KOʻZI OJIZLAR JAMIYaTI TAShKIL TOPGANIGA 90-YIL TOʻLDI

Amudaryo tumanida Oʻzbekiston koʻzi ojizlar jamiyati tashkil topganining 90 yilligi munosabati bilan tadbir oʻtkazildi.

Mangʻit shahridagi “Oʻzbegim” restoranida oʻtkazilgan ushbu tadbirda tuman hokimi Sultonboy Yoʻldoshev, Qoraqalpogʻiston Respublikasi koʻzi ojizlar jamiyati hamda Amudaryo tumani koʻzi ojizlar jamiyati masʼullari, aʼzolari ishtirok etishdi. Tadbirda tuman hokimi va boshqalar soʻzga chiqib, 90 yillik yubiley bilan jamiyatning barcha aʼzolarini tabrikladi.

Taʼkidlanganidek, Oʻzbekiston koʻzi ojizlar jamiyati tashkil topganiga bu yil 90-yil toʻladi. Koʻzi ojiz nogironlarni foydali mehnatga jalb etish, ularning bilimlarini oshirib, oʻrta va oliy maʼlumotga ega boʻlishlariga koʻmaklashish maqsadida tashkil qilingan ushbu jamiyatning ustavi 1932-yilda qabul qilingan edi. Qoraqalpogʻiston Respublikasi koʻzi ojizlar jamiyatiga qarashli Amudaryo tumani koʻzi ojizlar jamiyati esa 1937-yilda hududdagi savodsizlikni tugatish va koʻzi ojizlarni har tomonlama qoʻllab-quvvatlash maqsadida tashkil etilgan.

Oʻsha davrlarda tumanda koʻzi ojiz nogironlar soni 20-22 nafardan iborat boʻlgan. Koʻzi ojiz nogironlar chit, paypoq toʻqish va boshqa hunarmandlik ishlariga ham jalb qilingan. 1960-yillarga kelib ushbu jamiyat boshligʻi Yoʻldosh Matmurodov hamda Qoraqalpogʻistonda xizmat koʻrsatgan artist Nazir Rahimovning saʼy-harakatlari natijasida oʻz binosiga ega boʻlgan.

1963-yilning birinchi martida shu binoda Oʻzbekiston koʻzi ojizlar jamiyatining Xoʻjayli oʻquv ishlab chiqarish korxonasiga qarashli Mangʻit shoxobchasi ish boshlagan. Bunda dastlab bozor uchun xoʻjalik setkasi va qamishdan chit toʻqish ishlari davom ettirilgan.

Shundan soʻng, 1972-yilning avgust oyida Koʻzi ojizlar maxsus kutubxonasi tashkil qilingan. Sanamjon Madrahimova unga kutubxonachi qilib tayinlangan. Hozirgi kunda ushbu kutubxona badiiy va ilmiy kitoblar bilan taminlanib, kitobsevarlarga xizmat koʻrsatib kelinmoqda. Bunday shart-sharoitlar koʻzi ojiz nogironlarning bilim olishida, hunar egallashida yaqindan yordam berib, muhim ahamiyat kasb etmoqda.

Tadbir davomida jamiyatning tuman boʻlimi masʼullari tomonidan soʻnggi yillarda amalga oshirilgan ishlar xususida soʻz yuritildi. Shuningdek, masʼullar yurtimizdagi koʻzi ojiz nogironlar jamiyatda oʻz oʻrnini topishi uchun ularga boʻlgan eʼtibor oshib borayotgani xususida alohida toʻxtalib, ularning kundalik hayotini mazmunli oʻtkazish maqsadida turli xildagi tadbirlar oʻtkazilayotganini, bu saʼy-harakatlar inson qadrini ulugʻlash, yurtdoshlarimizda insoniylik tuygʻularini mustahkamlash maqsadida amalga oshirilayotganini mamnuniyat bilan aytib oʻtdilar.

Tumanda ham koʻzi ojiz nogironlarga boʻlgan eʼtiborni yanada kuchaytirish maqsadida har yili tadbirlar oʻtkazilib kelinayotgani, tadbirlarda har tomonlama faol qatnashgan koʻzi ojiz nogironlar faxriy yorliqlar bilan taqdirlanib kelinayotgani, bu nogironligi bor insonlarda oʻzlariga boʻlgan ishonch, kasb-hunar oʻrganishga intilishlari ortishida turtki boʻlayotgani taʼkidlandi.

Shu yil koʻzi ojizlar jamiyatining 90 yilligi munosabati bilan tumanimizdagi 16-sonli maktabda shaxmat-shashka boʻyicha oʻtkazilgan musobaqada jamiyat aʼzosi Ibragim Sultonov faxrli birinchi oʻrinni olgani, u 1983-yildan boshlab, to shu kungacha Respublika miqyosidagi musobaqalarda qatnashib, tumanimiz sport sharafini himoya qilib kelayotgani va boshqa qator yutuqlar eʼtirof etildi.

Tadbirda jamiyat aʼzolariga masʼullar tomonidan sovgʻalar berildi va tuman Madaniyat boʻlimi tomonidan musiqiy dastur namoyish etilib, barchaga xush kayfiyat ulashildi.

Ozoda Xudoyberganova.