ХОЛИМБЕГ ОВУЛИДА АҲОЛИГА САЙЁР ТАРТИБДА ТИББИЙ ХИЗМАТ КЎРСАТИЛДИ

Саломатлик− туман бойлик. Дарҳақиқат, тана соғлом, руҳ тетик бўлса, ҳар қандай юмушни уддалаш ва муваффақиятли амалга ошириш мумкин.

Олимларнинг аниқлашича, аҳоли саломатлигини мустаҳкамлашнинг 10 фоизи тиббиёт ходимларига боғлиқ бўлса, қолган 90 фоизига профилактика орқали эришилади.

 Ўзбекистон Республикаси Президенти Шавкат Мирзиёев раҳбарлигида 2022 йил 25 январь куни кенгайтирилган тарзда “Маҳаллабай ишлаш ва камбағалликни қисқартириш ҳамда аҳоли бандлигини таъминлаш бўйича 2022 йилда амалга ошириладиган устувор вазифалар тўғрисида”ги видеоселектор йиғилишида берилган топшириқлар ижросини таъминлаш мақсадида Амударё туманида аҳолига малакали ихтисослаштирилган тиббий хизмат кўрсатишни яхшилаш мақсадида чекка ҳудудларда сайёр қабуллар ўтказиш бўйича чора-тадбирлар режаси ишлаб чиқилган. Шунга кўра ҳудудларда сайёр қабуллар ўтказилиб, аҳолига сайёр тартибда тиббий хизмат кўрсатилмоқда.

Шу йил 22 июнь куни режага мувофиқ туманимизнинг чекка ҳудудларидан бири бўлган Холимбег овули ҳудудидаги 17-сонли умумтаълим мактаби биносида сектор раҳбарининг сайёр қабули ва овул аҳолиси учун бепул тиббий кўрик ташкил қилинди.

 Тиббий кўрик давомида туманнинг малакали шифокорлари аҳолини қабул қилиб, тиббий кўрикдан ўтказдилар.

Аҳолига невропатолог, офтальмолог, гинеколог, эндокринолог ва бошқа мутахассис шифокорлар томонидан тиббий хизматлар кўрсатилиб, УЗИ ва рентген текширувларидан ўтказилди.

Кун давомида жами 441нафар фуқаролар тиббий кўрикдан ўтказилиб, ташхислар қўйилди. Шундан,181 нафар фуқарода касалликлар аниқланиб, 40 нафарига стационар шароитда даволанишга йўлланма берилди. Шунингдек, 10 нафар фуқарога вилоят даволаш-профилактика марказига йўлланма берилди.

Шунингдек, қабул давомида туман прокурори Азизбек Рўзметов “Давлат хавфсизлик хизмати кубоги” учун бўлиб ўтаётган футбол мусобақасида туманимиз шарафини муносиб ҳимоя қилиб, ярим финал босқичига йўлланмани қўлга киритган “Холимбег ёшлари” жамоаси билан суҳбатлашиб, уларга ярим финал ўйинларида ҳам омад тилади ва совғалар билан тақдирлади.

Холимбег овули фуқаролари чекка ҳудудлар аҳолисининг саломатлигини муҳофаза қилишга яқиндан ёрдам бериш мақсадида шу ернинг ўзида тиббий кўрик ташкил этилгани, ўзларига қаратилган бундай эътибор ва ғамхўрликдан ниҳоятда мамнун бўлдилар.

 Бу каби сайёр қабул ва тиббий кўриклар аҳолига катта қулайлик яратиш билан бирга, шифокорларнинг ўзаро тажриба алмашишлари, даволашдаги илғор иш услубларини ўрганишларига, касбий билим ва малакаларини оширишга ҳам хизмат қилади.

Сайёр қабул давомида қабулга келиш имконига эга бўлмаган 3 нафар фуқароларнинг уйларига ташриф буюрилиб, улар ҳам тиббий кўрикдан ўтказилди.

Сайёр қабул кейинчалик ҳам давом эттирилиб, 2-сектор ҳудудидаги барча овул ва маҳалла фуқаролар йиғинларида ўтказилиши кутилмоқда.

Туман ҳокимлигининг Ахборот хизмати.