"Оқ олтин"да Наврўз байрами кенг нишонланди

Айни кунларда ўлкамизнинг ҳар гўшасида кўклам шукуҳи кезмоқда. Халқимиз қадимий ва навқирон Наврўз айёмини нишонламоқда. Наврўз – янги кун эканлигини, мусулмон халқлари учун янги кун – янги йил бошланишини ҳисобга оладиган бўлсак, бу сана бизнинг энг соғиниб кутадиган айёмимиз эканлиги яна бир бор исботини топади. Баҳорнинг гўзал ва севимли Наврўз байрами халқимизнинг ҳар бир гўшасида, ҳар бир хонадонида ўзгача тароват бахш этмоқда.

Ҳамма жойда Наврўзга бағишланган тадбирлар, байрам сайиллари давом этмоқда. Туманимиздаги Оқ олтин овулининг “Жийдали қулон” маҳалласи фуқаролари ўзларининг меҳнатсеварлиги, аҳилилиги, бир-бирларига меҳрибонлиги билан алоҳида ажралиб туради. Бу маҳаллада ҳар бир байрам, тўй, маданий-тадбирлар тартибли, ихчам, шодиёна руҳда ўтказилиши билан таҳсинларга лойиқ бўлиб келмоқда.

Бу элатда катталар иззатда, ёшлар хизматда бўлиб, байрам тадбирлари уюшқоқлик билан ташкил этилади. Бу йилги Наврўз байрами муносабати билан ҳудуддаги 71-сонли мактаб биноси олдида ўтказилган байрам тадбири ҳам сўзимизнинг яққол исботидир.

Бу йилги байрамга ҳам пухта тайёргарликлар кўрилди. Кўча ва хиёбонлар тозаланди, ариқ, зовурлар қазилиб, йўллар текисланди, мевали ва манзарали дарахтларга байрамона шакл берилди. Ҳар бир хонадон обод ва озода бўлиш борасида бир-бирларига намуна бўлишди.

Байрам олдидан халқимизнинг миллий ва севимли таоми сумалак тайёрланди. Байрам дастурхонини элатнинг қўли гул қиз-келинчаклари томонидан тайёрланган миллий таомлар безади.

Байрам тадбирида маҳалланинг меҳнат фахрийлари, кекса отахон-у онахонлари, турли касб эгалари, таклиф қилинган меҳмонлар жамул-жам бўлдилар.

Тадбирни маҳалла фаоли Янгибой Шукуруллаев кириш сўзи билан очиб, барчани қутлуғ айём билан муборакбод қилди, ишларида омад, мустаҳкам сиҳат-саломатлик тилади.

71-сонли мактаб директори Руслан Камоловнинг табрик сўзидан кейин мактабнинг ўқитувчи ва ўқувчилар жамоаси ҳамда маҳалла фидойи ёшларининг иштирокидаги концерт дастури, қизиқарли ўйин томошалари бошланиб кетди.

71-сонли мактабнинг ижодий-маданий масалалар бўйича тарғиботчиси Рабиға Тўраева, она тили ва адабиёт фани ўқитувчиси Муҳаббат Мадатовалар томонидан тайёрланган байрам дастури, унда ижро этилган куй-қўшиқлар барча байрам иштирокчиларига бирдек манзур бўлди.

Байрам дастурини 11-синф ўқувчиларидан Умида Матниёзова, Диёрбек Оймурадовларнинг  моҳирона бошқариб боришлари байрамга янада файз қўшди. Байрам тантанасида Оқ олтин фуқаролар йиғини раиси Рахим Ўрозбоев ҳам иштирок  этди ва маҳалла аҳлини қутлуғ айём билан қизғин муборакбод этди.

Байрам тадбирида “қўли ширин келинчак” мавзусида беллашув ўтказилди. Унда маҳалланинг ёш келинлари томонидан тайёрланган миллий таомлар кўргазмаси намойиш қилинди. Беллашув ғолиблари ва қатнашчилари ташкилотчилар томонидан муносиб тақдирланди.

Маҳалла ёшлари нафақат билим олишда, балки ҳарбий машқларда, спорт ўйинларида ҳам анча уддабурон эканлигини иштирокчилар олдида намойиш қилдилар. 9-синф ўқувчилари томонидан бажарилган мураккаб ҳарбий машқ ўйинлари барчани лол қолдирди. Бу ҳаракатлар эса ўз ўрнида маҳаллада Ватанимизга содиқ ҳарбий посбонлар етишиб келаётганидан дарак бериб турибди. Ўқувчиларнинг ўктам ва чаққон ҳаракатлари томошабинларнинг зўр олқишларига сазовор бўлди.

Байрам тадбири маҳалладошлар кўнглига олам-олам қувонч бахш этди. Тинч юртга байрамлар ярашади деган сўзлар яна бир бор ўз исботини топди.

Маҳалла аҳли бир-бирларига энг аъло кунларни, яхши кайфиятни тилаган ҳолда бу байрамни улкан кўтаринки руҳда нишонладилар.

Ўрозали РЕЙИМОВ.