ТАЪЛИМ ТИЗИМИГА АХБОРОТ ТЕХНОЛОГИЯЛАРИНИ ЖОРИЙ ҚИЛИШГА БАҒИШЛАНГАН СЕМИНАР-ТРЕНИНГ ЎТКАЗИЛДИ
Юртимизда кўпгина соҳаларда ахборот технологиялари қўлланилиб, ишдаги самарадорлик ортишига эришилмоқда. Президентимизнинг 2020 йил 5 октябрдаги “Рақамли Ўзбекистон – 2030” стратегиясини тасдиқлаш ва уни самарали амалга ошириш чора-тадбирлари тўғрисида”ги Фармонида белгиланган вазифалардан келиб чиқиб, таълим жараёнини бошқаришда қоғоз шаклидаги ҳужжатларни рақамлаштириш ёрдамида ўқитувчилардаги маъмурий юкни камайтириш ва ўқув жараёнида шаффофликни таъминлаш мақсадида туман Халқ таълими бўлимига қарашли барча мактабларда “Электрон журнал”, яъни kundalik.com тизими жорий қилинмоқда.
8 февраль куни шу муносабат билан Халқ таълими вазирлигидан тизимга масъул бўлган методист Феруза Мейлиева ҳамда туман Халқ таълими бўлими ахборот технологиялар бўйича мутахассислари томонидан семинар-тренинг ташкил этилди.
Семинар-тренингда умумий ўрта таълим мактабларининг директорлари ва ўқув ишлари бўйича директор ўринбосарлари иштирок этишди. Семинарда “Электрон журнал” тизимининг афзалликлари, администраторлар ва мактаб раҳбарлари тарафдан қилиниши керак бўлган ишлар амалий равишда кўрсатилган ҳолда ўтилди.
Ушбу тизим жорий қилиниши натижасида мактаблардаги қоғоз кўринишидаги журналлар, кундаликлар юритилишидан воз кечилади. Ўқувчилар онлайн равишда баҳолаб борилади. Синф раҳбарлари ва ўқувчиларнинг ота-оналари ўртасида уларнинг ўзлаштириши, ҳулқи ҳақида онлайн равишда мулоқот алмашиш имкони пайдо бўлади. Ота-оналар ҳам фарзандларининг дарсга қатнашишини назорат қилиб боришади.
Бунда тизимдан фойдаланишда қулайлик яратиш мақсадида ўқитувчилар учун “Kundalik.Teacher”, ота-оналар учун эса “Kundalik.Familiy” иловалари ишлаб чиқилган бўлиб, ушбу иловаларда ишлаш орқали эндиликда ўқитувчиларнинг ва ота-оналарнинг вақтини тежаш имкони яратилди. Ушбу “kundalik.com” тизими нафақат ота-оналар балки мактаб директори, ўқув ишлари бўйича директор ўринбосари, маънавий-маърифий ишлар бўйича директор ўринбосарларининг ҳам бир қанча ишларини осонлаштириб беради ва ортиқча қоғозбозликлардан озод қилишда муҳим аҳамият касб этади.
Ундан ташқари, ўқувчиларнинг ўзлаштириш кўрсаткичлари синф, мактаб кесимида электрон равишда шаклланади. Шунингдек, синфлар кесимида, мактаб кесимида ҳам давоматлари шакллантирилиб боради.
Ушбу тизим орқали электрон журналларнинг ўз вақтида ва бехато юритилиб бориши Халқ таълими бўлими ва Халқ таълими вазирлиги тарафидан онлайн равишда “dashboard” орқали назорат қилинади. Ота-оналар учун “Электрон журнал” тизимига аъзо бўлиш нархи йилига айни вақтда 8 минг 600 сўмни ташкил қилади.
Маълумот ўрнида шуни айтиб ўтиш керакки, туманда шу пайтгача яъни 2020-2021 ўқув йилидан бошлаб, 9 та мактабда “Электрон журнал” тизими жорий қилинган эди. Ҳозирги кунда тизим ўзининг ижобий самарасини кўрсатиб, ўқитувчилар ортиқча қоғозбозликдан халос бўлишмоқда ва тежалган вақтларини таълим-тарбияни кучайтиришга сарфлашмоқда. Ота-оналар ҳам ўз фарзандларининг ўзлаштириш даражасини онлайн тарзда кузатиб, назорат қилиш имконига эга бўлишмоқда.
Семинар-тренинг давомида иштирокчилар шу каби маълумотларга, “Электрон журнал”, яъни “kundalik.com” тизимини юритиш бўйича кенг тушунчаларга эга бўлдилар. Масъулларга ўзларини қизиқтирган саволлар билан мурожаат қилиб, керакли жавобларни олдилар.
О.Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
