Соя экиш бўйича кўргазмали семинар бўлиб ўтди

Ўзбекистон Республикаси Президентининг “Мева-сабзавотчилик ва узумчиликда оилавий тадбиркорликни ривожлантириш, қишлоқ ҳўжалиги ишлаб чиқаришида деҳқон хўжаликларининг улушини ошириш чора-тадбирлари тўғрисидаги” қарори ижросини таъминлаш мақсадида 18 апрель куни Амударё тумани Чойкўл овулида Ўзбекистон Республикаси Қишлоқ хўжалиги Вазирининг биринчи ўринбосари Шуҳрат Тешаев, Вазирлар Кенгаши Раисининг ўринбосари Дарябай Қайпов, туман ҳокими Султонбой Йўлдашев, Боғдорчилик ва иссиқхона хўжалигини ривожлантириш агентлиги Қорақалпоғистон Республикаси бўлими раҳбари Азамат Замаддиновлар иштирокида кўргазмали семинар ўтказилди.

Семинарда туман ҳокими ўринбосарлари, сектор раҳбарлари, ҳокимлик масъул ходимлари, фермер хўжалиги раислари ҳамда соҳа масъуллари қатнашдилар.

“Полвоновул” фермер хўжалигида бўлиб ўтган семинарда “Аёллар дафтари”, “Ёшлар дафтари” ва “Темир дафтар”га киритилган фуқаролар учун ажратилган 1 гектардан ортиқ ер майдонига соя экиш бўйича тушунтириш ва тавсиялар берилди.

Семинарда таъкидланганидек, оилавий тадбиркорлик доирасида кичик интенсив боғдорчилик, узумчилик, полиз, дуккакли, мойли экинлар, картошка етиштириш ва сабзавотчилик лойиҳаларини қўллаб-қувватлаш орқали “Темир дафтар”, “Аёллар дафтари” ва “Ёшлар дафтари”да рўйхатда турган эҳтиёжманд оилаларнинг даромадли меҳнат билан бандлигини таъминлаш бўйича катта имкониятлар мавжуд.

Шу маънода, туманимиздаги бандлиги таъминланмаган, доимий даромад манбаига эга бўлмаган “Аёллар дафтари”, “Ёшлар дафтари” ва “Темир дафтар”га киритилган фуқаролар учун қишлоқ хўжалигига мўлжалланган 1 гектардан ортиқ ер участкалари ажратиб берилди. Айни кунларда ажратилган ер участкаларида экинларнинг ўз муддатида экилиши ва парвариш қилинишига кўмаклашиш бўйича ишлар манзилли ташкил этилган.

Хусусан, ажратилан мазкур ер майдонларида соя етиштириш йўлга қўйилди. Сабаби, соячиликни ривожлантириш ҳам иқтисодий, ҳам экологик жиҳатдан ўта фойдалидир. Бу, аввало, аҳоли демографияси туфайли кундалик истеъмол товарларига ортиб бораётган эҳтиёжни кафолатли қондириш, озиқ-овқат хавфсизлигини таъминлашда қўл келади.

Айтиш жоизки, соя ўсимлиги биологик хусусиятига кўра, жой танламайди. Шўрланган, ер ости сув сатҳи кўтарилган экин майдонларида ҳам ўсаверади. Шунингдек, уни аралаш усулда парваришлаш ҳам жуда қулай. Кўриниб турибдики, соя етиштиришни кенг ўзлаштирилиши мамлакатимиз иқтисодиёти учун ҳар тарафлама фойда келтириб, халқимиз дастурхонини озиқ-овқат ва чорвачилик маҳсулотлари билан бойитиш, бозорларни арзон ва сифатли ноз-неъматлар билан тўлдиришга қўшимча имкониятлар яратади.

Шунингдек семинарда чигит экиш бўйича агротехник тадбирларнинг бажарилишига доир тушунтириш ва тавсиялар ҳам бериб ўтилди.

Туманимизда 2022 йилги пахта ҳосили учун 352 та фермер ва қишлоқ хўжаликларида чигит экиш ишлари амалга оширилмоқда. Мазкур ишларнинг сифатли тарзда ниҳояга етказилиши бўйича барча техник воситалар тўлиқ жалб қилинган.

Семинар якунида масъуллар томонидан бошқа вилоят ва туманлар билан ўзаро тажриба алмашиш, хорижнинг илғор усулларни ўрганиш, бу технологияларни нафақат ғўза ва соя, балки бошқа экин турлари мисолида ҳам қўллаш кераклиги айтиб ўтилди.

Туман ҳокимлигининг Ахборот хизмати