“Маҳалла“ янгиликлари

Энг намунали "Ота-оналар университети”

Жорий йилнинг 26 август куни тумандаги 9-сонли болалар мусиқа ва санъат мактаби биносида "Фуқаролар йиғинлари ҳузуридаги энг намунали "Ота-оналар университети” кўрик танлови бўлиб ўтди. Танловга 47 та фуқаролар йиғинлари ҳузурида ташкил этилган "Ота-оналар университети” аъзолари фаол иштирок этдилар.

"Маҳалла” хайрия жамоат фонди, Хотин-қизлар қўмитаси, Халқ таълими муассасалари фаолиятини методик таъминлаш ва ташкил этиш бўлими, Ўрта махсус касб-ҳунар таълими муассасалари, Тиббиёт бирлашмаси, Маданият ва спорт ишлари бўлими, Маънавият - тарғибот маркази, "Соғлом авлод учун” жамғармаси мутахассислари ҳамда кенг жамоатчилик вакилларидан иборат ташкилий ишчи гуруҳ таркиби шакллантирилди ва икки босқичда Университет томонидан фуқаролар йиғинида оилаларни мустаҳкамлаш ва барқарорлигини таъминлаш, фарзанд тарбияси илмини эгаллашда ота-оналарга ёрдам кўрсатиш, оилада психологик муҳитни таъминлаш, оилаларда оила аъзоларининг ўз соғлиги тўғрисида қайғуриш туйғусини шакллантириш ҳамда ота-оналарнинг ёш авлодни тарбиялаш бўйича ҳуқуқий, маънавий-ахлоқий ва физиологик билимларини ошириш борасида амалга оширилган ишлари, эришилган ижобий натижалар ҳакамлар ҳайъати томонидан баҳоланди. Натижаларга кўра "Аёқчи” маҳалла фуқаролар йиғини ҳузурида ташкил этилган университет "Энг намунали ота-оналар университети” деб топилди ва фахрли 1-ўринни, "Босув” маҳалла фуқаролар йиғини ҳузуридаги университет 2-ўринни, "Торёп” маҳалла фуқаролар йиғинлари ҳузурида ташкил этилган университет 3-ўринни эгаллади ҳамда "Маҳалла” хайрия жамоат фондининг "Фахрий ёрлиғи” ва эсдалик совғалари билан тақдирланди.

Энг намунали яраштириш комиссияси

Жорий йилнинг 26 август куни «Фуқаролар йиғинларининг энг намунали яраштириш комиссияси» танлови бўлиб ўтди. "Маҳалла” хайрия жамоат фонди томонидан Ички ишлар бўлими, Хотин-қизлар қўмитаси, "Нуроний” жамғармаси, "Камолот” ЁИҲ, "Юсуф Эшон бобо” жомеъ масжиди имом хатиби ҳамда бошқа мутасадди ташкилотлар вакилларидан тузилган туман ташкилий ишчи гуруҳи томонидан белгиланган 10 та йўналишлар асосидаги ҳужжатлар ўрганиб чиқилди ва ҳар бир йўналиш 5 баллик, жами 50 баллик тизимда баҳоланди. Танловда "Тош қалъа” маҳалла фуқаролар йиғинининг Яраштириш комиссияси 1-ўринни, "Бештом” маҳалла фуқаролар йиғинининг Яраштириш комиссияси 2-ўринни, "Хитой” овул фуқаролар йиғини Яраштириш комиссияси 3-ўринни эгалладилар ҳамда махсус диплом ва совғалар билан тақдирландилар.

Гавҳар ЧИМБАЙЧИЕВА,

"Маҳалла” хайрия жамоат фонди туман бўлинмаси бош мутахассиси.