«ХОРИЖИЙ ТИЛЛАРНИ ЎҚИТИШ БЎЙИЧА ЭНГ ЯХШИ МАКТАБ» ТАНЛОВИНИНГ ТУМАН БОСҚИЧИ БЎЛИБ ЎТДИ

Президентимизнинг «Ўзбекистон Республикасида хорижий тилларни ўрганишни оммалаштириш фаолиятини сифат жиҳатидан янги босқичга олиб чиқиш чора-тадбирлари тўғрисида»ги Қарорига асосан «Хорижий тилларни ўқитиш бўйича энг яхши мактаб» танловининг Амударё тумани босқичи ўтказилди.

Жорий йилнинг 4 март куни 40-сонли мактабда туман Халқ таълими бўлими томонидан таълим муассасалари ўртасида соғлом рақобат муҳитини шакллантириш, уларда хорижий тилларни ўқитишнинг даражаси ва сифатини оширишни рағбатлантириш, ўқитиш сифати бўйича халқаро мезон ва стандартларга мувофиқ юқори кўрсаткичларга эришишга замин яратиш мақсадида ўтказилган ушбу танловда 71 та умумтаълим мактабларидан 336 нафар ўқувчи иштирок этди.

Танловнинг Низомида асосан ҳар бир мактабдан битта чет тили, яъни инглиз, немис, француз тилларидан бири бўйича 7-9-синфларда таҳсил оладиган 5 нафар ўқувчидан ташкил топган битта терма жамоа қатнашиши кераклиги белгилаб қўйилган. Шунга кўра танловда иштирок этиш истагини билдирган ушбу 71 та мактаб 2021 йилнинг сентябрь-декабрь ойларида Ўзбекистон Республкаси Халқ таълими вазирлигининг ахборот тизимига Вазирлик томонидан белгиланган асосий кўрсаткичларини киритиб, тизим томонидан баҳоланган эди.

Шу куни танловда мактаб терма жамоасининг хорижий тилларни билиш даражаси тест топшириқлари воситасида синовдан ўтказилди. Тест синовлари барча туман ва шаҳарларда бир вақтда соат 11:00 да бошланди ва ечиш учун 90 дақиқа вақт ажратилиб, синовлар соат 12:30 да якунланди.

Хорижий тил билиш даражасини аниқлашга қаратилган тест топшириқлари 7-9-синф ўқувчилари учун мўлжалланган бўлиб, халқаро таълим стандартлари асосида тайёрланган 30 та топшириқдан иборат. Мактаб терма жамоаси аъзолари тўплаган жами балларни 5 га бўлган ҳолда аниқланди ва асосий кўрсаткичларга қўйилган баллар қўшилган ҳолда мактабнинг умумий натижаси чиқарилди.

Ушбу танловни ўтказишдан асосий мақсад – мактабларда хорижий тилларни ўқитиш бўйича амалга оширилаётган чора-тадбирлар натижадорлигини таҳлил қилиш, хорижий тиллар бўйича ўқувчиларга сифатли таълим бераётган, самарали фаолият олиб бораётган ўқитувчиларни аниқлаш ва рағбатлантиришдан иборат. Шунингдек, мактабларда хорижий тилларни ўргатиш бўйича кўрсатилаётган таълим хизматлари сифати ва самарадорлигини ошириш, уларда амалга оширилаётган ишлар ва эришилаётган натижалар тўғрисида кенг жамоатчиликни холис ахборотлар билан таъминлаш режалаштирилган. Ундан ташқари, танловда юқори кўрсаткичларни қайд этган мактабларни рағбатлантириш, уларнинг тажрибасини оммалаштириш ҳам кўзда тутилган.

Танлов ғолиблари Ўзбекистон Республикаси Президенти соврини билан мукофотланади. Туман босқичидаги 1-ўрин учун — 100 миллион сўм, 2-ўрин учун — 75 миллион сўм, 3-ўрин учун — 50 миллион сўм пул мукофотлари туман маҳаллий бюджетлари ҳисобидан берилади. Қорақалпоғистон Республикаси, вилоятлар ва Тошкент шаҳар босқичидаги 1-ўрин учун — 250 миллион сўм, 2-ўрин учун — 200 миллион сўм, 3-ўрин учун — 150 миллион сўм берилиши кўзда тутилган. Республика босқичида 1-ўрин учун — 500 миллион сўм, 2-ўрин учун — 400 миллион сўм, 3-ўрин ўрин учун — 300 миллион сўм пул маблағлари ажратилади.

Танловнинг туман босқичида умумий натижага кўра энг юқори балл тўплаган мактаблар баллар кетма-кетлигига кўра 1-ўринни 40-сонли мактаб, 2-ўринни 56-сонли мактаб, 3-ўринни 32-сонли мактаблар жамоалари қўлга киритди. Туман босқичида 1-ўринни кўлга киритган 40-сонли мактаб жамоаси танловнинг Қорақалпоғистон Республикаси босқичида қатнашиш имкониятига эга бўлди.

Туман ҳокимлигининг ахборот хизмати