Soya ekish boʻyicha koʻrgazmali seminar boʻlib oʻtdi

Oʻzbekiston Respublikasi Prezidentining “Meva-sabzavotchilik va uzumchilikda oilaviy tadbirkorlikni rivojlantirish, qishloq hoʻjaligi ishlab chiqarishida dehqon xoʻjaliklarining ulushini oshirish chora-tadbirlari toʻgʻrisidagi” qarori ijrosini taʼminlash maqsadida 18-aprel kuni Amudaryo tumani Choykoʻl ovulida Oʻzbekiston Respublikasi Qishloq xoʻjaligi Vazirining birinchi oʻrinbosari Shuhrat Teshayev, Vazirlar Kengashi Raisining oʻrinbosari Daryabay Qaypov, tuman hokimi Sultonboy Yoʻldashev, Bogʻdorchilik va issiqxona xoʻjaligini rivojlantirish agentligi Qoraqalpogʻiston Respublikasi boʻlimi rahbari Azamat Zamaddinovlar ishtirokida koʻrgazmali seminar oʻtkazildi.

Seminarda tuman hokimi oʻrinbosarlari, sektor rahbarlari, hokimlik masʼul xodimlari, fermer xoʻjaligi raislari hamda soha masʼullari qatnashdilar.

“Polvonovul” fermer xoʻjaligida boʻlib oʻtgan seminarda “Ayollar daftari”, “Yoshlar daftari” va “Temir daftar”ga kiritilgan fuqarolar uchun ajratilgan 1 gektardan ortiq yer maydoniga soya ekish boʻyicha tushuntirish va tavsiyalar berildi.

Seminarda taʼkidlanganidek, oilaviy tadbirkorlik doirasida kichik intensiv bogʻdorchilik, uzumchilik, poliz, dukkakli, moyli ekinlar, kartoshka yetishtirish va sabzavotchilik loyihalarini qoʻllab-quvvatlash orqali “Temir daftar”, “Ayollar daftari” va “Yoshlar daftari”da roʻyxatda turgan ehtiyojmand oilalarning daromadli mehnat bilan bandligini taʼminlash boʻyicha katta imkoniyatlar mavjud.

Shu maʼnoda, tumanimizdagi bandligi taʼminlanmagan, doimiy daromad manbaiga ega boʻlmagan “Ayollar daftari”, “Yoshlar daftari” va “Temir daftar”ga kiritilgan fuqarolar uchun qishloq xoʻjaligiga moʻljallangan 1 gektardan ortiq yer uchastkalari ajratib berildi. Ayni kunlarda ajratilgan yer uchastkalarida ekinlarning oʻz muddatida ekilishi va parvarish qilinishiga koʻmaklashish boʻyicha ishlar manzilli tashkil etilgan.

Xususan, ajratilan mazkur yer maydonlarida soya yetishtirish yoʻlga qoʻyildi. Sababi, soyachilikni rivojlantirish ham iqtisodiy, ham ekologik jihatdan oʻta foydalidir. Bu, avvalo, aholi demografiyasi tufayli kundalik isteʼmol tovarlariga ortib borayotgan ehtiyojni kafolatli qondirish, oziq-ovqat xavfsizligini taʼminlashda qoʻl keladi.

Aytish joizki, soya oʻsimligi biologik xususiyatiga koʻra, joy tanlamaydi. Shoʻrlangan, yer osti suv sathi koʻtarilgan ekin maydonlarida ham oʻsaveradi. Shuningdek, uni aralash usulda parvarishlash ham juda qulay. Koʻrinib turibdiki, soya yetishtirishni keng oʻzlashtirilishi mamlakatimiz iqtisodiyoti uchun har taraflama foyda keltirib, xalqimiz dasturxonini oziq-ovqat va chorvachilik mahsulotlari bilan boyitish, bozorlarni arzon va sifatli noz-neʼmatlar bilan toʻldirishga qoʻshimcha imkoniyatlar yaratadi.

Shuningdek seminarda chigit ekish boʻyicha agrotexnik tadbirlarning bajarilishiga doir tushuntirish va tavsiyalar ham berib oʻtildi.

Tumanimizda 2022-yilgi paxta hosili uchun 352 ta fermer va qishloq xoʻjaliklarida chigit ekish ishlari amalga oshirilmoqda. Mazkur ishlarning sifatli tarzda nihoyaga yetkazilishi boʻyicha barcha texnik vositalar toʻliq jalb qilingan.

Seminar yakunida masʼullar tomonidan boshqa viloyat va tumanlar bilan oʻzaro tajriba almashish, xorijning ilgʻor usullarni oʻrganish, bu texnologiyalarni nafaqat gʻoʻza va soya, balki boshqa ekin turlari misolida ham qoʻllash kerakligi aytib oʻtildi.

Tuman hokimligining Axborot xizmati