ДЕПУТАТ БИЛАН УЧРАШУВДА КЎПЛАБ МУАММОЛАР ЎЗ ЕЧИМИНИ ТОПМОҚДА
Қорақалпоғистон Республикасидаги барча даражадаги депутатларнинг фаоллигини янада ошириш мақсадида 9 мартдан 19 мартгача ўтказилаётган депутатлар фаолиятида “Долзарб 10 кунлик” доирасида 32-Қиличбой сайлов округидан Қорақалпоғистон Республикаси Жўқорғи Кенгеси депутати Санобар Хўжамуратова Халқ депутатлари Амударё туман Кенгаши депутати Баҳром Қодиров билан биргаликдаги 11 март куни Қиличбой овулида истиқомат қилувчи сайловчилари билан учрашди.
Депутат билан учрашув овулдаги Қўчқорбой Нуримовнинг томорқасида ташкил этилиб, унда Қиличбой овули фаоллари ва ёшлар иштирок этдилар.
Учашувда депутат Санобар Хўжамуратова сайловчиларга Президентимизнинг Қорақалпоғистонга ташрифи, ижтимоий-сиёсий ҳаётдаги ўзгаришлар, мамлакатимизда, хусусан, Амударё туманида ёшлар ва хотин-қизларга яратилаётган шароитлар, қишлоқларда томорқа хўжалиги, ёшлар ва аёллар тадбиркорлигини ривожлантириш бўйича амалга оширилаётган кенг кўламли ислоҳотлар ҳақида гапириб берди.
Санобар Хўжамуратова сайловчилар билан мулоқот қилиш ва уларнинг томорқа хўжалигини юритиш бўйича муаммоларини ўрганиш жараёнида Тараққиёт стратегиясида белгиланган устувор вазифаларга ҳам батафсил тўхталди. Ана шу устувор вазифалардан келиб чиқиб, сайловчилар билан учрашув жойининг қиличбойлик моҳир томорқа ер эгаси Қўчқорбой Нуримов томорқа хўжалигида ташкил этилганига алоҳида урғу берди. У маҳалладошлари орасида ўз ҳалол ва фидойи меҳнати, тадбиркорлиги билан эътибор ва обрў топган Қўчқорбой Нуримов эришаётган ютуқларни ёшларга ибрат қилиб кўрсатди.
Расмиятчиликдан холи тарзда ташкиллаштирилган учрашувда депутат мўъжазгина томорқадан йилнинг тўрт фаслида ҳам унумли фойдаланиб, ўзи ва барча оила аъзолари бандлигини таъминлаган Қўчқорбой Нуримовнинг тажрибаларини ёшлар ўртасида кенг оммалаштириш юзасидан зарур тавсиялар берди. Учрашувда сайловчилар, асосан деҳқончилик учун баҳорги экиш-тикиш ишларида зарур бўладиган биоорганик маҳсулотлар етишмовчилиги, аукцион орқали ер олиш, микрокредитлар ажратиш борасида ҳамда ўзларини қизиқтирган бошқа масалалар бўйича мурожаат қилдилар.
Овул ёшларидан Раъно Раҳимбоева томорқа хўжалигини юритиш учун органик ўғит олишни режалаштиргани, лекин ҳужжатларни расмийлаштиришда ҳуқуқий ёрдам зарурлигини айтиб, ушбу масалада ёрдам беришни сўради. Унинг мурожаати овул фуқаролар йиғинида фаолият олиб бораётган ҳоким ёрдамчиси Муроджон Болтаев томонидан рўйхатга олиниб, тез фурсатларда бу муаммони бартараф этишга келишиб олинди.
Шунингдек, Шоҳиста Эшимметовнинг деҳқончилик қилиш учун ер ажратиб беришни сўраб қилган мурожаати ҳам шу ернинг ўзида атрофлича ўрганиб чиқилиб, аукционга қўйилган ерлар ҳисобидан 25 сотих ер олиши мумкинлиги ва аукционда иштирок этиш тартиб-қоидалари тўғрисида зарур тушунчалар берилди.
Учрашувдан кейин депутат Санобар Хўжамуратова халқ депутатлари Амударё туман Кенгаши депутати Баҳром Қодиров билан биргаликда овулдаги кекса ва бемор онахонлар ҳолидан ҳам хабар олдилар.
Депутатлар 84 ёшли бемор онахон Салима Ҳайитбоева хонадонида бўлишиб, онахоннинг оиласидаги муаммоларни ўргандилар ва онахоннинг мурожаатига кўра, унга қараётган қизи Саида Ҳайитбоевага бемор онасининг парваришига масъул эканлиги тўғрисидаги ҳужжатларни расмийлаштириш ва бюджетдан ташқари Пенсия жамғармасига топшириш бўйича масъул ташкилотларга Саида Ҳайитбоеванинг бемор онасига қараб турган даври меҳнат стажига ҳисобланиши тўғрисида депутат сўрови киритиш бўйича келишиб олинди.
Депутатлар ҳудуддаги 15-сонли умумтаълим мактабининг уйда таълим олаётган 8 нафар ўқувчилари ҳолидан хабар олишиб, уларга берилаётган таълим сифати билан ҳам яқиндан танишдилар ҳамда бу ўқувчиларга мамлакатимизда таълим соҳасига қаратилаётган эътибор, ногиронлиги бўлган ўқувчи-ёшларнинг олий таълим муассасаларида таълим олишлари, ўз орзуларини рўёбга чиқаришлари учун яратилаётган имтиёзлар хусусида маълумот бериб, уларни янги орзулар, илм олиш, ҳунар эгаллаш, кучли тадбиркор бўлиш сари руҳлантирдилар.
Робия ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
