Masʼullar Choykoʻl ovulida hokim yordamchisi tomonidan amalga oshirilayotgan ishlar bilan tanishdi

Bugungi kunda mamlakatimizda aholi bandligini taʼminlash orqali ularning daromadi va turmush farovonligini yuksaltirish borasida amalga oshirilayotgan ishlar koʻlami nihoyatda kengaymoqda.

Xususan, Amudaryo tumanida ham muhtaram Prezidentimiz tomonidan qabul qilingan qonun hujjatlari doirasida koʻplab ijobiy ishlar amalga oshirilmoqda. Ayniqsa, bu borada mahallalarda faoliyat olib borayotgan hokim yordamchilarining xizmatlari alohida eʼtiborga loyiq.

Yaqinda Amudaryo tumanining Choykoʻl ovul fuqarolar yigʻinida hokim yordamchisi tomonidan amalga oshirilayotgan ishlar bilan tanishish, hamda bandligi taʼminlangan aholi bilan suhbatlashish maqsadida uchrashuv boʻlib oʻtdi. Uchrashuvda Qoraqalpogʻiston Respublikasi Joʻqorgʻi Kengashi deputati, Choykoʻl ovul fuqarolar yigʻini raisi Yaxshimurod Axmedov, Xalq deputatlari tuman Kengashi kotibiyat mudiri Mansur Oʻrazboev, Oʻzbekiston-liberal demokratik partiyasi tuman Kengashi apparat rahbari Madamin Kazakovlar ishtirok etishdi.

Masʼullar dastlab, Choykoʻl ovulining hokim yordamchisi Rustam Rahimovning tashabbusi bilan imtiyozli kredit evaziga motokultivatorlar olib berilgan 4 nafar fuqarolar bilan suhbatlashishdi.

Uchrashuv davomida fuqarolardan Hursand Erkayev, Madrim Kamolov, Ilhom Abdullayev, Gʻulom Doʻstchanovlar ushbu texnika vositasi orqali mahalladoshlariga beminnat xizmat koʻrsatibgina qolmasdan, qoʻshimcha daromad manbaiga ham ega boʻlayotganligidan mamnun ekanligini bildirishdi.

Shundan soʻng, masʼullar ovul hududidagi Qoraqipchoq aholi punktiga tashrif buyurishdi. Tashrif davomida oʻz tomorqasida issiqxona bunyod etib, mahalladoshlarini havfsiz va arzon poliz maxsulotlari bilan taʼminlashni niyat qilgan Mahmud Norboyev, Rustam Bobojanovlar bilan suhbatlashib issiqxonani yanada kengaytirish boʻyicha oʻz tavsiya va takliflarini berishdi.

Bundan tashqari masʼullar, Noʻgʻay Eshon aholi punktida istiqomat qiluvchi chorvachilikning yetakchi sohalaridan biri − qoramolchilik bilan shugʻullanib, tumanimiz aholisini goʻsht, sut mahsulotlari bilan taʼminlayotgan Otabek Fayzullayevning xonadonida boʻlishdi.

Masʼullar Prezidentimiz tomonidan qabul qilingan “Chorvachilikni yanada rivojlantirish va chorva ozuqa bazasini mustahkamlash chora-tadbirlari toʻgʻrisida”gi qarorning mazmun-mohiyati haqida soʻz yuritib, tadbirkorga huquqiy tushuntirish va tavsiyalar berdilar.

Otabek Fayzullayev bugungi kunda 50 bosh naslli qoramollar boqib, oʻz tadbirkorlik faoliyatini yoʻlga qoʻyish bilan birga mahalladoshlarining bandligi taʼminlanishiga ham hissa qoʻshmoqda.

Mamlakatimizda tadbirkorlik qilish istagidagi fuqarolarga keng imkoniyatlar yaratib berilgan. Mahallalardagi hokim yordamchilari tomonidan ushbu imkoniyatlar doirasida koʻplab fuqarolarning bandligi taʼminlanishiga erishilmoqda.

Muxtasar aytganda tumanda yangi ish oʻrinlarini yaratish va aholi bandligini taʼminlashga qaratilayotgan eʼtibor oʻz navbatida aholi bandligini taʼminlashga, ishlab chiqarish salohiyatini yuksaltirishga, pirovardida mamlakatimiz iqtisodiyotini yanada rivojlantirishga xizmat qilmoqda. 

Tuman hokimligining Axborot xizmati