Doʻrmanlik yosh kitobxon oila Prezident sovgʻasi - Spark avtomashinasi sohibi boʻldi

Respublikamizning barcha hududlarida boʻlgani singari Amudaryo tumanida ham besh bosqichli “Besh tashabbus olimpiadasi” yuqori saviyada tashkil etildi. Olimpiada doirasida sanʼat, madaniyat, sport sohalarida koʻplab tanlovlar hamda musobaqalar oʻtkazildi.

Jumladan, “Yosh kitobxon oila” tanlovi tumanimizdagi barcha yosh oilalarni kitob bilan oshno boʻlishga, maʼnaviy dunyosini yanada boyitish uchun badiiy adabiyotlar mutolaa qilishga chorladi.

Quvonarlisi, tumanimizning Doʻrman ovulida istiqomat qiluvchi, tuman Xalq taʼlimi boʻlimiga qarashli 20-sonli umumtaʼlim maktabi oʻqituvchilari Umidjon Oʻrinboyev hamda Muhabbat Davlatovalar tanlovning mahalla, sektor, tuman boschiqlarida gʻoliblikni qoʻlga kiritib, hududiy va Respublika bosqichlarida ham barcha ishtirokchilardan koʻproq kitob mutolaa qilganliklarini amalda namoyish qildilar. Yurtdoshlarimiz tanlovning mamlakat miqyosidagi bosqichida ham mutloq gʻoliblikni qoʻlga kiritib, “Oʻzbekistonning yosh kitobxon oilasi” deya eʼtirof etildi. Gʻolib oilaga Prezident sovgʻasi – “Spark’’ avtomobili topshirildi.

3-iyun kuni Amudaryo tumanida Oʻrinboyevlar oilasini tantanali ravishda kutib olish marosimi tashkil qilindi. Tadbirda tuman hokimi Sultonboy Yoʻldashev, hokim oʻrinbosari Mahmud Shermetov, Yoshlar ishlari agentligi tuman boʻlimi boshligʻi Sardor Ismailov, ovul faollari va keng jamoatchilik vakillari ishtirok etishdi.

Tuman hokimi Sultonboy Yoʻldashev yosh oilani nufuzli tanlovning mamlakat miqiyosidagi bosqichida gʻolib boʻlib, Prezident sovgʻasi – “Spark’’ avtomobilini qoʻlga kiritgani bilan samimiy qutladi. Tuman hokimi oʻz soʻzida kitobning inson kamolotidagi oʻrni haqida soʻzlab, oilaviy kitobxonlik farzandlar tarbiyasida muhim ahamiyat kasb etishini taʼkidlab oʻtdi. Tuman hokimi Oʻzbekistonning eng kitobxon yosh oilasi tumanimizdagi barcha oilalarga namuna boʻlishini taʼkidlab, tanlov gʻoliblariga televizor sovgʻa qildi.

Oʻz navbatida Oʻrinboyevlar oilasi vakillari ham tuman hokimligi va Yoshlar ishlari agentligiga koʻrsatilayotgan eʼtibor uchun minnatdorchilik bildirishdi.

Darhaqiqat, tanlovda Respublikamizning barcha viloyatlaridan hamda Toshkent shahridan saralab olingan oilalar orasida mutloq gʻoliblikni qoʻlga kiritgan amudaryolik yosh oila erishgan yutuqlar barchani birdek quvontiradi.

Aytish kerakki, bugungi kunda yurtimizda yoshlarning boʻsh vaqtini mazmunli tashkil etish, ularni kitobxonlikka qiziqtirish, milliy xalq oʻyinlari va sport turlarini yoshlar orasida ommalashtirish, yoshlar festivallari va boshqa madaniy-maʼrifiy tadbirlarni amalga oshirishda Prezidentimiz tomonidan ilgari surilgan “Besh muhim tashabbus” alohida ahamiyatga ega.

“Besh muhim tashabbus” doirasidagi tadbirlarni yanada jadallashtirish hamda qamrov darajasini kengaytirish maqsadida oʻtkazilayotgan olimpiadalar, koʻrik-tanlovlar yoshlarning maʼnaviy va maʼrifiy dunyosini boyitishda muhim vosita boʻlib xizmat qilmoqda.

Tuman hokimligining Axborot xizmati