Ёшлар иштирокида учрашувлар, маҳорат дарслари ва спорт мусобақалари бўлиб ўтди

Президентимиз томонидан илгари сурилган 5 та муҳим ташаббус доирасида туманимиз бўйлаб кўплаб тадбирлар амалга оширилмоқда.

Хусусан, 2 февраль куни Амударё тумани бўйлаб ёшларнинг бўш вақтини мазмунли ўтказиш мақсадида туман ҳокимлиги, Ёшлар ишлари агентлиги туман бўлими, туризм ва спортни ривожлантириш бўлими билан ҳамкорликда турли спорт мусобақалари, маҳорат дарслари бўлиб ўтди.

Кун давомида ўтказилган мазкур тадбир ва мусобақаларда туман ёшларининг 500 дан ортиғи қамраб олинди.

Кун давомида Янгиобод маҳалласи ҳудудидаги 40-сонли мактабда “Заковат” интеллектуал ўйини ўтказилди. Интеллектуал ўйинда жами 8 та маҳалла ёшларидан иборат жамоа қатнашиб, ўз маҳалласи шаънини ҳимоя қилишди. Якуний натижаларга кўра Тош-ёп овули ёшлари 1-ўринни, Ўрта-қалъа овули ёшлари 2-ўринни, Босув маҳалласи ёшлари 3-ўринни эгаллашди.

Шунингдек, Янгиобод маҳалласи ҳудудидаги рақамли технологиялар марказида Президентимиз томонидан илгари сурилган “Беш ташаббус” нинг 3-йўналиши − аҳоли ва ёшлар ўртасида компютер технологиялари ва интернетдан самарали фойдаланиш, IT ва робототехника бўйича “Маҳорат дарси” ўтказилди. Ёшларга рақамли технологиялар маркази таълим бўйича мутахассиси Абдулло Ҳайитбоев томонидан ҳозирги замонавий ахборот технологияларидан тўғри фойдаланиш, дастурлаш, фрилансерлик бўйича маълумотлар бериб ўтилди.

Бундан ташқари, Бойовул маҳалласи ҳудудидаги 16-сонли мактабда спортнинг стол тенниси ва шахмат турлари бўйича “Ёшлар кубоги” мусобақаси ташкил этилиб, ғолиблар муносиб тақдирланди.

Мусобақага туманимизнинг 16 та маҳалла ва овулларида истиқомат қилувчи стол тенниси ва шахматга қизиқувчи 18 ёшдан 30 ёшгача  бўлган  уюшмаган ёшлар қатнашишди.

Муросасиз кечган беллашувлар якунига кўра шахмат бўйича 1-ўринни Бегзод Болтабаев қўлга киритди. Стол тенниси бўйича эса мутлақ  ғолиблик Диёрдек Шомурадовга насиб қилди.

Шунингдек, туман Маданият марказида ёшлар учун тадбиркорлик соҳасида “Маҳорат дарси” ўтказилди.

Маҳорат дарсида туман ишбилармонлари, ўз бизнесини йўлга қўйган ёшлар ўз тенгдошларига бизнесга қандай кириб келганликларини, тадбиркорликни йўлга қўйгунча қандай муаммоларга учраб, уларни қандай енгиб ўтгани ҳақида гапириб бердилар. Қолаверса, туманимиздаги 40-сонли мактаб директори, Жўқорғи Кенгес депутати, Қорақалпоғистон Республикаси Халқ ўқитувчиси унвони соҳибаси Санобар Хўжамуратова ҳам ёшларга ўз тавсияларини берди. Туманимизда ўз тадбиркорлик фаолиятини намунали тарзда йўлга қўйган Тамара Юсупова ҳам бизнесда мувоффақиятга эришиш сирлари ҳақида ёшларга ўз тавсифларини берди.

Куннинг иккинчи ярмида Чойкўл овули ҳудудидаги 22-сонли мактабда спортнинг волейбол тури бўйича мусобақа бўлиб ўтди. Мусобақада Бобур номли овул ёшлари фахрли 1-ўринни, Оқ олтин овули жамоаси 2-ўринни эгаллашган бўлса, Тўлқин овули ёшларидан иборат жамоа 3-ўринга муносиб деб топилди.

Шунингдек, Олмазор маҳалласи худудида жойлашган футбол майдонида спортнинг мини футбол тури бўйича ўтказилган мусобақада ҳам кўплаб ёшлар иштирок этишди. Мусобақа шиддатли ва муросасиз кечиб, 1-ўрин Чордара маҳалласи ёшларига насиб этди.

Кун давомида ўтказилган тадбирлар ва учрашувлар ёшларнинг бўш вақтларини мазмунли ўтказиш, уларни тадбиркорлик билан шуғулланишга, спортга ошно бўлиб, соғлом турмуш кечиришга ҳамда замонавий билим ва кўникмаларни, касбларни эгаллаб, Ватан тараққиётига муносиб ҳисса қўшишга чорлагани билан аҳамиятли бўлди.

Туман ҳокимлигининг ахборот хизмати