Маданият уйида “Инжиқнинг муҳаббати” асари асосида саҳналаштирилган спектакль намойиш этилди
Санъат ва маданият инсонни маънавий жиҳатдан бойитади, эзгулик сари етаклайди. Бунда, айниқса, театр санъатининг ўрни беқиёсдир. Тарбия ва маънавият ўчоғи бўлган театр ҳар бир инсонга, айниқса, болалар тарбиясида ҳаётий сабоқлар берувчи жонли восита ҳисобланади.
Театрдан маданий ҳордиқ чиқариш учунгина эмас, ундаги намойиш этиладиган спектаклларни томоша қилиб, инсон жамиятдаги воқеликларни, кечинмаларни теран англаши мумкин.
Дарвоқе, театр – халқ маънавиятини юксалтириш, ёшларни Ватанга муҳаббат, миллий ва умуминсоний қадриятларга ҳурмат руҳида тарбиялашда муҳим аҳамият касб этади. Шу билан бирга, ўсиб келаётган ёш авлодни маънавий тарбиялашда театрнинг ўрни катта ҳисобланади.
Бугунги кунда ёшларимизнинг театр санъатига бўлган эътибори ва қизиқишларини ошириш мақсадида бир қанча ишлар амалга оширилмоқда. Эртамиз эгалари бўлган ёшлар театр томошалари орқали дунёқарашини, тасаввур оламини бойитади. Чунки, улар театрда спектакль қаҳрамонларини саҳнада жонли томошо қилиш орқали ўзларига маънавий озуқа олишади. Саҳналштирилган асарларнинг асосий мақсади ҳам томошабинларнинг, айниқса келажак авлоднинг маънавиятини бойитишдир.
Яқинда Қорақалпоғистон Республикаси Прокуратураси ва Қорақалпоғистон Республикаси Ёшлар ишлари агентлиги ҳамкорлигида Амударё тумани маданият саройида маданий-маърифий тадбир ўтказилди.
Бердақ номидаги Қорақалпоқ давлат академик мусиқали театри ижодкорлари иштирокида ўтказилган тадбирда Кенгесбай Раҳманов қаламига мансуб комедия йўналишидаги “Инжиқнинг муҳаббати” асари асосида саҳналаштирилган спектакль намойиш этилди.
Спектакль Қорақалпоғистон Республикасида хизмат кўрсатган маданият ходимлари ва режиссёрлар томонидан жуда моҳирона саҳналаштирилган. “Инжиқнинг муҳаббати” комедиясида ташқи муҳитдан узилиб қолган шахс образи орқали шу давр муҳити ёрқин ифодаланган. Бу образ қишлоқда яшовчи ёшларнинг инжиқ, уятчан бўлиб улғайиши оқибатда ўз тақдирини шахсан ўзи ҳал қила олмайдиган шахслар бўлиб вояга етиши юмор усулида тасвирлаб берилади. Қишлоқда ўсиб улғайган қаҳрамоннинг монологи берилган саҳнада унинг характери тўлақонли очилади. Унинг психологиясида вужудга келган орзу-истаклар ва виждон ўртасидаги қарама-қаршиликлар ички конфликтни юзага келтиради. Ушбу қарама-қаршилик қуршовида қолган қаҳрамон икки инсон орасидаги ахлоқий муносабатларга умуминсоний ахлоқий меъёрлар асосида фикр юритади.
Спектакль томошабинлар томонидан жуда илиқ кутиб олинди ҳамда унда роль ижро этган актёрлар ижроси ҳам барчага бирдек манзур бўлди. Томошабинлар асар мазмунидан келиб чиқиб ўзларига тегишли хулоса чиқариб, маънавий озуқа олдилар, десак адашмаймиз.
Актёртлар жамоаси томонидан маҳорат билан ижро этилган спектакль инсонни ўйлашга, мушоҳада юритишга ундайдиган чуқур мазмунга эгалиги билан томошабинлар, айниқса келажак эгалари бўлмиш ёшларнинг маънавиятига ижобий таъсирини ўтказди. Эзгулик, дўстлик каби инсоний фазилатлар улуғланган бундай спектакллар томошабинларни яхшиликка ундаши шубҳасиз.
Спектакль маданият саройига ташриф буюрган ёшлар ҳамда уларнинг ота-оналарида катта таассуротлар қолдириб, қувонч ва маънавий озуқа улашди.
Севара ИСМОИЛОВА
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
