«XORIJIY TILLARNI OʻQITISh BOʻYIChA ENG YaXShI MAKTAB» TANLOVINING TUMAN BOSQIChI BOʻLIB OʻTDI

Prezidentimizning «Oʻzbekiston Respublikasida xorijiy tillarni oʻrganishni ommalashtirish faoliyatini sifat jihatidan yangi bosqichga olib chiqish chora-tadbirlari toʻgʻrisida»gi Qaroriga asosan «Xorijiy tillarni oʻqitish boʻyicha eng yaxshi maktab» tanlovining Amudaryo tumani bosqichi oʻtkazildi.

Joriy yilning 4-mart kuni 40-sonli maktabda tuman Xalq taʼlimi boʻlimi tomonidan taʼlim muassasalari oʻrtasida sogʻlom raqobat muhitini shakllantirish, ularda xorijiy tillarni oʻqitishning darajasi va sifatini oshirishni ragʻbatlantirish, oʻqitish sifati boʻyicha xalqaro mezon va standartlarga muvofiq yuqori koʻrsatkichlarga erishishga zamin yaratish maqsadida oʻtkazilgan ushbu tanlovda 71 ta umumtaʼlim maktablaridan 336 nafar oʻquvchi ishtirok etdi.

Tanlovning Nizomida asosan har bir maktabdan bitta chet tili, yaʼni ingliz, nemis, frantsuz tillaridan biri boʻyicha 7-9-sinflarda tahsil oladigan 5 nafar oʻquvchidan tashkil topgan bitta terma jamoa qatnashishi kerakligi belgilab qoʻyilgan. Shunga koʻra tanlovda ishtirok etish istagini bildirgan ushbu 71 ta maktab 2021-yilning sentyabr-dekabr oylarida Oʻzbekiston Respublkasi Xalq taʼlimi vazirligining axborot tizimiga Vazirlik tomonidan belgilangan asosiy koʻrsatkichlarini kiritib, tizim tomonidan baholangan edi.

Shu kuni tanlovda maktab terma jamoasining xorijiy tillarni bilish darajasi test topshiriqlari vositasida sinovdan oʻtkazildi. Test sinovlari barcha tuman va shaharlarda bir vaqtda soat 11:00 da boshlandi va yechish uchun 90 daqiqa vaqt ajratilib, sinovlar soat 12:30 da yakunlandi.

Xorijiy til bilish darajasini aniqlashga qaratilgan test topshiriqlari 7-9-sinf oʻquvchilari uchun moʻljallangan boʻlib, xalqaro taʼlim standartlari asosida tayyorlangan 30 ta topshiriqdan iborat. Maktab terma jamoasi aʼzolari toʻplagan jami ballarni 5 ga boʻlgan holda aniqlandi va asosiy koʻrsatkichlarga qoʻyilgan ballar qoʻshilgan holda maktabning umumiy natijasi chiqarildi.

Ushbu tanlovni oʻtkazishdan asosiy maqsad – maktablarda xorijiy tillarni oʻqitish boʻyicha amalga oshirilayotgan chora-tadbirlar natijadorligini tahlil qilish, xorijiy tillar boʻyicha oʻquvchilarga sifatli taʼlim berayotgan, samarali faoliyat olib borayotgan oʻqituvchilarni aniqlash va ragʻbatlantirishdan iborat. Shuningdek, maktablarda xorijiy tillarni oʻrgatish boʻyicha koʻrsatilayotgan taʼlim xizmatlari sifati va samaradorligini oshirish, ularda amalga oshirilayotgan ishlar va erishilayotgan natijalar toʻgʻrisida keng jamoatchilikni xolis axborotlar bilan taʼminlash rejalashtirilgan. Undan tashqari, tanlovda yuqori koʻrsatkichlarni qayd etgan maktablarni ragʻbatlantirish, ularning tajribasini ommalashtirish ham koʻzda tutilgan.

Tanlov gʻoliblari Oʻzbekiston Respublikasi Prezidenti sovrini bilan mukofotlanadi. Tuman bosqichidagi 1-oʻrin uchun — 100 million soʻm, 2-oʻrin uchun — 75 million soʻm, 3-oʻrin uchun — 50 million soʻm pul mukofotlari tuman mahalliy byudjetlari hisobidan beriladi. Qoraqalpogʻiston Respublikasi, viloyatlar va Toshkent shahar bosqichidagi 1-oʻrin uchun — 250 million soʻm, 2-oʻrin uchun — 200 million soʻm, 3-oʻrin uchun — 150 million soʻm berilishi koʻzda tutilgan. Respublika bosqichida 1-oʻrin uchun — 500 million soʻm, 2-oʻrin uchun — 400 million soʻm, 3-oʻrin oʻrin uchun — 300 million soʻm pul mablagʻlari ajratiladi.

Tanlovning tuman bosqichida umumiy natijaga koʻra eng yuqori ball toʻplagan maktablar ballar ketma-ketligiga koʻra 1-oʻrinni 40-sonli maktab, 2-oʻrinni 56-sonli maktab, 3-oʻrinni 32-sonli maktablar jamoalari qoʻlga kiritdi. Tuman bosqichida 1-oʻrinni koʻlga kiritgan 40-sonli maktab jamoasi tanlovning Qoraqalpogʻiston Respublikasi bosqichida qatnashish imkoniyatiga ega boʻldi.

Tuman hokimligining axborot xizmati