ХОТИН-ҚИЗЛАР ТАЗЙИҚ ВА ЗЎРАВОНЛИКДАН ҲИМОЯ ҚИЛИНАДИ

Ҳозирги кунда хотин-қизларга нисбатан содир қилинаётган ҳар хил кўринишдаги тазйиқ ва зўравонликдан ҳимоя қилиш устувор масалалардан бирига айланиб, қонун даражасида кафолатланмоқда. Ўзбекистон Республикасининг 2019 йил 3 сентябрдан кучга кирган “Хотин-қизларни тазйиқ ва зўравонликдан ҳимоя қилиш тўғрисида”ги Қонуни бунинг яққол ифодасидир.

Тазйиқ ва зўравонликдан жабрланувчи деганимизда – ўзига нисбатан тазйиқ ва зўравонлик содир этилиши таҳдиди остида бўлган ёки тазйиқ ва зўравонлик натижасида жабрланган аёл жинсидаги шахсни тушунамиз. Тазйиқ ва зўравонликдан жабрланувчилар тегишли ҳуқуқларга эга.

Бундай вазиятда жабрланган аёл ўзига нисбатан тазйиқ ва зўравонлик содир этилганлиги ёки уларни содир этиш таҳдиди тўғрисидаги ариза билан тегишли ваколатли органларга ҳамда ташкилотларга ёхуд судга мурожаат этиши мумкин. Махсус марказларда, шунингдек, бепул телефон линияси орқали текин ҳуқуқий маслаҳат, иқтисодий, ижтимоий, психологик, тиббий ва бошқа ёрдам олиш, ички ишлар органларига ҳимоя ордери бериш тўғрисидаги талаб билан мурожаат қилиш, ҳимоя ордери шартлари бузилган тақдирда эса уларни бу ҳақда хабардор қилиш ҳуқуқига эга.

Тазйиқ ва зўравонликдан жабрланувчи етказилган моддий зарарнинг ўрнини қоплаш ҳамда маънавий зиённи компенсация қилиш тўғрисидаги ариза билан судга мурожаат этганда давлат божи тўлашдан озод қилинади.

Маҳалла ва оилани қўллаб-қувватлаш вазирлиги ёрдам кўрсатиш, маслаҳат бериш механизми ҳамда чора-тадбирлари, хотин-қизларга нисбатан тазйиқ ва зўравонлик ҳолатларининг олдини олиш тўғрисида ахборот олишни таъминлаш мақсадида Ўзбекистон Республикасининг бутун ҳудудида тун-у кун ишлайдиган, бепул телефон линияси тармоғи 1146 рақами ишлаб туришини таъминлайди.

Хотин-қизларни тазйиқ ва зўравонликдан ҳимоя қилиш борасида амалга оширилаётган бу каби ишлар аёл-қизларнинг ҳақ-ҳуқуқлари кафолатли ҳимоя қилинишини таъминламоқда.

Н.Жуманиёзова,

туман Юридик хизмат кўрсатиш маркази бошлиғи.