Қорамон маҳалласида фаол аёл-қизлар учун байрам тадбири ташкил қилинди

Бугунги кунда жамиятимизда аёлларнинг салоҳиятини юзага чиқариш, уларнинг баркамол авлодни тарбиялашдаги ролини ошириш, барча жабҳаларда амалга оширилаётган кенг қамровли ислоҳотларда фаол иштирокини таъминлаш давлатимиз сиёсатининг устувор йўналишларидан бирига айланди. Натижада оила тақдири, хотин-қизлар келажаги ҳамда уларнинг жисмоний ва маънавий жиҳатдан баркамолллигини таъминлашга эътибор кучайди. Чунки Аёл – нафосат ва гўзаллик тимсоли. Унинг меҳридан олам нурга тўлади. Дунёда аёлнинг оила, фарзанд тарбиясидаги ролини ўлчайдиган мезоннинг ўзи йўқ. Жамики эзгуликлар аёлдан бошланади. Ҳаётимизга мазмун бағишлайдиган, одамийлик, мардлик, олижаноблик, сабр-тоқат, садоқат соҳибаси бўлмиш аёллар ҳар қанча эътибор-у эҳтиромларга лойиқдир.

Юртимизла ҳар йили 8 март – Халқаро хотин-қизлар кунининг улкан байрам қилиниши ҳам ана шундай мўътабар зотларга ҳурмат-эҳтиром ифодасидир.

Туманимизда ушбу байрам улкан тантана қилинди, барча таълим муассасаларида, меҳнат жамоаларида, овул ва маҳаллаларда турли маданий тадбирлар, кўнгилочар томошалар бўлиб ўтди.

Қорамон маҳалласида ҳам фарзандларига яхши тарбия бериб, комил инсонлар қилиб вояга етказаётган онахонлар, ибратли ҳаёт йўлини босиб ўтган нуроний онахонлар, элга фидойи хизмат қилаётган хотин-қизлар кўпчиликни ташкил этади. Маҳалланинг ана шундай 92 нафар аёл-қизлари учун байрам арафасида маданий тадбир ташкил этилди.

Ҳудуддаги 23-сонли мактаб фаоллар залида 8 март куни ташкиллаштирилган тадбирда маҳалла оқсоқоли Мурот Абдуллаев йиғилганларни байрам билан қизғин қутлади, уларнинг маҳалла фаоли сифатидаги фаолиятига улкан баҳо бериб, келгусидаги ишларига ҳам муваффақиятлар тилади.

Тадбирда туман Маҳалла ва оилани қўллаб-қувватлаш бўлими ходими Раҳмонбек Бобожонов ҳам Қорамон маҳалласи фаол аёл-қизларини байрам билан қизғин муборакбод этди.

Табриклардан сўнг тадбир иштирокчиларига байрам совғалари топширилди. Ўзларига қаратилаётган бунингдек эътибордан хурсанд бўлган меҳмонлар тўкин дастурхон атрофида дилдан суҳбат қурдилар, шўх ва дилтортар қўшиқлар, куйлар тинглаб, маданий дам олдилар, шодликларини ажойиб рақслари билан ифода этдилар. Шунингдек, тадбир ташкилотчилари – маҳалла фуқаролар йиғини ходимларига, ҳомийлар - ҳудуднинг 8 нафар фермер хўжаликлари раисларига чуқур миннатдорчилик билдирдилар.

Бундай тадбирлар туманимизнинг барча шаҳарча, овул ва маҳаллаларида ҳам ўтказилмоқда.

1910 йилда Копенгагенда бўлиб ўтган халқаро конференцияда 8 мартни Халқаро хотин-қизлар куни сифатида нишонлаш, уларга ҳам эркаклар билан тенг ҳуқуқлар берилиши, муносиб меҳнат шароити яратилиши таклифи ўртага ташланган эди. Бу таклиф турли мамлакатларда турли йилларда амалга оширилди ва 1965 йилдан бери дам олиш куни ҳисобланади.

Сана бугунги кунда мамлакатимизда аёл-қизларни қадрлаш, ҳурматлаш, эъзозлаш куни сифатида нишонланади ва барча аёл-қизларга улкан шодликлар ҳадя этади.

Ойгул РАЖАБОВА.