“Yangi Oʻzbekiston, yosh avlodlar – senga zoʻr qanot!” shiori ostida tadbirlar tashkil qilindi

Bugungi kunda yoshlarning boʻsh vaqtini mazmunli oʻtkazish dolzarb masala hisoblanadi. Yoshlar qanchalik maʼnaviy barkamol boʻlsa, turli yot illatlarga qarshi immuniteti ham shuncha kuchli boʻladi. Ushbu maqsadlar va vazifalardan kelib chiqqan holda, qolaversa muhtaram Prezidentimiz tomonidan qabul qilingan farmon va qarorlar hujjatlari ijrosini taʼminlash maqsadida Amudaryo tumanida koʻplab tadbirlar boʻlib oʻtmoqda.

Jumladan, 16-mart kuni “Besh muhim tashabbus” doirasida Mangʻit shahrining Olmazor mahallasi hududida sport musobaqalari, “Zakovat” intellektual oʻyinlari, isteʼdodli yoshlarning koʻrgazmalari tashkil etilib, yoshlarning boʻsh vaqtlari mazmunli va unumli oʻtishiga hissa qoʻshildi.

Ertalabdan boshlangan sport tadbirlarida 1-sektor hududidagi 12 ta mahalla yoshlari ishtirok etishib, oʻz mahallasi shaʼnini himoya qilishdi. Tadbir davomida boʻlib oʻtgan sport musobaqalari va intellektual oʻyinlar “Yangi Oʻzbekiston, yosh avlodlar – senga zoʻr qanot!” shiori ostida oʻtkazilib, unda jami 1 ming 267 nafar uyushmagan yoshlar qamrab olindi.

Dastlab, tuman markaziy oʻyingohida “Salomatlik uchun besh ming qadam” shiori ostida piyoda yurish marafoni boʻlib oʻtdi. Shundan soʻng, yoshlar  ertalabki badantarbiya mashqlarida qatnashishdi.

Shuningdek, ertalabdan tuman markazidagi suv sporti saroyida start olgan suzish musobaqasiga har bir mahalladan 1 nafar ishtirokchi qatashdi. Musobaqada 1-oʻrinni Shuhrat Hojiboyev, 2-oʻrinni Shahzod Ibadullayev, 3-oʻrinni Kamoliddin Kenjaboyevlar egallashdi.

Mini futbol boʻyicha jamoalar uchrashuvi murosasiz tarzda kechdi. Musobaqada 1-oʻrinni Nazarxonlik yoshlar egallagan boʻlsa, 2-oʻrinni Oybek mahallasi yoshlari egallashdi. 3-oʻringa Bosuv mahallasi yoshlari munosib deb topildi. Shundan soʻng, Olmazor mahallasi hududidagi 82-sonli maktabda basketbol musobaqasi boʻlib oʻtdi. 12 ta mahalladan tashrif buyurgan jamoalar epchillik mahoratlarini sinovdan oʻtkazishdi. Uchrashuv natijalariga koʻra 1-oʻrin Toʻlqin ovuli yoshlariga nasib qildi. 2-oʻrinni Choʻykoʻl ovuli yoshlari va 3-oʻrinni Olmazor mahallasi yoshlari egalladilar.

Shuningdek, 76-sonli maktabda valeybol musobaqasi oʻtkazilib, mazkur musobaqada mahalla yigitlaridan tashkil topgan jamoalar oʻzaro bellashdilar. Musobaqa natijalariga koʻra, 1-oʻrinni Olmazor mahallasi yoshlari, 2-oʻrinni Qipchoq shaharchasi yoshlari va 3-oʻrinni uyshinlik yoshlar egallashdi.

Bundan tashqari, sportning kurash turi boʻyicha ham bellashuvlar oʻtkazildi.

Kun davomida yoshlar faqatgina sport musobaqalarida qatnashish bilan cheklanib qolmadilar. Yoshlar oʻz bilimlarini mustahkamlash maqsadida 82-sonli maktabda tashkil qilingan  “Zakovat” intellektual oʻyinida ham ishtirok etishdi.

Kunning ikkinchi yarmida Olmazor mahallasi hududida joylashgan “Barkamol avlod” bolalar maktabida qobiliyatli  yoshlarning koʻrgazmalari tashkil qilindi. Koʻrgazmaga qoʻyilgan sanʼat asarlari, hunarmandchilik buyumlari, milliy cholgʻu asboblari yigʻilganlar etirofiga sazovor boʻldi.

Yoshlar kun davomida oʻtkazilgan sport musobaqalarida jismonan chiniqishi bilan birgalikda maʼnaviy ozuqa ham oldilar. Ular tumanimizda yangidan bunyod etilgan tarixiy oʻlkashunoslik muzeyida boʻlib, tumanimiz hayotini oʻzida aks ettiruvchi osori-atiqalar bilan yaqindan tanishishdi.

Tadbir yakunida sport musobaqalarida ishtirok etgan barcha gʻolib jamoalar Yoshlar ishlari agentligi tuman boʻlimi, tuman turizm va sport boʻlimi tomonidan munosib taqdirlandi.

Tuman hokimligining Axborot xizmati