Қипчоқ овулидаги 18-сонли мактабда “Тараққиёт кўзгуси” газетаси таҳририяти ижодкорлари билан учрашув ўтказилди

Ёшларда Ватанга садоқат, тадбиркорлик, иродалик мафкуравий иммунитет, меҳр-оқибат, бағрикенглик, меҳнатсеварлик каби фазилатларни қарор топтириш кенг кўламда ҳамжиҳатликда амалга ошириладиган долзарб вазифадир. Бунда аҳолининг фарзанд тарбияси бўйича билимларини ошириш, фуқароларни узлуксиз маънавий тарбиянинг жаҳон тажрибасида синовдан ўтган усуллари ва амалга ошириш йўл-йўриқлари билан таништириб боришга ҳам эътибор қаратиш муҳим. Боиси, фарзанд илк тарбияни ўзи дунёга келган оиласида, кейинчалик мактабда ва кенг жамоатчиликдан олади. Шу тариқа у ҳам жисман, ҳам ақлан улғая боради.

Ёшларни бузғунчи ғоялардан асрашга ҳисса қўшиш, уларнинг мард, оқил, замонавий билимлар билан қуролланган етук инсонлар бўлиб етишишига ҳисса қўшиш – оммавий ахборот воситаларининг ҳам вазифасидир.

Амударё туманида фаолият юритаётган оммавий ахборот воситалари – “Тараққиёт кўзгуси” унинг иловаси “Менинг оилам” газеталари, Амударё телеканали ва amunews.uz веб сайти таҳририятлари ижодий жамоаси ҳам ўқувчи ёшларнинг маънавиятли, одобли, илмли бўлиб вояга етишларига муносабати ҳисса қўшиб келмоқда, китобхонликни кенг тарғиб келмоқда.

Булардан ташқари тажрибали журналистлар, ижодкорлар туманимиз мактабларида бўлишиб, ўқувчилар билан суҳбатлашишлар жараёнида бадиий ижодга қизиқувчи ўқувчиларни аниқлаб, яқин ҳамкорлик ўрнатмоқда ва иқтидори юксалишига хизмат қилмоқда.

Яқинда “Тараққиёт кўзгуси” газетаси масъул котибаси Озода Худойберганова, махсус мухбири Ойгул Ражабовалар Қипчоқ овули ҳудудидаги 18-мактаб ўқувчилари билан ижодий учрашув ўтказишди. Учрашувда мактаб ўқитувчилари, ўқувчилари иштирок этишди.

Мактаб директорининг маънавий-маърифий ишлар бўйича директор ўринбсари Нурулла Хўжаметов ташаббуси билан ташкиллаштирилган тадбирни мактаб директори Сурайё Эшбоева очди ва олиб борди.

Учрашувда журналистлар Ойгул Ражабова, Озода Худойбергановалар бугунги кунда таҳририят ходимларининг мактаблардаги таълим-тарбия ишига, ўқувчиларининг интеллектуал салоҳиятли бўлиб вояга етишларига кўмаклашиш мақсадида газеталар, телевидение ва веб-сайт орқали шу мақсадда эълон қилинаётган мақолалар, намойиш этилаётган кўрсатувлар ҳақида маълумотлар берди. Шунингдек, таҳририятлар қошида иқтидорли ўқувчиларнинг қобилиятларини тарбиялаш, юксалтириш мақсадида “Жайхун илҳомлари” нодавлат нотижорат ташкилоти фаолияти йўлга қўйилганлиги, ташкилот  4 мингдан зиёд китоб фондига эга кутубхона мавжудлиги қайд этилди. Ёшлар, аҳолига хизмат қилаётган бу кутубхонага ўқитувчиларни ҳам, ўқувчиларни ҳам аъзо бўлишга чақиришди. Учрашувда журналистлар йиғилганларга ўзларининг ижод намуналаридан ўқиб бердилар.

Тадбирда мактаб ижодий-маданий ишлар бўйича тарғиботчиси Махсуда Йўлдошева, ўқувчилар Руслан Жўллибоева, Гулруҳ Сафарбоевалар меҳмонларга ўзларини қизиқтирган саволларни бериб, батафсил жавоблар олдилар. Шунингдек, мактабнинг ижодкор ўқувчилари ўқиган шеърлари ҳам барчага манзур бўлди.

Тадбир ўқувчиларда унутилмас таассуротлар қолдирди.

Зебо ХОЛБОЕВА, шу мактаб ўқитувчиси.