“Борлиқни бўстон айлаган Бобур” номли бадиий кеча ўтказилди

Мамлакатимизда миллий ва маънавий қадриятлар ардоқланиб, бой маданий меросимизга янгича муносабат шаклланиб бормоқда. Шоҳ ва шоир, ҳам наср, ҳам назмда самарали ижод қилган, буюк мутафаккир Заҳириддин Муҳаммад Бобурнинг бой адабий ва илмий мероси жаҳон аҳлининг юксак эътирофига сазовор бўлиб келмоқда. Миллатимиз фахри бўлмиш Бобур каби буюк сиймоларни ёд этиш ҳар биримиз учун ҳам фарз ҳам қарздир.

14 февраль куни Амударё тумани Халқ таълим бўлимига қарашли 11-сонли умумий ўрта таълим мактабида шоҳ ва шоир, давлат арбоби − Заҳириддин Муҳаммад Бобур таваллудининг 539 йиллиги муносабати билан “Борлиқни бўстон айлаган Бобур” номли бадиий кеча ўтказилди. Тадбирда 65- ,67- ва 11-сонли умумтаълим мактаби ўқувчилари қатнашиб, буюк бобомиз ҳақида олган билимларини янада кенгайтириб, мустаҳкамлашди.

Тадбирда сўзга чиққанлар Бобур шахсиятининг мамлакатимизда ва умуман, жаҳон тарихи, маданиятидаги ўрни, навқирон авлод учун ибратли жиҳатлари, бу зот қолдирган бебаҳо маънавий мероснинг аҳамияти хусусида тўхталишди.

Тадбир дўстона ва кўтаринки руҳда бўлиб ўтди. Дастлаб, она тили ва адабиёт фани ўқитувчиларининг Бобур ҳаёти ва ижоди юзасидан тузган саволларига ўқувчилар зукколик ва эпчиллик билан жавоблар беришди. Шунингдек, мактаб ўқувчилари томонидан Заҳириддин Муҳаммад Бобурнинг ҳаёт йўлини гавдалантириш мақсадида, Бобур сулоласи ва унинг шахсиятига дахлдор суратлар номойиш қилинди.

Бундан ташқари, ўқувчилар шоирнинг ғазал ва рубоийларидан намуналарни ифодали тарзда ўқидилар.

Айниқса, мактаб кутубхонаси томонидан ташкил қилинган кўргазма ўқувчиларда ўзгача қизиқиш ва таассурот қолдирди. Сабаби, Бобур ҳаётини тўлақонли акс эттирувчи “Бобурнома”, XV-XVI асрларда замонасининг машҳур шоирлари томонидан ёзилган қўлёзмаларнинг нусхалари ўқувчиларни ХV аср томон етаклади.

Тадбир давомида ўқувчилар 12 ёшидан бошлаб давлатни бошқарган буюк саркарданинг Алишер Навоийдан кейинги бетакрор сиймо эканлигини янада теран ҳис қилдилар.

Ўтказилган ушбу тадбир орқали Бобурнинг ҳаёт йўли, бошидан кечирган қийинчиликлари ва ундан чиқарган хулосалари ўқувчиларга ҳар томонлама ўрнак ва намуна бўлди десак адашмаган бўламиз.

Тадбир якунида бадиий кечада иштирок этган барча ўқувчилар фахрий ёрлиқ ва эсдалик совғалари билан тақдирланишди.

Дарҳақиқат, ўз она заминидан йироқда бутунлай бегона юртни макон тутган бобомиз тарқоқ ҳолдаги ҳинд қабилаларини бирлаштириб Бобурийлар империясига асос солди. Бор йўғи 47 йил умр кўрган бўлса ҳам, авлодларига битмас-туганмас маънавий хазина қолдирди. У ўзининг маълум ва машҳур асарлари билан тарихнавис адиб, лирик шоир ва ижтимоий масалалар ечимига ўз ҳиссасини қўшган олим сифатида жаҳон ҳамжамиятида ўзининг юксак ўрнига эгалиги билан бизга ғурур ва ифтихор бағишлайди.

Бобурнинг таваллуд куни муносабати билан ўтказилаётган кечалар, конферециялар, тадбирлар бобомизни ёд этишга, унинг бой меросини тарғиб қилишга қаратилганлиги билан аҳамиятлидир. Шундай экан, ҳар бир Ватандошимиз қалбида Бобур сиймосини аардоқлаб, унинг бой меросини келгуси авлодга этказишга дахлдор эканлигини чуқур ҳис қилмоғи лозим.

Ф.Эшимбетова