“Бир нуроний – ўн ёшга масъул” кўрик танлови бўлиб ўтди

Мамлакатимизда кекса авлод вакилларини давлат томонидан қўллаб-қувватлаш, уларнинг ижтимоий фаоллигини ошириш борасида қатор чора-тадбирлар амалга оширилмоқда.

Катта ҳаётий тажрибага эга отахон ва онахонларимиз “Бир нуроний – ўн нафар ёшга масъул” тамойили асосида ўзи истиқомат қилаётган маҳаллада иш юритиб, тарбияси оғир, маънавий кўмакка муҳтож, уюшмаган, ишсиз ёшларга бириктирилиб, уларнинг муаммоларини бевосита ҳал этишга ёрдам бериб келмоқда. Шу орқали нуронийларимиз ёшларни Ватанга садоқат, миллий қадриятларга ҳурмат, мамлакатда оширилаётган ислоҳотларга дахлдорлик, диний бағрикенглик ва миллатлараро тотувлик руҳида тарбияланишига ва жамиятда ўз ўрнини топишига ҳисса қўшмоқда.

Ана шундай фидойи нуронийлар иштирокида мамлакатимиз бўйлаб “Бир нуроний ­­– ўн ёшга масъул” шиори остида кўрик-танловлар ўтказилмоқда. Жорий йил 18 июнь куни Амударё тумани Маданият маркази биносида мазкур кўрик-танловнинг туман босқичи бўлиб ўтди.

Танловнинг асосий мақсади ҳар бир маҳаллаларда “Бир нуроний – ўн ёшга масъул” лойиҳаси асосида ёшларга бириктирилган нуронийларни жамият ҳаётига фаол жалб қилиш, уларнинг ижтимоий фаоллигини ошириш, ёшларимиз тарбиясида кекса авлод вакиллларининг тажрибасидан фойдаланиш, жиноятчилик ва ҳуқуқбузарликларни олдини олиш, ажрим ёқасида турган ёш оилалар ўртасида барқарор муҳитни вужудга келтириш борасида амалга оширилаётган ишларни тарғиб қилиш ва ижросини таъминлашда фаол иштирок этаётган ижтимоий фаол нуронийларни рағбатлантириш ҳисобланади.

Танловнинг туман босқичи Маҳалла ва нуронийларни қўллаб-қувватлаш бўлими, Қорақалпоғистон Республикаси “Нуроний” жамғармаси, туман Маънавият ва маърифат бўлинмаси, Ёшлар ишлари агентлиги ҳамкорлигида ўтказилди.

Танловда иштирокчилар 3 та шарт, яъни таништирув, “Ёшлар – бизнинг келажагимиз” мавзусида иштирокчилар амалга оширган ишлар юзасидан ҳайъат аъзоларига ёзма маълумот ва фотоалбом шаклида тақдимот қилиш ҳамда ўзига бириктирилган уюшмаган, тарбияси оғир, маънавий кўмакка муҳтож бўлган ёшлар билан амалга оширган ишлари ва эришган натижаларини, шунингдек, ёшларнинг муаммоларига ечим топгани ва ажрим ёқасида турган оилаларни яраштиргани бўйича факт ва мисоллар тақдимоти орқали ўзаро беллашдилар.

Танловнинг якуний натижаларига кўра энг юқори бал тўплаган Бобур номли овулнинг фаоли Муротбой Собуров фахрли 1-ўринни қўлга киритди ва ташкилий қўмита томонидан 3 миллион сўм пул мукофоти билан тақдирланди.

Шунингдек, 2-ўринни қиличбойлик иштирокчи Амина Юсупова қўлга киритиб, 2 миллион сўм билан, 3-ўринни қўлга киритган Беруний номли маҳалла фаоли Шукуржон Хўжамуратова эса 1 миллин сўм пул мукофоти билан тақдирланди.

Бундан ташқари, 3 нафар иштирокчилар, жумладан, Бўз солма маҳалласидан ташриф буюрган иштирокчи Саломат Мадаминова, Намуна маҳалласи фаоли Фарҳод Авезов ва Дурунки маҳалласидан келган фаол нуроний Давлатбой Ўразовларнинг ҳар бири фаол иштирки учун ташкилий-қўмита томонидан 500 минг сўм пул мукофоти билан тақдирланди.

Қорақалпоғистон Республикаси Маҳалла ва нуронийларни қўллаб-қувватлаш вазири маслаҳатчиси, Қорақалпоғистон Республикаси “Нуроний” жамғармаси раиси ва танловнинг ташкилий-қўмитаси раиси Турсунбой Абдижаббаров ғолиблар ва совриндорларни табриклаб, Қорақалпоғистон Республикаси босқичига йўлланмани қўлга киритган Бобур номли овулнинг фаол нуронийси Муротбой Сабуровга омад тилади ва барча иштирокчиларга ўз миннатдорлигини билдириб ўтди.

Танлов якунида тадбир иштикорчилари ва томашабинларига “Тўлқинжон” кафесида ош берилди.

Севара ИСМОИЛОВА, ҚДУ талабаси