“Янги Ўзбекистон, ёш авлодлар – сенга зўр қанот!” шиори остида тадбирлар ташкил қилинди

Бугунги кунда ёшларнинг бўш вақтини мазмунли ўтказиш долзарб масала ҳисобланади. Ёшлар қанчалик маънавий баркамол бўлса, турли ёт иллатларга қарши иммунитети ҳам шунча кучли бўлади. Ушбу мақсадлар ва вазифалардан келиб чиққан ҳолда, қолаверса муҳтарам Президентимиз томонидан қабул қилинган фармон ва қарорлар ҳужжатлари ижросини таъминлаш мақсадида Амударё туманида кўплаб тадбирлар бўлиб ўтмоқда.

Жумладан, 16 март куни “Беш муҳим ташаббус” доирасида Манғит шаҳрининг Олмазор маҳалласи ҳудудида спорт мусобақалари, “Заковат” интеллектуал ўйинлари, истеъдодли ёшларнинг кўргазмалари ташкил этилиб, ёшларнинг бўш вақтлари мазмунли ва унумли ўтишига ҳисса қўшилди.

Эрталабдан бошланган спорт тадбирларида 1-сектор ҳудудидаги 12 та маҳалла ёшлари иштирок этишиб, ўз маҳалласи шаънини ҳимоя қилишди. Тадбир давомида бўлиб ўтган спорт мусобақалари ва интеллектуал ўйинлар “Янги Ўзбекистон, ёш авлодлар – сенга зўр қанот!” шиори остида ўтказилиб, унда жами 1 минг 267 нафар уюшмаган ёшлар қамраб олинди.

Дастлаб, туман марказий ўйингоҳида “Саломатлик учун беш минг қадам” шиори остида пиёда юриш марафони бўлиб ўтди. Шундан сўнг, ёшлар  эрталабки бадантарбия машқларида қатнашишди.

Шунингдек, эрталабдан туман марказидаги сув спорти саройида старт олган сузиш мусобақасига ҳар бир маҳалладан 1 нафар иштирокчи қаташди. Мусобақада 1-ўринни Шуҳрат Ҳожибоев, 2-ўринни Шаҳзод Ибадуллаев, 3-ўринни Камолиддин Кенжабоевлар эгаллашди.

Мини футбол бўйича жамоалар учрашуви муросасиз тарзда кечди. Мусобақада 1-ўринни Назархонлик ёшлар эгаллаган бўлса, 2-ўринни Ойбек маҳалласи ёшлари эгаллашди. 3-ўринга Босув маҳалласи ёшлари муносиб деб топилди. Шундан сўнг, Олмазор маҳалласи ҳудудидаги 82-сонли мактабда баскетбол мусобақаси бўлиб ўтди. 12 та маҳалладан ташриф буюрган жамоалар эпчиллик маҳоратларини синовдан ўтказишди. Учрашув натижаларига кўра 1-ўрин Тўлқин овули ёшларига насиб қилди. 2-ўринни Чўйкўл овули ёшлари ва 3-ўринни Олмазор маҳалласи ёшлари эгалладилар.

Шунингдек, 76-сонли мактабда валейбол мусобақаси ўтказилиб, мазкур мусобақада маҳалла йигитларидан ташкил топган жамоалар ўзаро беллашдилар. Мусобақа натижаларига кўра, 1-ўринни Олмазор маҳалласи ёшлари, 2-ўринни Қипчоқ шаҳарчаси ёшлари ва 3-ўринни уйшинлик ёшлар эгаллашди.

Бундан ташқари, спортнинг кураш тури бўйича ҳам беллашувлар ўтказилди.

Кун давомида ёшлар фақатгина спорт мусобақаларида қатнашиш билан чекланиб қолмадилар. Ёшлар ўз билимларини мустаҳкамлаш мақсадида 82-сонли мактабда ташкил қилинган  “Заковат” интеллектуал ўйинида ҳам иштирок этишди.

Куннинг иккинчи ярмида Олмазор маҳалласи ҳудудида жойлашган “Баркамол авлод” болалар мактабида қобилиятли  ёшларнинг кўргазмалари ташкил қилинди. Кўргазмага қўйилган санъат асарлари, ҳунармандчилик буюмлари, миллий чолғу асбоблари йиғилганлар этирофига сазовор бўлди.

Ёшлар кун давомида ўтказилган спорт мусобақаларида жисмонан чиниқиши билан биргаликда маънавий озуқа ҳам олдилар. Улар туманимизда янгидан бунёд этилган тарихий ўлкашунослик музейидa бўлиб, туманимиз ҳаётини ўзида акс эттирувчи осори-атиқалар билан яқиндан танишишди.

Тадбир якунида спорт мусобақаларида иштирок этган барча ғолиб жамоалар Ёшлар ишлари агентлиги туман бўлими, туман туризм ва спорт бўлими томонидан муносиб тақдирланди.

Туман ҳокимлигининг Ахборот хизмати