Масъуллар Чойкўл овулида ҳоким ёрдамчиси томонидан амалга оширилаётган ишлар билан танишди

Бугунги кунда мамлакатимизда аҳоли бандлигини таъминлаш орқали уларнинг даромади ва турмуш фаровонлигини юксалтириш борасида амалга оширилаётган ишлар кўлами ниҳоятда кенгаймоқда.

Хусусан, Амударё туманида ҳам муҳтарам Президентимиз томонидан қабул қилинган қонун ҳужжатлари доирасида кўплаб ижобий ишлар амалга оширилмоқда. Айниқса, бу борада маҳаллаларда фаолият олиб бораётган ҳоким ёрдамчиларининг хизматлари алоҳида эътиборга лойиқ.

Яқинда Амударё туманининг Чойкўл овул фуқаролар йиғинида ҳоким ёрдамчиси томонидан амалга оширилаётган ишлар билан танишиш, ҳамда бандлиги таъминланган аҳоли билан суҳбатлашиш мақсадида учрашув бўлиб ўтди. Учрашувда Қорақалпоғистон Республикаси Жўқорғи Кенгаши депутати, Чойкўл овул фуқаролар йиғини раиси Яхшимурод Ахмедов, Xалқ депутатлари туман Кенгаши котибият мудири Мансур Ўразбoев, Ўзбекистон-либерал демократик партияси туман Кенгаши аппарат раҳбари Мадамин Казаковлар иштирок этишди.

Масъуллар дастлаб, Чойкўл овулининг ҳоким ёрдамчиси Рустам Раҳимовнинг ташаббуси билан имтиёзли кредит эвазига мотокультиваторлар олиб берилган 4 нафар фуқаролар билан суҳбатлашишди.

Учрашув давомида фуқаролардан Ҳурсанд Эркаев, Мадрим Камолов, Илҳом Абдуллаев, Ғулом Дўстчановлар ушбу техника воситаси орқали маҳалладошларига беминнат хизмат кўрсатибгина қолмасдан, қўшимча даромад манбаига ҳам эга бўлаётганлигидан мамнун эканлигини билдиришди.

Шундан сўнг, масъуллар овул ҳудудидаги Қорақипчоқ аҳоли пунктига ташриф буюришди. Ташриф давомида ўз томорқасида иссиқхона бунёд этиб, маҳалладошларини ҳавфсиз ва арзон полиз махсулотлари билан таъминлашни ният қилган Маҳмуд Норбоев, Рустам Бобожановлар билан суҳбатлашиб иссиқхонани янада кенгайтириш бўйича ўз тавсия ва таклифларини беришди.

Бундан ташқари масъуллар, Нўғай Эшон аҳоли пунктида истиқомат қилувчи чорвачиликнинг етакчи соҳаларидан бири − қорамолчилик билан шуғулланиб, туманимиз аҳолисини гўшт, сут маҳсулотлари билан таъминлаётган Отабек Файзуллаевнинг хонадонида бўлишди.

Масъуллар Президентимиз томонидан қабул қилинган “Чорвачиликни янада ривожлантириш ва чорва озуқа базасини мустаҳкамлаш чора-тадбирлари тўғрисида”ги қарорнинг мазмун-моҳияти ҳақида сўз юритиб, тадбиркорга ҳуқуқий тушунтириш ва тавсиялар бердилар.

Отабек Файзуллаев бугунги кунда 50 бош наслли қорамоллар боқиб, ўз тадбиркорлик фаолиятини йўлга қўйиш билан бирга маҳалладошларининг бандлиги таъминланишига ҳам ҳисса қўшмоқда.

Мамлакатимизда тадбиркорлик қилиш истагидаги фуқароларга кенг имкониятлар яратиб берилган. Маҳаллалардаги ҳоким ёрдамчилари томонидан ушбу имкониятлар доирасида кўплаб фуқароларнинг бандлиги таъминланишига эришилмоқда.

Мухтасар айтганда туманда янги иш ўринларини яратиш ва аҳоли бандлигини таъминлашга қаратилаётган эътибор ўз навбатида аҳоли бандлигини таъминлашга, ишлаб чиқариш салоҳиятини юксалтиришга, пировардида мамлакатимиз иқтисодиётини янада ривожлантиришга хизмат қилмоқда. 

Туман ҳокимлигининг Ахборот хизмати