“ЯШИЛ МАКОН” АКЦИЯСИ ДОИРАСИДА ТУМАН ОБОДОНЛАШТИРИШ БОШҚАРМАСИ ТОМОНИДАН БОҒ ЯРАТИЛДИ
Айни кўклам кунларида юртимиз бўйлаб барча ҳудудларда экологик ҳолатни яхшилаш, атроф-муҳитни файзли ва обод гўшага айлантириш мақсадида "Яшил макон" умуммиллий лойиҳаси доирасида кўчатлар ўтқазилиб, боғу-роғлар яратилмоқда. Давлатимиз раҳбари ташаббуси билан бутун мамлакатда амалга оширилаётган ушбу лойиҳага кўра Амударё туманида ҳам кўчатлар экиш ишлари қизғин ташкил этилмоқда. Ҳудуднинг иқлим шароити, экиш майдонларининг ўзига хослигидан келиб чиқиб, “Яшил майдон”лар сони кўпайтирилиб борилмоқда.
“Яшил йиллик” тадбирларида туман Ободонлаштириш бошқармаси ходимлари ҳам фаол иштирок этиб, йўл четларига, маъмурий бинолар атрофларига манзарали ниҳол ва буталар, гуллар экишмоқда.
Манғит шаҳрининг Дўстлик маҳалласи ҳудудидаги бўш ётган майдонда “Яшил макон” акцияси доирасида катта боғ бунёд этиш мақсадида туман Ободонлаштириш бошқармаси томонидан кўчат экиб, боғ яратилмоқда. Кўчат экиш жараёнида тупроқ унумдорлигига алоҳида эътибор қаратилиб, ер аввало суғоришга тайёр ҳолатга келтирилди. Янги ўтқазилган кўчатларни парвариш қилиш бўйича алоҳида масъуллар белгиланди.
Маълумки, жорий йил 2 февраль куни Президент раислигида бўлиб ўтган видеоселектор йиғилишида ҳам «Яшил макон» умуммиллий лойиҳасини амалга ошириш борасидаги долзарб вазифалар муҳокама қилиниб, ушбу йиғилишда 1 мартдан эътиборан «Яшил йиллик» умуммиллий тадбири бошланиши маълум қилинган эди. Шунга мувофиқ, 2022 йил баҳор мавсумида туманимизда кўчат экиш бўйича амалга ошириладиган чора-тадбирларни ўз ичига олган “Йўл харитаси” ишлаб чиқилиб, баҳор ойларида олма, гилос, беҳи, ёнғоқ ва арча, терак, қайрағоч каби манзарали дарахт кўчатларини экиш бўйича режа тасдиқланган.
Туман Ободонлаштириш бошқармаси томонидан Дўстлик маҳалласи ҳудудида янгидан боғ ташкил қилиш учун 6 гектардан зиёд ер майдони ажратилиб, 3 минг 790 туп мевали ва манзарали дарахт кўчатларини ўтқазиш режа қилинган. Ажратилган ер ўртасига мевали дарахтлар, атрофларига эса манзарали дарахтлар кўчатларини белгиланган ўлчовлар бўйича суғоришга, парваришлашга қулай ҳолатда экиб чиқиш, шу орқали туман экологиясини яхшилаш билан бирга гўзал манзара яратиш, файзли боғ барпо этиш мўлжалланган. Кўчатлар ҳудуднинг иқлим шароитидан келиб чиқиб, кўкаламзорлаштиришни, турли мевалар етиштиришни назарда тутган ҳолда танлаб олинди.
Боғ барпо қилишга киришилган куннинг ўзидаёқ ташкилот ходимлари ажратилган ер майдонининг 2,8 гектарига 650 тупдан зиёд мевали дарахтлар кўчатларини экишди. Олма, беҳи, ўрик, нок каби турли мевали дарахтлар кўчатлари агротехника қоидаларига риоя қилинган ҳолда ўтқазилди. Эндиликда улар назорат остида парвариш қилинади, минерал ва органик ўғитлар билан озиқлантирилиб, зараркунандалардан ҳимоя қилиб борилади.
Бундай саъй-ҳаракатлардан кўзланган асосий мақсад халқимизга хос эзгу фазилатларни қадрлаш, эзгуликни ёшлар қалбига сингдириш, қишлоқ ва шаҳарлар, маҳаллаларни кўркам кўринишга келтиришдан иборат. Президентимиз ташаббуси билан бошланган ушбу хайрли ва эзгу ишлар барча ҳудудларда давом этмоқда.
О.Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
