ЯККА ТАРТИБДА УЙ-ЖОЙ ҚУРИШ УЧУН ЕР МАЙДОНЛАРИ БЕЛГИЛАГАН ТАРТИБДА АЖРАТИЛАДИ
Ўзбекистон Республикаси Президенти Ш.М.Мирзиёев 2021 йил 6 ноябрь куни инаугурация маросимида нутқ сўзлаб, етти йўналишдан иборат бўлган “Янги Ўзбекистон тараққиёт стратегияси”нинг иккинчи йўналишида амалга ошириладиган устувор вазифалар ҳақида тўхталди. Келгусида маъмурий судлар фаолиятини халқаро андозалар асосида такомиллаштириш юзасидан тегишли чора-тадбирлар амалга оширилишини, шунингдек, хусусий мулк устиворлиги қонунларимиздаги асосий тамойил сифатида белгиланишини, давлат идораси маълумотига ишониб, мол-мулк сотиб олган шахснинг ҳуқуқи бузилмаслиги таъминланишини таъкидлаб ўтди.
Тараққиёт стратегиясида белгиланган ушбу устувор вазифаларни амалга ошириш орқали келгусида ер эгаларининг мулкий ҳуқуқлари кафолатланади, ер участкаларини ажратишнинг барча учун тенг ва шаффоф тартиби жорий этилади.
Якка тартибда уй-жой қуриш учун ер майдонларини ажратиш тўғрисидаги қарорлар, шунингдек, ушбу соҳада ҳокимлик ва бошқа давлат органлари мансабдор шахсларининг ҳаракат ёки ҳаракатсизлигини қонунга хилоф деб топиш билан боғлиқ ишлар маъмурий судларга тааллуқли бўлганлиги сабабли, муқаддам фуқароларга ушбу турдаги ер участкаларини ажратиш тартиби ва ушбу муносабатларни тартибга солиш учун асос бўлган айрим қонун ҳужжатлари ҳақида тўхталиб ўтамиз.
Сўнгги йилларда ер билан боғлиқ муносабатларни самарали тартибга солиш, ерларни муҳофаза қилишни такомиллаштириш, ерга оид низоларни олдини олиш, бу борада фуқаро ва юридик шахсларнинг ҳуқуқлари ва қонуний манфаатларини ҳимоя қилишни янада такомиллаштириш, шунингдек, ер соҳасидаги ҳуқуқбузарликлар учун жавобгарликни кучайтиришга оид муҳим қонунчилик ҳужжатлари қабул қилинди.
Ўзбекистон Республикаси Президентининг 2021 йил 8 июнь кунги “Ер муносабатларида тенглик ва шаффофликни таъминлаш, ерга бўлган ҳуқуқларни ишончли ҳимоя қилиш ва уларни бозор активига айлантириш чора-тадбирлари тўғрисида”ги Фармонини мисол тариқасида келтиришимиз мумкин. Ушбу Фармон билан ер участкаларини ажратишнинг барча учун тенг, шаффоф ва бозор тамойилларига асосланган тартибини жорий этиш, ерга оид мулкий ва ҳуқуқий муносабатларда барқарорликни таъминлаш, ерларни муҳофаза қилиш ва ер эгаларининг мулкий ҳуқуқларини кафолатлашнинг янги ҳуқуқий асоси яратилди.
Ўзбекистон Республикасининг 2021 йил 16 августдаги “Ер участкаларини ажратиш ва улардан фойдаланиш, шунингдек ерларни ҳисобга олиш ва давлат ер кадастрини юритиш тизими такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги Қонунига мувофиқ, Ўзбекистон Республикасининг Ер кодексига ҳам бир қатор ўзгартиш ва қўшимчалар киритилди.
Ер участкасига бўлган мулк ҳуқуқи учун давлат ордери ҳуқуқни белгиловчи ҳужжат бўлиб, у хусусийлаштириладиган ер участкасининг қийматини тўлаш тўлиқ ва ўз вақтида амалга оширилганидан кейин бир иш куни ичида Ўзбекистон Республикаси Давлат активларини бошқариш агентлиги томонидан берилади. Хусусийлаштирилган ер участкасига бўлган хусусий мулк ҳуқуқи унга бўлган ҳуқуқ Кўчмас мулк объектларига бўлган ҳуқуқларнинг давлат реестрига тегишли маълумотларни электрон тарзда киритиш орқали давлат рўйхатидан ўтказилган пайтдан эътиборан юзага келади. Якка тартибдаги уй-жой деганда, бир ер участкасида жойлашган, доимий яшаш, дам олиш ва шахсий хўжаликни юритишга мўлжалланган ёрдамчи-хўжалик иморатлари ва ҳовлидаги иншоотлар тегишли бўлган бир ёки бир неча турар жой иморати тушунилади.
П.Дошмурадов, Қорақалпоғистон Республикаси Маъмурий суди судьяси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
