Маданият ва санъат ходимлари куни муносабати билан байрам дастурхони ёзилди

Ҳар бир миллатнинг руҳи, унинг асрий қадриятлари ва тарихи, энг аввало, маданияти ҳамда санъатида ўз аксини топади. Инсон маънавиятини юксалтириш, ёш авлод қалбида гўзалликка бўлган меҳрни уйғотишда маданият ўчоқларининг ўрни беқиёсдир. Давр билан ҳамнафас тарзда маданият ва санъатни янада ривожлантириш мақсадида Амударё тумани маданият бўлими томонидан ҳам кенг кўламли, таҳсинга сазовор ишлар амалга ошириб келинмоқда.

15 апрель – Маданият ва санъат ходимлари куни муносабати билан ана шундай ўз касбининг фидойилари учун Амударё тумани ҳокимлиги ташаббуси билан байрам дастурхони ёзилди. Тадбирда ҳоким ўринбосари Нодирбек Камолов иштирок этиб, туман ҳокими Собир Хўжаметовнинг соҳа ходимларига байрам табригини ўқиб эшиттирди ва эсдалик совғаларини топширди.

Айтиш керакки, Амударё туман маданият бўлими тасарруфида бугунги кунда жами 7 та маданият маркази аҳолига маданий хизмат кўрсатиб келмоқда. Бу масканларнинг биттаси туман маданият маркази мақомига эга бўлса, қолган олтитаси ҳудудий маданият марказлари сифатида фаолият юритади. Мазкур маданият даргоҳларида жами 96 нафар ишчи-ходим меҳнат қилмоқда. Ходимларнинг 19 нафари олий, 14 нафари эса тугалланмаган олий маълумотга эга.

Бўлим тасарруфидаги 34-сонли туман маданият маркази 250 ўриндиқли муҳташам концерт залига эга бўлиб, у ерда маданият ва санъат йўналишидаги иккита тўгарак мунтазам фаолият юритади. Бундан ташқари, ушбу марказда учта машҳур халқ жамоаси – ашула ва рақс йўналишидаги “Учқун” халқ ансамбли, қадимий анъаналаримизни тараннум этувчи “Офарин” фольклор-этнографик халқ ансамбли ҳамда “Жайхун мўъжизаси” анъанавий саҳна цирк халқ ҳаваскорлик жамоаси аҳолига юқори савияда маданий хизмат кўрсатиб келмоқда.

Ҳудудий марказларда ҳам жонли ижодий муҳит ҳукмрон. Жумладан, Бобур овули ҳудудида жойлашган 38-сонли, Бўз-ёп овулидаги 39-сонли, Уйшин маҳалласидаги 35-сонли, Чойкўл овулидаги 36-сонли, Қангли овулида жойлашган 37-сонли ва Қиличбой овулидаги 40-сонли маданият марказларда жами 19 та тўгараклар фаолият олиб бормоқда.

Ўз касбининг фидойилари бўлмиш маданият ва санъат ходимлари туманда умумхалқ байрамлари, муҳим саналар ва касб байрамлари муносабати билан ташкил қилинадиган тантаналар, ижодий учрашувлар, маданий кечалар ва концерт дастурларини юқори савияда ташкил қилиш орқали аҳолига сифатли маданий хизмат кўрсатиб келмоқдалар. Уларнинг бу меҳнатлари давлатимиз ва ҳукуматимиз томонидан ҳам муносиб рағбатлантириб келинмоқда. Соҳа ходимлари ва фахрийлар орасида Қорақалпоғистонда хизмат кўрсатган маданият ходими фахрий унвони, “Маданият ва санъат фидокори”, “Ватан фидойиси”, “Умид учқуни” каби кўкрак нишонилари соҳиб ва соҳибалари бор.

Маданият ва санъат соҳаси ривожи йўлида хизмат қилаётган бу инсонларнинг фидокорона меҳнати туман аҳолисининг маънавий оламини бойитишда, келажак авлодга гўзал қадриятларимизни безавол етказишда мустаҳкам пойдевор бўлиб хизмат қилмоқда ва келгусидаги юксак муваффақиятлар учун муҳим замин яратмоқда.

15 апрель – Маданият ва санъат ходимлари куни муносабати билан ташкил қилинган байрам тадбири уларнинг меҳнатларини муносиб эътироф этиш йўлидаги навбатдаги қадам бўлди. Фурсатдан фойдаланиб, биз ҳам қадрли маданият ва санъат ходимларига мустаҳкам соғлиқ, бахт-саодат, янги ижодий ютуқлар тилаб қоламиз.