Амударё туман ҳокими C.Йўлдашевнинг 8 март – Халқаро хотин-қизлар куни муносабати билан табриги

Муҳтарама онахонлар, қадрли опа-сингиллар!

Аввало, Сиз азизларни, сизлар орқали барча туманимиз аёлларини 8 март – Халқаро хотин-қизлар куни байрами билан чин қалбимдан самимий табриклайман!

Тарихимизга назар соладиган бўлсак оналарни, аёл зотини эъзозлаш эл-юртимиз учун азал-азалдан эзгу қадрият бўлиб келган. Одамзот онгли ҳаёт бошлаган кундан бери инсоният аёл зотига ихлос қўйиб, уни севиб, ардоқлаб келади. Аёлни эъзозлаш, унга эҳтиром кўрсатиш ўзбек халқига хос олижаноб хислатлардан биридир. 

Ҳақиқатан ҳам, гўзаллик ва нафосат, меҳру муҳаббат, вафо ва назокат рамзи бўлган, ўзининг меҳрибонлиги, қалб саховати билан ҳар қайси оилани оила қиладиган, унга файз-у тароват берадиган, фарзандларимиз юрагига ўз она юртига севги ва садоқат туйғусини сингдирадиган аёлларимизнинг бетакрор фазилатлари ҳақида ҳар қанча гапирсак, уларни ҳар қанча эъзозласак, арзийди.

Ҳадиси шарифларда айтилганидек, “Жаннат оналарнинг оёғи остидадир”. Буюк мутафаккир бобомиз Алишер Навоийнинг “Аёллар – фаришталарнинг опа-сингилларидир” деган сўзлари замирида ҳам нақадар чуқур ҳаётий фалсафа мужассам эканини англаш қийин эмас.

Ҳурматли Президентимиз томонидан аёлларнинг жамиятдаги ўрни ва мавқеига юқори баҳо берилиб, уларнинг ҳуқуқ ва манфаатларини ҳимоя қилиш, хотин-қизларимизнинг билимдон, замонавий мутахассис, малакали касб эгалари бўлишлари ҳамда соғлом ва мустаҳкам оила қуришлари учун зарур шарт-шароитлар яратиш борасида мамлакатимизда кенг кўламли ислоҳотлар олиб борилмоқда.

Президентимиз ташаббуслари билан яқиндагина “Хотин-қизлар ва оила ишлари қўмитаси” ташкил этилиши, магистратурада ўқиётган қизларнинг контракт пуллари бюджетдан, эҳтиёжманд оилалар қизларининг контракт пуллари эса маҳаллий бюджетлардан тўлиқ қоплаб берилиши, хусусий секторда расмий ишлаётган аёлларга ҳомиладорлик нафақасини давлат томонидан тўлаб бериш тизими яратилганлиги ва бошқа кўплаб мисоллар фикримизнинг исботидир.

Бир сўз билан айтганда, бугун юртимизда аёлларни эъзозлаш ва ардоқлаш, уларнинг ҳуқуқ ва манфаатларини ҳимоя қилиш борасида амалга оширилаётган кенг кўламли ишлар ҳеч қачон давлатимиз ва жамиятимизнинг диққат марказидан четда қолмайди.

Туманимизда ҳам илғор ва жонкуяр аёлларимиз ўзларнинг бор куч-ғайрати ва шижоати билан давлатимиз равнақи ва халқимиз фаровонлиги йўлида фидойилик билан меҳнат қилмоқдалар. Бугун оила ва жамият, таълим ва тиббиёт, тадбиркорлик ва ишбилармонлик, қишлоқ хўжалиги, маданият ва санъат, қўйингки, қайси соҳани олиб қарамайлик, ўз касбининг ҳақиқий эгаси, ўз соҳасининг билимдони бўлган фаол аёлларни барчага ўрнак ва намуна қилиб кўрсатиш мумкин. Дилбар ва латофатли қизларимиз эса илм-фанда, спортда, маданият ва бошқа кўплаб соҳаларда ўзларининг куч-ғайрати, ақл-заковати билан юксак натижаларга эришмоқдалар. Нуроний онахонларимиз ва момоларимизнинг панд-насиҳатлари, йўл-йўриқ ва ҳаётий тавсиялари эса ёшларимизнинг эртанги кунини, ҳаёт йўлини ёритувчи чироқ вазифасини ўтамоқда.

Фурсатдан фойдаланиб, уларнинг барчасига давлат ва жамият ишларида, илм-фанда, оиласида ҳамда ҳаётда улкан муваффақиятлар тилаб қоламиз.

Азиз ва муҳтарама онахонлар! Дилбар қизлар ва мунис опа-сингиллар!

Сизларни яна бир марта ўзингиз каби гўзал баҳор фаслининг илк байрами – 8 март – халқаро хотин-қизлар куни билан яна бир бор чин қалбимдан қутлаб, барчангизга сиҳат-саломатлик, оилаларингизга тинчлик-хотиржамлик, файзу барака тилайман.

Доимо яқинларингиз, фарзанд ва набираларингиз, эл-юртимиз ардоғида юриш насиб этсин!

Умрингиз узоқ, бахтингиз зиёда бўлсин!

Байрамингиз муборак бўлсин!

Султонбой Йўлдошев, Амударё тумани ҳокими.