TAʼLIM TIZIMIGA AXBOROT TEXNOLOGIYaLARINI JORIY QILIShGA BAGʻIShLANGAN SEMINAR-TRENING OʻTKAZILDI
Yurtimizda koʻpgina sohalarda axborot texnologiyalari qoʻllanilib, ishdagi samaradorlik ortishiga erishilmoqda. Prezidentimizning 2020-yil 5-oktyabrdagi “Raqamli Oʻzbekiston – 2030” strategiyasini tasdiqlash va uni samarali amalga oshirish chora-tadbirlari toʻgʻrisida”gi Farmonida belgilangan vazifalardan kelib chiqib, taʼlim jarayonini boshqarishda qogʻoz shaklidagi hujjatlarni raqamlashtirish yordamida oʻqituvchilardagi maʼmuriy yukni kamaytirish va oʻquv jarayonida shaffoflikni taʼminlash maqsadida tuman Xalq taʼlimi boʻlimiga qarashli barcha maktablarda “Elektron jurnal”, yaʼni kundalik.com tizimi joriy qilinmoqda.
8-fevral kuni shu munosabat bilan Xalq taʼlimi vazirligidan tizimga masʼul boʻlgan metodist Feruza Meyliyeva hamda tuman Xalq taʼlimi boʻlimi axborot texnologiyalar boʻyicha mutaxassislari tomonidan seminar-trening tashkil etildi.
Seminar-treningda umumiy oʻrta taʼlim maktablarining direktorlari va oʻquv ishlari boʻyicha direktor oʻrinbosarlari ishtirok etishdi. Seminarda “Elektron jurnal” tizimining afzalliklari, administratorlar va maktab rahbarlari tarafdan qilinishi kerak boʻlgan ishlar amaliy ravishda koʻrsatilgan holda oʻtildi.
Ushbu tizim joriy qilinishi natijasida maktablardagi qogʻoz koʻrinishidagi jurnallar, kundaliklar yuritilishidan voz kechiladi. Oʻquvchilar onlayn ravishda baholab boriladi. Sinf rahbarlari va oʻquvchilarning ota-onalari oʻrtasida ularning oʻzlashtirishi, hulqi haqida onlayn ravishda muloqot almashish imkoni paydo boʻladi. Ota-onalar ham farzandlarining darsga qatnashishini nazorat qilib borishadi.
Bunda tizimdan foydalanishda qulaylik yaratish maqsadida oʻqituvchilar uchun “Kundalik.Teacher”, ota-onalar uchun esa “Kundalik.Familiy” ilovalari ishlab chiqilgan boʻlib, ushbu ilovalarda ishlash orqali endilikda oʻqituvchilarning va ota-onalarning vaqtini tejash imkoni yaratildi. Ushbu “kundalik.com” tizimi nafaqat ota-onalar balki maktab direktori, oʻquv ishlari boʻyicha direktor oʻrinbosari, maʼnaviy-maʼrifiy ishlar boʻyicha direktor oʻrinbosarlarining ham bir qancha ishlarini osonlashtirib beradi va ortiqcha qogʻozbozliklardan ozod qilishda muhim ahamiyat kasb etadi.
Undan tashqari, oʻquvchilarning oʻzlashtirish koʻrsatkichlari sinf, maktab kesimida elektron ravishda shakllanadi. Shuningdek, sinflar kesimida, maktab kesimida ham davomatlari shakllantirilib boradi.
Ushbu tizim orqali elektron jurnallarning oʻz vaqtida va bexato yuritilib borishi Xalq taʼlimi boʻlimi va Xalq taʼlimi vazirligi tarafidan onlayn ravishda “dashboard” orqali nazorat qilinadi. Ota-onalar uchun “Elektron jurnal” tizimiga aʼzo boʻlish narxi yiliga ayni vaqtda 8 ming 600 soʻmni tashkil qiladi.
Maʼlumot oʻrnida shuni aytib oʻtish kerakki, tumanda shu paytgacha yaʼni 2020-2021 oʻquv yilidan boshlab, 9 ta maktabda “Elektron jurnal” tizimi joriy qilingan edi. Hozirgi kunda tizim oʻzining ijobiy samarasini koʻrsatib, oʻqituvchilar ortiqcha qogʻozbozlikdan xalos boʻlishmoqda va tejalgan vaqtlarini taʼlim-tarbiyani kuchaytirishga sarflashmoqda. Ota-onalar ham oʻz farzandlarining oʻzlashtirish darajasini onlayn tarzda kuzatib, nazorat qilish imkoniga ega boʻlishmoqda.
Seminar-trening davomida ishtirokchilar shu kabi maʼlumotlarga, “Elektron jurnal”, yaʼni “kundalik.com” tizimini yuritish boʻyicha keng tushunchalarga ega boʻldilar. Masʼullarga oʻzlarini qiziqtirgan savollar bilan murojaat qilib, kerakli javoblarni oldilar.
O.Xudoyberganova.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
