“YaShIL MAKON” AKTsIYaSI DOIRASIDA TUMAN OBODONLAShTIRISh BOShQARMASI TOMONIDAN BOGʻ YaRATILDI
Ayni koʻklam kunlarida yurtimiz boʻylab barcha hududlarda ekologik holatni yaxshilash, atrof-muhitni fayzli va obod goʻshaga aylantirish maqsadida "Yashil makon" umummilliy loyihasi doirasida koʻchatlar oʻtqazilib, bogʻu-rogʻlar yaratilmoqda. Davlatimiz rahbari tashabbusi bilan butun mamlakatda amalga oshirilayotgan ushbu loyihaga koʻra Amudaryo tumanida ham koʻchatlar ekish ishlari qizgʻin tashkil etilmoqda. Hududning iqlim sharoiti, ekish maydonlarining oʻziga xosligidan kelib chiqib, “Yashil maydon”lar soni koʻpaytirilib borilmoqda.
“Yashil yillik” tadbirlarida tuman Obodonlashtirish boshqarmasi xodimlari ham faol ishtirok etib, yoʻl chetlariga, maʼmuriy binolar atroflariga manzarali nihol va butalar, gullar ekishmoqda.
Mangʻit shahrining Doʻstlik mahallasi hududidagi boʻsh yotgan maydonda “Yashil makon” aktsiyasi doirasida katta bogʻ bunyod etish maqsadida tuman Obodonlashtirish boshqarmasi tomonidan koʻchat ekib, bogʻ yaratilmoqda. Koʻchat ekish jarayonida tuproq unumdorligiga alohida eʼtibor qaratilib, yer avvalo sugʻorishga tayyor holatga keltirildi. Yangi oʻtqazilgan koʻchatlarni parvarish qilish boʻyicha alohida masʼullar belgilandi.
Maʼlumki, joriy yil 2-fevral kuni Prezident raisligida boʻlib oʻtgan videoselektor yigʻilishida ham «Yashil makon» umummilliy loyihasini amalga oshirish borasidagi dolzarb vazifalar muhokama qilinib, ushbu yigʻilishda 1-martdan eʼtiboran «Yashil yillik» umummilliy tadbiri boshlanishi maʼlum qilingan edi. Shunga muvofiq, 2022-yil bahor mavsumida tumanimizda koʻchat ekish boʻyicha amalga oshiriladigan chora-tadbirlarni oʻz ichiga olgan “Yoʻl xaritasi” ishlab chiqilib, bahor oylarida olma, gilos, behi, yongʻoq va archa, terak, qayragʻoch kabi manzarali daraxt koʻchatlarini ekish boʻyicha reja tasdiqlangan.
Tuman Obodonlashtirish boshqarmasi tomonidan Doʻstlik mahallasi hududida yangidan bogʻ tashkil qilish uchun 6 gektardan ziyod yer maydoni ajratilib, 3 ming 790 tup mevali va manzarali daraxt koʻchatlarini oʻtqazish reja qilingan. Ajratilgan yer oʻrtasiga mevali daraxtlar, atroflariga esa manzarali daraxtlar koʻchatlarini belgilangan oʻlchovlar boʻyicha sugʻorishga, parvarishlashga qulay holatda ekib chiqish, shu orqali tuman ekologiyasini yaxshilash bilan birga goʻzal manzara yaratish, fayzli bogʻ barpo etish moʻljallangan. Koʻchatlar hududning iqlim sharoitidan kelib chiqib, koʻkalamzorlashtirishni, turli mevalar yetishtirishni nazarda tutgan holda tanlab olindi.
Bogʻ barpo qilishga kirishilgan kunning oʻzidayoq tashkilot xodimlari ajratilgan yer maydonining 2,8 gektariga 650 tupdan ziyod mevali daraxtlar koʻchatlarini ekishdi. Olma, behi, oʻrik, nok kabi turli mevali daraxtlar koʻchatlari agrotexnika qoidalariga rioya qilingan holda oʻtqazildi. Endilikda ular nazorat ostida parvarish qilinadi, mineral va organik oʻgʻitlar bilan oziqlantirilib, zararkunandalardan himoya qilib boriladi.
Bunday saʼy-harakatlardan koʻzlangan asosiy maqsad xalqimizga xos ezgu fazilatlarni qadrlash, ezgulikni yoshlar qalbiga singdirish, qishloq va shaharlar, mahallalarni koʻrkam koʻrinishga keltirishdan iborat. Prezidentimiz tashabbusi bilan boshlangan ushbu xayrli va ezgu ishlar barcha hududlarda davom etmoqda.
O.Xudoyberganova.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
