Амударё тумани ҳокими Султонбой Йўлдашевнинг Наврўз умумхалқ байрами муносабати билан туман аҳлига табриги
Қадрли юртдошлар!
Авваламбор, барчангизни яшариш ва янгиланиш айёми — Наврўз байрами билан чин дилдан самимий табриклайман!
Бу байрам – ота-боболаримиз минг йиллар давомида нишонлаб келган, урф-одатларимизни ва миллийлигимизни ўзида жамлаган маънавий бойлигимиздир.
Аждодларимиз Наврўзни йил боши сифатида нишонлаб, далаларда деҳқончилик ишларини айнан шу кунда бошлаганлар. Бу анъана бугун ҳам давом этмоқда. Айни кунларда деҳқонларимиз ерга барака уруғларини экишга тайёргарлик кўрмоқдалар. “Яшил макон” умуммиллий лойиҳаси доирасидаги кўкаламзорлаштириш ва кўчат экиш тадбирлари ҳам уюшқоқлик билан ўтказилмоқда. Фурсатдан фойдаланиб, тажрибали деҳқонларимиз ва фидойи фермерларимизнинг бошланаётган ишларига барака тилаймиз!
Нафақат деҳқон ва фермерларимиз, балки ҳар бир юртдошимиз янги йилни янги режалар билан бошлаб, Наврўзни дастлабки ютуқлари билан қарши олмоқдалар. Уларнинг меҳнатлари эвазига Амударё туманимиз ҳам кундан кунга ривожланиб, халқимизнинг турмуш сифати юксалиб бормоқда. Биргина жорий 2022 йилнинг ўзида туман миқёсида амалга ошириладиган ишларнинг ўзиёқ фикримизнинг исботидир.
Жумладан, жорий йилда жами 343,2 млрд. сўмлик 81 та лойиҳаларни амалга ошириш режалаштирилмоқда. Аҳолининг бандлик даражасини ошириш мақсадида 6972 та янги иш ўринлари яратилади. Бунинг учун умумий қиймати 68,7 млрд. сўм миқдорида имтиёзли кредитлар ажратилади.
Кичик бизнес субъектлари сонини ҳозиргидан 3 баробарга ошириш режалаштирилган бўлиб, 2022 йилда янгидан 645 та тадбиркорлик субъектлари ташкил этилади.
“Обод қишлоқ” ва “Обод маҳалла” дастурлари доирасида жорий йилда “Тўлқин” овули ва “Аёқчи” аҳалласида 27,3 млрд. сўмлик қурилиш ва ободонлаштириш ишлари бажарилади.
Шунингдек, “Фаровон” маҳалласи ҳудудида “Қишлоқ қурилиш инвест” инжиниринг компанияси буюртмачилигида 6 та, тадбиркорлар ҳисобидан 4 та кўп қаватли турар жойлар қурилади.
Президентимизнинг қарори асосида жорий йилда фермер хўжаликларининг пахта ва ғалладан қисқартирилган 897 гектар майдонларини 3 минг 588 та деҳқон хўжаликлари ташкил қилиш учун аҳолига бериш бўйича амалий ишлар давом этмоқда.
Фурсатдан фойдаланиб, амударёлик барча соҳалар фидойиларининг “Инсон қадрини улуғлаш ва фаол маҳалла йили” деб номланган 2022 йилда амалга ошираётган хайрли ва масъулиятли ишларида омад тилаймиз!
Азиз юртдошлар!
Шу кунларда “Ассалом, Наврўз – янгиланиш, меҳр-оқибат ва қадр-қиммат айёми!” деган ғояни ўзида мужассам этган ҳолда Наврўз байрамини кенг нишонламоқдамиз. Шундай қутлуғ кунларда аввало миллийлигимизнинг ҳимоячиси, озодлигимизнинг асоси бўлмиш мустақиллигимиз абадий бўлишини Яратгандан сўраймиз. Дунёнинг турли бурчакларида нотинчликлар давом этаётган бугунги кунда юртимиз тинч, осмонимиз мусаффо, халқимиз омон ва турмушимиз фаровон бўлишини сўраб дуога қўл очган отахон ва онахонларимизнинг тилаклари ижобат бўлсин!
Келаси Наврўз байрамларига ҳам барчамизни тинчлик-омонликда, соғ-саломат етказсин!
Буюк бобомиз Алишер Навоий айтганларидек, ҳар тунимиз қадр кечаси каби баракали, ҳар кунимиз Наврўз каби қувонч ва шодликларга тўла бўлсин!
Наврўз байрами барчангизга муборак бўлсин, азиз юртдошлар!
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
