КЎЗИ ОЖИЗЛАР ЖАМИЯТИ ТАШКИЛ ТОПГАНИГА 90 ЙИЛ ТЎЛДИ

Амударё туманида Ўзбекистон кўзи ожизлар жамияти ташкил топганининг 90 йиллиги муносабати билан тадбир ўтказилди.

Манғит шаҳридаги “Ўзбегим” ресторанида ўтказилган ушбу тадбирда туман ҳокими Султонбой Йўлдошев, Қорақалпоғистон Республикаси кўзи ожизлар жамияти ҳамда Амударё тумани кўзи ожизлар жамияти масъуллари, аъзолари иштирок этишди. Тадбирда туман ҳокими ва бошқалар сўзга чиқиб, 90 йиллик юбилей билан жамиятнинг барча аъзоларини табриклади.

Таъкидланганидек, Ўзбекистон кўзи ожизлар жамияти ташкил топганига бу йил 90 йил тўлади. Кўзи ожиз ногиронларни фойдали меҳнатга жалб этиш, уларнинг билимларини ошириб, ўрта ва олий маълумотга эга бўлишларига кўмаклашиш мақсадида ташкил қилинган ушбу жамиятнинг устави 1932 йилда қабул қилинган эди. Қорақалпоғистон Республикаси кўзи ожизлар жамиятига қарашли Амударё тумани кўзи ожизлар жамияти эса 1937 йилда ҳудуддаги саводсизликни тугатиш ва кўзи ожизларни ҳар томонлама қўллаб-қувватлаш мақсадида ташкил этилган.

Ўша даврларда туманда кўзи ожиз ногиронлар сони 20-22 нафардан иборат бўлган. Кўзи ожиз ногиронлар чит, пайпоқ тўқиш ва бошқа ҳунармандлик ишларига ҳам жалб қилинган. 1960 йилларга келиб ушбу жамият бошлиғи Йўлдош Матмуродов ҳамда Қорақалпоғистонда хизмат кўрсатган артист Назир Раҳимовнинг саъй-ҳаракатлари натижасида ўз биносига эга бўлган.

1963 йилнинг биринчи мартида шу бинода Ўзбекистон кўзи ожизлар жамиятининг Хўжайли ўқув ишлаб чиқариш корхонасига қарашли Манғит шохобчаси иш бошлаган. Бунда дастлаб бозор учун хўжалик сеткаси ва қамишдан чит тўқиш ишлари давом эттирилган.

Шундан сўнг, 1972 йилнинг август ойида Кўзи ожизлар махсус кутубхонаси ташкил қилинган. Санамжон Мадраҳимова унга кутубхоначи қилиб тайинланган. Ҳозирги кунда ушбу кутубхона бадиий ва илмий китоблар билан таминланиб, китобсеварларга хизмат кўрсатиб келинмоқда. Бундай шарт-шароитлар кўзи ожиз ногиронларнинг билим олишида, ҳунар эгаллашида яқиндан ёрдам бериб, муҳим аҳамият касб этмоқда.

Тадбир давомида жамиятнинг туман бўлими масъуллари томонидан сўнгги йилларда амалга оширилган ишлар хусусида сўз юритилди. Шунингдек, масъуллар юртимиздаги кўзи ожиз ногиронлар жамиятда ўз ўрнини топиши учун уларга бўлган эътибор ошиб бораётгани хусусида алоҳида тўхталиб, уларнинг кундалик ҳаётини мазмунли ўтказиш мақсадида турли хилдаги тадбирлар ўтказилаётганини, бу саъй-ҳаракатлар инсон қадрини улуғлаш, юртдошларимизда инсонийлик туйғуларини мустаҳкамлаш мақсадида амалга оширилаётганини мамнуният билан айтиб ўтдилар.

Туманда ҳам кўзи ожиз ногиронларга бўлган эътиборни янада кучайтириш мақсадида ҳар йили тадбирлар ўтказилиб келинаётгани, тадбирларда ҳар томонлама фаол қатнашган кўзи ожиз ногиронлар фахрий ёрлиқлар билан тақдирланиб келинаётгани, бу ногиронлиги бор инсонларда ўзларига бўлган ишонч, касб-ҳунар ўрганишга интилишлари ортишида туртки бўлаётгани таъкидланди.

Шу йил кўзи ожизлар жамиятининг 90 йиллиги муносабати билан туманимиздаги 16-сонли мактабда шахмат-шашка бўйича ўтказилган мусобақада жамият аъзоси Ибрагим Султонов фахрли биринчи ўринни олгани, у 1983 йилдан бошлаб, то шу кунгача Республика миқёсидаги мусобақаларда қатнашиб, туманимиз спорт шарафини ҳимоя қилиб келаётгани ва бошқа қатор ютуқлар эътироф этилди.

Тадбирда жамият аъзоларига масъуллар томонидан совғалар берилди ва туман Маданият бўлими томонидан мусиқий дастур намойиш этилиб, барчага хуш кайфият улашилди.

Озода Худойберганова.