” танловининг Республика босқичи ғолиблари бўлган Ўринбоевлар оиласини мисол келтириб, барча ёшларни кўпроқ китоб ўқиш, билим олиш, касб-ҳунар эгаллашга ҳамда бўш вақтини мазунли ўтказишга даъват қилди.

Шундан сўнг 2-сектор раҳбари, туман прокурори Азиз Рўзметов йиғилганларни ёшларга оид янгиликлар, қабул қилинаётган қарорлар ва фармонлар билан таништириб ўтди. Янги ўқув йилидан магистратурада ўқиётган қизларнинг контракт пуллари бюджетдан тўлаб берилиши, бакалаврда таълим олаётган қизларга 7 йилга фоизсиз кредитлар ажратилиши аёл-қизларга қаратилган катта эътибор ва имкониятнинг намунасидир.

 Қолаверса, Вазирлар маҳкамасининг 2022 йил 7 июндаги “Ёшлар муаммоларини ўрганиш ва ҳал этиш тизимини янада такомиллаштириш чора-тадбирлари тўғрисида”ги қарорига асосан, энди ёшлар 18 ёшдан эмас, 14 ёшга тўлгандан кейин “Ёшлар дафтари”га кириши мумкин.

Айтиш керакки, ёшлар учун яратилаётган бу каби имкониятлар уларнинг барча орзу-интилишларини руёбга чиқаришда муҳим омил бўлиб хизмат қилмоқда.

Йиғилиш якунида 3-сектор ҳудудида хизмат вазифасини бажараётган профилактика инспекторлари, маҳалла раислари, ёшлар етакчиларига ёшлар билан ишлашнинг ўзига хос йўналишлари бўйича тушунтиришлар берилиб, муҳим вазифалар белгилаб олинди.

Туман ҳокимлигининг Ахборот хизмати.