Дўрманлик ёш китобхон оила Президент совғаси - Spark автомашинаси соҳиби бўлди

Республикамизнинг барча ҳудудларида бўлгани сингари Амударё туманида ҳам беш босқичли “Беш ташаббус олимпиадаси” юқори савияда ташкил этилди. Олимпиада доирасида санъат, маданият, спорт соҳаларида кўплаб танловлар ҳамда мусобақалар ўтказилди.

Жумладан, “Ёш китобхон оила” танлови туманимиздаги барча ёш оилаларни китоб билан ошно бўлишга, маънавий дунёсини янада бойитиш учун бадиий адабиётлар мутолаа қилишга чорлади.

Қувонарлиси, туманимизнинг Дўрман овулида истиқомат қилувчи, туман Халқ таълими бўлимига қарашли 20-сонли умумтаълим мактаби ўқитувчилари Умиджон Ўринбоев ҳамда Муҳаббат Давлатовалар танловнинг маҳалла, сектор, туман босчиқларида ғолибликни қўлга киритиб, ҳудудий ва Республика босқичларида ҳам барча иштирокчилардан кўпроқ китоб мутолаа қилганликларини амалда намойиш қилдилар. Юртдошларимиз танловнинг мамлакат миқёсидаги босқичида ҳам мутлоқ ғолибликни қўлга киритиб, “Ўзбекистоннинг ёш китобхон оиласи” дея эътироф этилди. Ғолиб оилага Президент совғаси – “Спарк’’ автомобили топширилди.

3 июнь куни Амударё туманида Ўринбоевлар оиласини тантанали равишда кутиб олиш маросими ташкил қилинди. Тадбирда туман ҳокими Султонбой Йўлдашев, ҳоким ўринбосари Маҳмуд Шерметов, Ёшлар ишлари агентлиги туман бўлими бошлиғи Сардор Исмаилов, овул фаоллари ва кенг жамоатчилик вакиллари иштирок этишди.

Туман ҳокими Султонбой Йўлдашев ёш оилани нуфузли танловнинг мамлакат миқиёсидаги босқичида ғолиб бўлиб, Президент совғаси – “Спарк’’ автомобилини қўлга киритгани билан самимий қутлади. Туман ҳокими ўз сўзида китобнинг инсон камолотидаги ўрни ҳақида сўзлаб, оилавий китобхонлик фарзандлар тарбиясида муҳим аҳамият касб этишини таъкидлаб ўтди. Туман ҳокими Ўзбекистоннинг энг китобхон ёш оиласи туманимиздаги барча оилаларга намуна бўлишини таъкидлаб, танлов ғолибларига телевизор совға қилди.

Ўз навбатида Ўринбоевлар оиласи вакиллари ҳам туман ҳокимлиги ва Ёшлар ишлари агентлигига кўрсатилаётган эътибор учун миннатдорчилик билдиришди.

Дарҳақиқат, танловда Республикамизнинг барча вилоятларидан ҳамда Тошкент шаҳридан саралаб олинган оилалар орасида мутлоқ ғолибликни қўлга киритган амударёлик ёш оила эришган ютуқлар барчани бирдек қувонтиради.

Айтиш керакки, бугунги кунда юртимизда ёшларнинг бўш вақтини мазмунли ташкил этиш, уларни китобхонликка қизиқтириш, миллий халқ ўйинлари ва спорт турларини ёшлар орасида оммалаштириш, ёшлар фестиваллари ва бошқа маданий-маърифий тадбирларни амалга оширишда Президентимиз томонидан илгари сурилган “Беш муҳим ташаббус” алоҳида аҳамиятга эга.

“Беш муҳим ташаббус” доирасидаги тадбирларни янада жадаллаштириш ҳамда қамров даражасини кенгайтириш мақсадида ўтказилаётган олимпиадалар, кўрик-танловлар ёшларнинг маънавий ва маърифий дунёсини бойитишда муҳим восита бўлиб хизмат қилмоқда.

Туман ҳокимлигининг Ахборот хизмати