Маҳалладаги хотин-қизлар фаолиятини самарали ташкил этишга бағишланган ўқув-семинар бўлиб ўтди

Ўзбекистон Республикаси Президентининг 2022 йил 1 мартдаги “Оила ва хотин-қизлар билан ишлаш, маҳалла ва нуронийларни қўллаб-қувватлаш тизимини такомиллаштириш чора-тадбирлари тўғрисида”ги фармонига асосан республикамизнинг ҳар бир шаҳар ва қишлоқларида шунингдек, улардаги ҳар бир овул ва маҳаллаларда Хотин-қизлар фаоли лавозими жорий этилган эди.

Республикамизнинг барча ҳудудларида бўлгани сингари Амударё туманидаги 49 та овул ва маҳалла фуқаролар йиғинларига ҳам хотин-қизлар фаоллари тайинланди.

Хотин-қизлар фаоллари хотин-қизларни оила, маҳалла ва меҳнат жамоаларида ижтимоий-ҳуқуқий жиҳатдан қўллаб-қувватлаш, уларнинг ижтимоий-сиёсий фаоллигини ошириш, маънавиятини юксалтириш, ёшларни оилавий ҳаётга тайёрлаш, замонавий намунали оилани шакллантириш, унинг маънавий-ахлоқий муҳитини ва анъанавий оилавий қадриятларни мустаҳкамлаш бўйича мақсадли чора-тадбирларни амалга оширади.

Амударё туманида хотин-қизлар фаоллари фаолиятини самарали ташкил этиш мақсадида ўқув семинарлари ўтказилиб келинмоқда. Жумладан, маҳалладаги хотин-қизлар фаоллари учун эҳтиёжманд оиланинг ижтимоий ҳимояси ва маҳаллада ижтимоий хизматларни юритиш ишларини ташкил қилиш мақсадида 23 майдан 27 майга қадар 5 кунлик ўқув-семинар ўтказилмоқда.

 24 май куни Аниқ фанларга ихтисослаштирилган иқтидорли болалар мактабида бошланган ўқув семинарининг иккинчи кунида туман ҳокимининг ўринбосари, Оила ва хотин-қизлар бўлими бошлиғи Гўзал Сабурова юқоридаги масалалар бўйича хотин-қизлар фаолларига тушунтиришлар берди.

Семинарда туманда фаолият юритаётган корхона ва ташкилот мутасаддилари иштирок этиб, хотин-қизлар фаолларига иш фаолиятлари давомида зарур бўладиган барча назарий ва амалий билимларини беришди.

Маълумот ўрнида айтиш керакки, эндигина иш фаолиятини бошлаган хотин-қизлар фаоллари ўзларининг бор билим ва тажрибалари билан ҳаракат қилиб, маҳалладошлари эътирофига сазовор бўлишмоқда.

Жумладан, 2-сектор ҳудудидаги хотин-қизлар фаоллари томонидан 11 минг 854 хонадонда истиқомат қилувчи 33 минг 498 нафар хотин-қизларни хатловдан ўтказиш тўлиқ якунланди. Ундан ташқари, 29 минг 995 нафар хотин-қизлар ҳақидаги маълумотлар махсус дастурга киритилди.

2-сектор раҳбарияти ҳуддаги хотин-қизлар фаоллари билан сaмарали тарзда ҳамкорлик олиб бормоқда. Шунингдек ўз иш фаолиятини намунали тарзда ташкил қилган фаоллар сектор раҳбарияти томонидан муносиб равишда тақдирланмоқда.

Туман прокурори, 2-сектор раҳбари Азиз Рўзметов 24 май куни сектор ҳудудидаги маҳаллаларнинг хотин-қизлар фаоллари билан учрашиб, хатлов тадбирларида фаол иштирок этган Хизр эли, Бўзсолма, Қиличбой ва бошқада овул ҳамда маҳалла фуқаролар йиғинларининг хотин-қизлар фаолларига ташаккурнома эълон қилиб, биринчилар қаторида бўлган 3 нафар хотин-қизлар фаолларига қимматбахо совғалар топширди ва уларнинг келгусидаги иш фаолиятига омадлар тилади.

Ишонамизки, маҳаллалардаги хотин-қизлар фаоллари хотин-қизларнинг таълим ва касбий кўникмалар олишлари, муносиб иш топишларига кўмаклашиш, тадбиркорлигини қўллаб-қувватлаш, иқтидорли ёш хотин-қизларни аниқлаш ва уларнинг қобилиятларини тўғри йўналтириш, гендер тенгликни таъминлаш, хотин-қизларнинг ижтимоий-сиёсий фаоллигини ошириш ишларига муносиб ҳисса қўшадилар.

Туман ҳокимлигининг Ахборот хизмати.