Qoramon mahallasida faol ayol-qizlar uchun bayram tadbiri tashkil qilindi

Bugungi kunda jamiyatimizda ayollarning salohiyatini yuzaga chiqarish, ularning barkamol avlodni tarbiyalashdagi rolini oshirish, barcha jabhalarda amalga oshirilayotgan keng qamrovli islohotlarda faol ishtirokini taʼminlash davlatimiz siyosatining ustuvor yoʻnalishlaridan biriga aylandi. Natijada oila taqdiri, xotin-qizlar kelajagi hamda ularning jismoniy va maʼnaviy jihatdan barkamollligini taʼminlashga eʼtibor kuchaydi. Chunki Ayol – nafosat va goʻzallik timsoli. Uning mehridan olam nurga toʻladi. Dunyoda ayolning oila, farzand tarbiyasidagi rolini oʻlchaydigan mezonning oʻzi yoʻq. Jamiki ezguliklar ayoldan boshlanadi. Hayotimizga mazmun bagʻishlaydigan, odamiylik, mardlik, olijanoblik, sabr-toqat, sadoqat sohibasi boʻlmish ayollar har qancha eʼtibor-u ehtiromlarga loyiqdir.

Yurtimizla har yili 8-mart – Xalqaro xotin-qizlar kunining ulkan bayram qilinishi ham ana shunday moʻʼtabar zotlarga hurmat-ehtirom ifodasidir.

Tumanimizda ushbu bayram ulkan tantana qilindi, barcha taʼlim muassasalarida, mehnat jamoalarida, ovul va mahallalarda turli madaniy tadbirlar, koʻngilochar tomoshalar boʻlib oʻtdi.

Qoramon mahallasida ham farzandlariga yaxshi tarbiya berib, komil insonlar qilib voyaga yetkazayotgan onaxonlar, ibratli hayot yoʻlini bosib oʻtgan nuroniy onaxonlar, elga fidoyi xizmat qilayotgan xotin-qizlar koʻpchilikni tashkil etadi. Mahallaning ana shunday 92 nafar ayol-qizlari uchun bayram arafasida madaniy tadbir tashkil etildi.

Hududdagi 23-sonli maktab faollar zalida 8-mart kuni tashkillashtirilgan tadbirda mahalla oqsoqoli Murot Abdullayev yigʻilganlarni bayram bilan qizgʻin qutladi, ularning mahalla faoli sifatidagi faoliyatiga ulkan baho berib, kelgusidagi ishlariga ham muvaffaqiyatlar tiladi.

Tadbirda tuman Mahalla va oilani qoʻllab-quvvatlash boʻlimi xodimi Rahmonbek Bobojonov ham Qoramon mahallasi faol ayol-qizlarini bayram bilan qizgʻin muborakbod etdi.

Tabriklardan soʻng tadbir ishtirokchilariga bayram sovgʻalari topshirildi. Oʻzlariga qaratilayotgan buningdek eʼtibordan xursand boʻlgan mehmonlar toʻkin dasturxon atrofida dildan suhbat qurdilar, shoʻx va diltortar qoʻshiqlar, kuylar tinglab, madaniy dam oldilar, shodliklarini ajoyib raqslari bilan ifoda etdilar. Shuningdek, tadbir tashkilotchilari – mahalla fuqarolar yigʻini xodimlariga, homiylar - hududning 8 nafar fermer xoʻjaliklari raislariga chuqur minnatdorchilik bildirdilar.

Bunday tadbirlar tumanimizning barcha shaharcha, ovul va mahallalarida ham oʻtkazilmoqda.

1910-yilda Kopengagenda boʻlib oʻtgan xalqaro konferentsiyada 8-martni Xalqaro xotin-qizlar kuni sifatida nishonlash, ularga ham erkaklar bilan teng huquqlar berilishi, munosib mehnat sharoiti yaratilishi taklifi oʻrtaga tashlangan edi. Bu taklif turli mamlakatlarda turli yillarda amalga oshirildi va 1965-yildan beri dam olish kuni hisoblanadi.

Sana bugungi kunda mamlakatimizda ayol-qizlarni qadrlash, hurmatlash, eʼzozlash kuni sifatida nishonlanadi va barcha ayol-qizlarga ulkan shodliklar hadya etadi.

Oygul RAJABOVA.