Amudaryo tumani hokimi Sultonboy Yoʻldashevning Navroʻz umumxalq bayrami munosabati bilan tuman ahliga tabrigi

Qadrli yurtdoshlar!

Avvalambor, barchangizni yasharish va yangilanish ayyomi — Navroʻz bayrami bilan chin dildan samimiy tabriklayman!

Bu bayram – ota-bobolarimiz ming yillar davomida nishonlab kelgan, urf-odatlarimizni va milliyligimizni oʻzida jamlagan maʼnaviy boyligimizdir.

Ajdodlarimiz Navroʻzni yil boshi sifatida nishonlab, dalalarda dehqonchilik ishlarini aynan shu kunda boshlaganlar. Bu anʼana bugun ham davom etmoqda. Ayni kunlarda dehqonlarimiz yerga baraka urugʻlarini ekishga tayyorgarlik koʻrmoqdalar. “Yashil makon” umummilliy loyihasi doirasidagi koʻkalamzorlashtirish va koʻchat ekish tadbirlari ham uyushqoqlik bilan oʻtkazilmoqda. Fursatdan foydalanib, tajribali dehqonlarimiz va fidoyi fermerlarimizning boshlanayotgan ishlariga baraka tilaymiz!

Nafaqat dehqon va fermerlarimiz, balki har bir yurtdoshimiz yangi yilni yangi rejalar bilan boshlab, Navroʻzni dastlabki yutuqlari bilan qarshi olmoqdalar. Ularning mehnatlari evaziga Amudaryo tumanimiz ham kundan kunga rivojlanib, xalqimizning turmush sifati yuksalib bormoqda. Birgina joriy 2022-yilning oʻzida tuman miqyosida amalga oshiriladigan ishlarning oʻziyoq fikrimizning isbotidir.

Jumladan, joriy yilda jami 343,2 mlrd. soʻmlik 81 ta loyihalarni amalga oshirish rejalashtirilmoqda. Aholining bandlik darajasini oshirish maqsadida 6972 ta yangi ish oʻrinlari yaratiladi. Buning uchun umumiy qiymati 68,7 mlrd. soʻm miqdorida imtiyozli kreditlar ajratiladi.

Kichik biznes subʼektlari sonini hozirgidan 3 barobarga oshirish rejalashtirilgan boʻlib, 2022-yilda yangidan 645 ta tadbirkorlik subʼektlari tashkil etiladi.

“Obod qishloq” va “Obod mahalla” dasturlari doirasida joriy yilda “Toʻlqin” ovuli va “Ayoqchi” ahallasida 27,3 mlrd. soʻmlik qurilish va obodonlashtirish ishlari bajariladi.

Shuningdek, “Farovon” mahallasi hududida “Qishloq qurilish invest” injiniring kompaniyasi buyurtmachiligida 6 ta, tadbirkorlar hisobidan 4 ta koʻp qavatli turar joylar quriladi.

Prezidentimizning qarori asosida joriy yilda fermer xoʻjaliklarining paxta va gʻalladan qisqartirilgan 897 gektar maydonlarini 3 ming 588 ta dehqon xoʻjaliklari tashkil qilish uchun aholiga berish boʻyicha amaliy ishlar davom etmoqda.

Fursatdan foydalanib, amudaryolik barcha sohalar fidoyilarining “Inson qadrini ulugʻlash va faol mahalla yili” deb nomlangan 2022-yilda amalga oshirayotgan xayrli va masʼuliyatli ishlarida omad tilaymiz!

Aziz yurtdoshlar!

Shu kunlarda “Assalom, Navroʻz – yangilanish, mehr-oqibat va qadr-qimmat ayyomi!” degan gʻoyani oʻzida mujassam etgan holda Navroʻz bayramini keng nishonlamoqdamiz. Shunday qutlugʻ kunlarda avvalo milliyligimizning himoyachisi, ozodligimizning asosi boʻlmish mustaqilligimiz abadiy boʻlishini Yaratgandan soʻraymiz. Dunyoning turli burchaklarida notinchliklar davom etayotgan bugungi kunda yurtimiz tinch, osmonimiz musaffo, xalqimiz omon va turmushimiz farovon boʻlishini soʻrab duoga qoʻl ochgan otaxon va onaxonlarimizning tilaklari ijobat boʻlsin!

Kelasi Navroʻz bayramlariga ham barchamizni tinchlik-omonlikda, sogʻ-salomat yetkazsin!

Buyuk bobomiz Alisher Navoiy aytganlaridek, har tunimiz qadr kechasi kabi barakali, har kunimiz Navroʻz kabi quvonch va shodliklarga toʻla boʻlsin!

Navroʻz bayrami barchangizga muborak boʻlsin, aziz yurtdoshlar!