ЎРИМ-ЙИҒИМ МАВСУМИДАГИ ЁНҒИН ХАВФСИЗЛИГИ ҚОИДАЛАРИ

Тумандаги фермер хўжаликлари тасарруфида жами 3800 гектар ғалла майдони мавжуд. Айни кунларда ғалла ўрим-йиғимига қизғин тайёргарлик ишлари авж олган. Фавқулодда салбий ҳодисаларнинг олдини олиш мақсадида ўтказилган назорат ишлари давомида ғалла ўрим-йиғим мавсумига 18 та отряд ташкил қилиниб, 18 та ўрим комбайни жалб этилган маълум бўлди. Лекин ҳозирги кунда уларнинг биронтаси ёнғин ўчириш воситалари билан тўлиқ таъминланмагани, хавфсизлик қоидаларига тўла жавоб бермаслиги аниқланди.

Бундан ташқари,  “Қипчоқ дон” қабул қилиш масканининг бугунги кундаги фавқулодда ва ёнғин хавфсизлиги ҳолати ўрганиб чиқилганда, қатор камчиликлар кузатилди. Масканда 4 дона бирламчи ёнғин ўчириш қалқонлари ўрнатилган. Уларда 2 донадан ОП-5 маркали ёнғин ўчириш воситаси бўлиши лозимлиги, аммо ҳозирда 1 донадан ўрнатилгани, у ҳам носоз ҳолатдалиги, масканда 1 дона 60 тонна ёнғинга қарши ёпиқ сув сиғими мавжудлиги, сув тортиш насоси ва сув узатиш шланглари билан таъминланмагани маълум бўлди. Шунингдек, маскандаги ғалла сақланадиган ёпиқ омборларнинг том ва ёғоч буюмларига ёнғинни пасайтирувчи кимёвий қоришма билан ишлов берилмагани, барча электр симлар ва ускуналарнинг электр кабеллари ташқи ҳимоя қобиқлари чидамлилик даражаси мутахассислар томонидан лаборатория синовидан ўтказилиб, далолатнома тузилмагани, маскан ҳудуди ёнғиннинг олдини олишга доир эслатма ва плакатлар билан жиҳозланмагани аниқланди. 

Ўрим-йиғим мавсуми давомида ғаллазорларда ёнғин хавфсизлигини таъминлаш учун белгиланган қоидаларга амал қилиш, учқун тушиш туфайли содир бўладиган ёнғинларнинг олдини олиш керак. Автомобиль, темир йўллари ва электр узатиш  линиялари яқинидаги далаларнинг ўтлари 8 метр кенгликда ўриб олиниши ва 4 метр кенгликда шудгор қилиниши шарт.

Азиз юртдошлар, ғалла ўрим-йиғими мавсумида ёнғин хавфсизлиги қоидаларига амал қилиб, оғир оқибатлар келиб чиқишининг олди олинишига ҳисса қўшайлик!

А.Юсупов, туман ФВБ ЁН ва ПБ инспектори.