“Аёл-қизларни эъзозлаш ҳафталиги” доирасида ўқитувчи аёл-қизлар ўртасида спорт мусобақалари ўтказилди

Халқаро хотин-қизлар куни байрами олдидан аёл-қизлар ўртасида турли спорт мусобақалари, кзрик-танловлар ўтказиш яхши анъанага айланган. Зеро, аёлларнинг жамият ва давлат ишларида иштирокини кучайтириш, ижтимоий фаоллигини ошириш давлатимиз сиёсатининг устувор йўналишидир. Президентимиз раислигида шу йил 1 март куни бўлиб ўтган видеоселектор йиғилишидан кейин аёл-қизлар фаолиятига доир кўплаб ижобий қарорлар қабул қилинди. Аёл-қизларнинг ўз ҳаётларидан рози бўлиб яшашлари, жамиятда муносиб ўрин эгаллашлари борасида амалга оширилаётган ишлар тизимли равишда давом эттирилмоқда.

Шу билан бирга аёл-қизлар ҳаётида соғлом турмуш тарзини кенг турда қарор топтириш, улар ўртасида спорт тадбирларини оммалаштириш масаласига ҳам катта эътибор қаратилмоқда.

Шу мақсадда 8 март – Халқаро хотин-қизлар куни байрами олдидан “Аёл-қизларни эъзозлаш ҳафталиги” доирасида туманимиздаги барча корхона, ташкилот ва муассасаларда фаолият юритаётган аёл-қизлар ўртасида спорт мусобақалари ташкил этилди.

Жумладан, Таълим ва фан ходимлари касаба уюшмаси туман бўлинмаси томонидан 16-сонли ихтисослаштирилган давлат умумтаълим мактаби биносида туманимиздаги умумтаълим мактабларда фаолият олиб борётган ўқитувчи аёл-қизлар ўртасида спортнинг волейбол, шахмат, шашка, енгил атлетика, дартс, стол тенниси турлари бўйича мусобақалар ўтказилди. Мусобақаларга жами 300 нафар аёл-қиз қамраб олинди.

Ўтказилган волейбол мусобақасида туманимиздаги ҳар бир мактабнинг аёл-қизларидан иборат жамоа қатнашиб ўзаро куч синашдилар. Мазкур мусобақанинг якуний натижаларига кўра 28-мактаб жамоаси фахрли 1-ўринни қўлга киритган бўлса, 12-мактаб жамоаси 2-ўринни, 22-мактаб жамоаси 3-ўринни эгаллади.

Шу ўринда айтиш керакки, спорт мусобақаларини ўтказиш аёл-қизларни турли касб касалликларидан муҳофаза қилибгина қолмасдан уларнинг жамиятнинг фаол аъзоси сифатида алоҳида ўринга эга эканликларини ҳис қилишлари учун яқиндан ёрдам беради.

Бундан ташқари, спортнинг шахмат ва шашка турлари бўйича ҳам мусобақалар бўлиб ўтди. Шахмат бўйича 1 –ўринни Назокат Гаипова, 2-ўринни Муборак Раҳимова, 3-ўринни Дилдора Каримбоевалар эгаллаган бўлса, шашка бўйича Адолат Бекчанова, Санобар Шарифбоева ҳамда Саида Юсуповалар мутлоқ ғолиб бўлдилар.

Шунингдек, спортинг енгил атлетика тури бўйича Нодира Йўлдашева ўз эпчиллигини намойиш қилиб 1-ўринга муносиб деб топилди.

Бундан ташқари, спортнинг дартс ҳамда стол тенниси тури бўйича ҳам беллашувлар бўлиб ўтди. Дартс бўйича Гулбаҳор Йўлдашева, Раҳима Сапарбаева ҳамда Матлуба Қурбаниёзовалар ғолиб бўлган бўлсалар, стол тенниси бўйича Эътибор Бобожанова етакчиликни қўлдан бой бермай 1-ўринни эгаллашга муваффақ бўлди.

Кун бўйи давом этган спорт мусобақаларида жами 28 нафар ғолиблар аниқланиб, Таълим ва фан ходимлари касаба уюшмаси туман бўлинмаси Кенгаши томонидан эсдалик совғалари билан тақдирланди.

Туман ҳокимлигининг Aхборот хизмати