Amudaryo tuman hokimi C.Yoʻldashevning 8-mart – Xalqaro xotin-qizlar kuni munosabati bilan tabrigi

Muhtarama onaxonlar, qadrli opa-singillar!

Avvalo, Siz azizlarni, sizlar orqali barcha tumanimiz ayollarini 8-mart – Xalqaro xotin-qizlar kuni bayrami bilan chin qalbimdan samimiy tabriklayman!

Tariximizga nazar soladigan boʻlsak onalarni, ayol zotini eʼzozlash el-yurtimiz uchun azal-azaldan ezgu qadriyat boʻlib kelgan. Odamzot ongli hayot boshlagan kundan beri insoniyat ayol zotiga ixlos qoʻyib, uni sevib, ardoqlab keladi. Ayolni eʼzozlash, unga ehtirom koʻrsatish oʻzbek xalqiga xos olijanob xislatlardan biridir. 

Haqiqatan ham, goʻzallik va nafosat, mehru muhabbat, vafo va nazokat ramzi boʻlgan, oʻzining mehribonligi, qalb saxovati bilan har qaysi oilani oila qiladigan, unga fayz-u tarovat beradigan, farzandlarimiz yuragiga oʻz ona yurtiga sevgi va sadoqat tuygʻusini singdiradigan ayollarimizning betakror fazilatlari haqida har qancha gapirsak, ularni har qancha eʼzozlasak, arziydi.

Hadisi shariflarda aytilganidek, “Jannat onalarning oyogʻi ostidadir”. Buyuk mutafakkir bobomiz Alisher Navoiyning “Ayollar – farishtalarning opa-singillaridir” degan soʻzlari zamirida ham naqadar chuqur hayotiy falsafa mujassam ekanini anglash qiyin emas.

Hurmatli Prezidentimiz tomonidan ayollarning jamiyatdagi oʻrni va mavqeiga yuqori baho berilib, ularning huquq va manfaatlarini himoya qilish, xotin-qizlarimizning bilimdon, zamonaviy mutaxassis, malakali kasb egalari boʻlishlari hamda sogʻlom va mustahkam oila qurishlari uchun zarur shart-sharoitlar yaratish borasida mamlakatimizda keng koʻlamli islohotlar olib borilmoqda.

Prezidentimiz tashabbuslari bilan yaqindagina “Xotin-qizlar va oila ishlari qoʻmitasi” tashkil etilishi, magistraturada oʻqiyotgan qizlarning kontrakt pullari byudjetdan, ehtiyojmand oilalar qizlarining kontrakt pullari esa mahalliy byudjetlardan toʻliq qoplab berilishi, xususiy sektorda rasmiy ishlayotgan ayollarga homiladorlik nafaqasini davlat tomonidan toʻlab berish tizimi yaratilganligi va boshqa koʻplab misollar fikrimizning isbotidir.

Bir soʻz bilan aytganda, bugun yurtimizda ayollarni eʼzozlash va ardoqlash, ularning huquq va manfaatlarini himoya qilish borasida amalga oshirilayotgan keng koʻlamli ishlar hech qachon davlatimiz va jamiyatimizning diqqat markazidan chetda qolmaydi.

Tumanimizda ham ilgʻor va jonkuyar ayollarimiz oʻzlarning bor kuch-gʻayrati va shijoati bilan davlatimiz ravnaqi va xalqimiz farovonligi yoʻlida fidoyilik bilan mehnat qilmoqdalar. Bugun oila va jamiyat, taʼlim va tibbiyot, tadbirkorlik va ishbilarmonlik, qishloq xoʻjaligi, madaniyat va sanʼat, qoʻyingki, qaysi sohani olib qaramaylik, oʻz kasbining haqiqiy egasi, oʻz sohasining bilimdoni boʻlgan faol ayollarni barchaga oʻrnak va namuna qilib koʻrsatish mumkin. Dilbar va latofatli qizlarimiz esa ilm-fanda, sportda, madaniyat va boshqa koʻplab sohalarda oʻzlarining kuch-gʻayrati, aql-zakovati bilan yuksak natijalarga erishmoqdalar. Nuroniy onaxonlarimiz va momolarimizning pand-nasihatlari, yoʻl-yoʻriq va hayotiy tavsiyalari esa yoshlarimizning ertangi kunini, hayot yoʻlini yorituvchi chiroq vazifasini oʻtamoqda.

Fursatdan foydalanib, ularning barchasiga davlat va jamiyat ishlarida, ilm-fanda, oilasida hamda hayotda ulkan muvaffaqiyatlar tilab qolamiz.

Aziz va muhtarama onaxonlar! Dilbar qizlar va munis opa-singillar!

Sizlarni yana bir marta oʻzingiz kabi goʻzal bahor faslining ilk bayrami – 8-mart – xalqaro xotin-qizlar kuni bilan yana bir bor chin qalbimdan qutlab, barchangizga sihat-salomatlik, oilalaringizga tinchlik-xotirjamlik, fayzu baraka tilayman.

Doimo yaqinlaringiz, farzand va nabiralaringiz, el-yurtimiz ardogʻida yurish nasib etsin!

Umringiz uzoq, baxtingiz ziyoda boʻlsin!

Bayramingiz muborak boʻlsin!

Sultonboy Yoʻldoshev, Amudaryo tumani hokimi.