ПРОБАЦИЯ НАЗОРАТИДАГИ 4 НАФАР МАҲКУМ МУДДАТИДАН ИЛГАРИ ОЗОД ЭТИЛДИ

Пробация назорати остидаги озодликдан маҳрум қилиш билан боғлиқ бўлмаган жазоларга ҳукм қилинган шахсларни ижтимоий ҳаётга мослаштириш, уларнинг бандлигини таъминлаш, ўқишга ва ишга жойлаштириш, назорат остидагиларга ижтимоий, ҳуқуқий ва психологик ёрдам кўрсатиш, энг асосийси, шахсни  тарбиялаш кабилар борасида самарали чора-тадбирлар амалга оширилмоқда.

26 январь куни Янгиобод маҳалла фуқаролар йиғини биносида Жиноят ишлари бўйича туман суди томонидан ички ишлар органлари Пробация гуруҳи назоратидаги маҳкумларга доир иш бўйича сайёр суд ўтказилди. Ушбу сайёр судда Жиноят ишлари бўйича туман суди раиси Жасур Ўразбоев, туман прокурори ёрдамчиси Аббаз Ниёзимбетов, Ички ишлар органлари Пробация гуруҳи катта инспектори Руслан Искандаровлар қатнашдилар. Судда туман ички ишлар органлари Пробация гуруҳи томонидан 6 нафар маҳкумга нисбатан киритилган тақдимномалари кўриб чиқилди.

Маҳкумлардан бири Ўзбекистон Республикаси Жиноят Кодексининг тегишли моддаларига кўра 2 йил 6 ой муддатга 10 фоиз ахлоқ тузатиш ишлари жазосига ҳукм қилинган. Ушбу шахс Пробация назоратида туриб, жазони ўташ тартиб ва қоидаларига тўлиқ амал қилиб, ахлоқ тузатиш ишлари жазосининг учдан бир қисмидан кўпроғини, яъни 10 ой 10 кун муддатини ўтаган.

Кейинги маҳкум эса 1 йил 6 ой муддатга барча турдаги транспорт воситаларини бошқариш ҳуқуқидан маҳрум қилиниб, Жиноят Кодексининг тегишли моддасига кўра, 3 йил муддатга 30 фоиз ахлоқ тузатиш ишлари жазосига судланган. Пробация гуруҳи назоратига олинганидан сўнг, тегишли тартиб-қоидаларга амал қилиб, хулқи яхши томонга ўзгарган ва ўз қилмишининг оқибатини англаб етган.

Маҳкумлардан яна бири Ўзбекистон Республикаси ЖКнинг 177-моддаси 2-қисми билан 1 йил муддатга озодликни чеклаш жазосига судланган. Маҳкум туман Ички ишлар бўлимига ўтган йили ҳисобга қўйилган ва жазони ўташ қоидалари, белгиланган чекловларга амал қилиш тартиблари тушунтирилган. Жазони ўташ даврида ўзининг жиноий қилмишларини тўлиқ англаб етиб, тузалиш йўлига қатьий ўтиб, белгиланган чекловларга тўлиқ амал қилган ушбу шахс ҳам тайинланган озодликни чеклаш жазосининг учдан бир қисмидан кўпроқ муддатини ўтаган.

Тақдимнома асосида иши судда кўрилаётган навбатдаги маҳкум Ўзбекистон Республикаси Жиноят Кодексининг тегишли моддаларига кўра 4 йил муддатга озодликни чеклаш жазосига судланган. Ушбу маҳкумнинг қамоқда сақланган даври ўтаган деб ҳисобланиб, ўташ учун 3 йилдан зиёд муддат белгиланган ва туман Ички ишлар бўлимига ҳисобга қўйилган. Унга ҳам жазони ўташ қоидалари, белгиланган таъқиқларга амал қилиш тартиблари тушунтирилган. Маҳкум жазони ўташ даврида ўзининг жиноий қилмишларини тўлиқ англаб етиб, тузалиш йўлига қатьий ўтган ва белгиланган чекловларга тўлиқ амал қилган.

Шунга кўра туман ички ишлар органлари Пробация гуруҳи томонидан ушбу маҳкумларни Ўзбекистон Республикаси Жиноят Кодексининг 73-моддасига асосан муддатидан илгари шартли равишда озод килиш масаласини кўриб чиқиш учун судга тақдимнома киритилган. Суд иши давомида маҳкумларнинг белгиланган жазодан тўғри хулоса чиқарганини инобатга олинди ва Пробация гуруҳи тақдимномаси қаноатлантирилди. Тақдимномага асосан 4 нафар маҳкум ўталмаган жазосини ўташдан муддатидан илгари шартли озод қилинди.

 Сайёр суд мажлисида жиноятининг оқибатларини тўла англаб, ахлоқан тузалиш йўлига ўтган ва жазодан муддатидан илгари шартли озод этилган 4 нафар маҳкум халқимизга хос бағрикенглик билан қилмишлари кечирилгани учун давлатимизга миннатдорлик билдирди. Жамиятда ўз ўрнини топиб, муносиб хулқ-атворда бўлиш ва юртимиз ривожига ўз ҳиссасини қўшишга қатьий сўз бердилар.

Жасур Ўразбоев, Жиноят ишлари бўйича туман суди раиси.