Туман Ички ишлар бўлими шахсий таркиби иштирокида йиғилиш бўлиб ўтди

Коррупцияга қарши курашиш Ўзбекистонда давлат сиёсатининг энг устувор йўналишларидан биридир. Буни сўнгги йиллларда соҳага оид қабул қилинган концептуал аҳамиятга эга норматив-ҳуқуқий ҳужжатлар, коррупциянининг олдини олишга қаратилган маъмурий ислоҳотлар мисолида ҳам кўриш мумкин.

Бугунги кунда коррупцияга қарши курашиш ҳамда унинг олдини олиш мақсадида Ички ишлар органлари томонидан кўплаб тизимли ишлар амалга оширилмоқда. Жумладан, 27 февраль куни Амударё тумани Маданият марказида Ўзбекистон Республикаси ва Қорақалпоғистон Республикаси Ички ишлар Вазирлиги масъул ходимлари ҳамда туман Ички ишлар бўлими шахсий таркиби иштирокида йиғилиш бўлиб ўтди.

Йиғилишда ходимлар ўртасида қонунийлик ва хизмат интизомини мустаҳкамлаш ҳамда коррупцияга қарши курашишнинг ўзига хос усуллари муҳокама қилинди. Шунингдек, Ўзбекистон Республикаси Президенти томонидан қабул қилинган “Коррупцияга қарши курашиш фаолиятини самарали ташкил этишга доир қўшимча чора-тадбирлар тўғрисида”ги қарорга мувофиқ амалга оширилаётган ишлар бўйича кенг тарзда маълумот бериб ўтилди.

Бундан ташқари йиғилишда, коррупцияга қарши курашиш тадбирларининг самарадорлигини ошириш бўйича бир қатор вазифалар белгилаб олинди.

Дарҳақиқат, коррупция шунчаки жиноят ёки ҳуқуқбузарлик эмас, балки маънавий бузилиш ҳолати ҳамдир. Шундай экан, ушбу иллатни таг-томири билан йўқотиш учун фақатгина ҳуқуқ-тартибот органлари вакиллари эмас балки бутун бир жамият жипслиги талаб этилади.

Ўтказилган мазкур йиғилишда шу мавзуга бағишланган “Коррупия − жаҳолатга йўл” номли видеоролик намойиш этилди.

 Йиғилиш иштирокчилари томонидан фикр ва мулоҳазалар билдириш жараёнида коррупция мамлакатнинг иқтисодий ривожланишига путур етказувчи демократик институтларни заифлаштирувчи, ижтимоий тартибни бузувчи ва жамият ишончини поймол этувчи иллат сифатида эътироф этилиб, унинг олдини олиш ва унга барҳам беришда давлат органлари ва халқнинг ҳамкорлигини йўлга қўйиш зарурлиги қайд этиб ўтилди.

Бундай йиғилишларни ўтказишдан мақсад, аввало коррупцион жиноятчиликнинг олдини олишда ҳуқуқ-тартибот органлари вакилларининг ўрни ниҳоятда катта аҳамиятга эга эканлигини ва бу борада амалга оширилаётган тизимли ишлар кўламдорлигини янада ошириш бўйича аниқ чора-тадбирлар белгилаб олишдан иборатдир.

Йиғилиш якунида ўз хизмат вазифасини бажариш давомида жамиятимизда қонун устуворлигини таъминлаш, жиноятчиликка қарши курашиш ва унинг олдини олиш борасида мардона хизматлар қилган 5 нафар соҳа ходимлари ҳамда уларнинг ота-оналари ташаккурномалар билан тақдирланди.

Йиғилишда сўзга чиққанлар тақдирланган ходимларни табриклаб, ички ишлар идоралари ходимларининг ўз хизмат вазифасига янада масъулият билан ёндашиб, халқимиз тинчлиги ва жамият осойишталигини таъминлашдек шарафли ишларига омад тиладилар.

Фотима Эшимбетова.