“Хотин-қизларни эъзозлаш ҳафталиги” доирасида маҳалла аёл-қизлари ўртасида спорт мусобақалари бўлиб ўтди

Мамлакатимиз раҳбари олиб бораётган кўпқиррали сиёсатда хотин-қизларга алоҳида эътибор қаритилиб келинмоқда. Айниқса, хотин-қизлар саломатлиги учун қайғуриш устувор масала сифатида белгилаб олинди. Зотан, соғлом авлодгина юрт келажагини таъминлайдиган асосий омил саналади. Бу авлоднинг дунёга келиши ва камолга етишида эса, шубҳасиз, аёлларимиз, оналаримизнинг ўрни ва хизматини ҳеч бир нарсага тенглаштириб бўлмайди.

Шу мақсадда, 5 март куни Халқаро хотин қизлар байрами олдидан “Хотин-қизларни эъзозлаш ҳафталиги” доирасида туманимиздаги фаол маҳалла аёл-қизлари ўртасида спорт мусобақалари бўлиб ўтди. Мусобақалар туман Маҳалла ва оилани қўллаб-қувватлаш бўлими, “Маҳалла” ҳайрия жамоат фонди туман бўлинмаси, Туризм ва спорт бўлими, Давлат муассасалари ва жамоат хизмати ходимлари касаба уюшмаси туман Кенгаши билан ҳамкорликда ташкил этилди.

Нукус давлат педагогика институти ҳузуридаги математика фанларига ихтисослаштирилган мактаб биносида бўлиб ўтган мазкур спорт беллашувларини Маҳалла ва оилани-қўллаб-қувватлаш бўлими бошлиғининг биринчи ўринбосари Гўзал Собурова очиб берди ҳамда барча аёл-қизларни байрам билан қизғин муборакбод этди.

Давлатимиз раҳбарининг алоҳида эътиборлари натижасида мўътабар оналаримиз, опа-сингилларимизни ҳаётдан рози қилиш, уларнинг жамиятдаги мавқеини янада мустаҳкамлаш сўнгги йилларда давлат сиёсатининг бош масалаларидан бирига айланганини алоҳида таъкидлаб, янги ташкил этилган Оила ва хотин-қизлар қўмитаси ва унинг тизимида ҳар бир маҳаллада хотин-қизлар фаоли лавозими жорий қилингани хотин-қизлар масалаларини янада кенгроқ қамраб олинишига асос бўлишини қайд этди.

Шундан сўнг Аёлларни реабилитация қилиш ва мослаштириш Қорақалпоғистон Республикаси туманлараро маркази директори Гавҳар Чимбойчиева ва туман Туризм ва Спорт бўлими мутахассиси Хуршид Исмоиловлар аёл-қизларни Халқаро хотин-қизлар байрами билан муборакбод этиб, спорт мусобақаларида барчага омад тилади.

Шиддатли ва муросасиз кечган мусобақаларда cтол тенниси бўйича 1-ўринни Гулбаҳор Хидирова, 2-ўринни Муқаддас Бекназарова ва 3-ўринни Гавҳар Чимбойчиевалар эгаллашди.

Дартс мусобақаларида 1-ўринни Сабоҳат Ражапова, 2-ўринни Дилноза Отабоева, 3-ўринни Феруза Аллабергановалар эгаллади.

Шахмат-шашка мусобақалари ҳам муросасиз кечди. Мусобақада 16 та иштирокчи қатнашиб, ўзаро куч синашдилар. Спортнинг шашка тури бўйича, 1-ўринни Гулнора Матниязова, 2-ўринни Феруза Саидмуратова, 3-ўринни Санамжон Казаковалар эгаллади.

 Шахмат мусобақалари узоқ вақт давом этди. Иштирокчилар мазкур мусобақада ўз ақлий салоҳиятини ва мантиқий фикрлаш қобилятини синовдан ўтказиш билан биргаликда кўплаб дўстлар орттирдилар. Мусобақа натижаларига кўра, 1-ўринни Нодира Йўлдошева, 2-ўринни Дилдора Кенжабоева, 3-ўринни Наргиза Бобониёзовалар эгаллади.

Мусобақалар якунида Давлат муассасалари ва жамоат хизмати ходимлари касаба уюшмаси туман Кенгаши раиси Азад Альмуратов барча аёл-қизларни байрам билан табриклаб оилавий ҳаётларида ва касбий фаолиятларида муваффақиятлар тилаб эсдалик совғаларини топширди.

Тадбир якунида спорт мусобақаларида иштирок этган барча аёл-қизлар жамиятда аёлларга кўрсатилаётган эътибор ва эътирофдан мамнунлигини билдириб, барча ташкилотчиларга миннаддорлик билдиришди.

Туман ҳокимлигининг Ахборот хизмати