БОБУР НОМЛИ ОВУЛДА СЕКТОР РАҲБАРИ ЁШЛАР БИЛАН УЧРАШДИ

Мамлакатимизда инсон манфаатлари олий қадрият даражасига кўтарилди. Бугун барча давлат идоралари фаолиятида аҳолининг мурожаатлари билан ишлаш бўйича сифат жиҳатидан мутлақо янги тизим яратилди. Жойларда ўтаётган сайёр қабуллар халқнинг дардини эшитиш, уларнинг муаммоларини ҳал этишда, шак-шубҳасиз кутилган натижаларни бермоқда.

14 январь куни 3-сектор ҳудудидаги Бобур номли овулда жойлашган 86-сонли умумтаълим мактабида ҳам сектор раҳбарининг ёшлар билан навбатдаги сайёр қабули ўтказилди.

Сайёр қабулда туман Ички ишлар бўлими бошлиғи 3-сектор раҳбари Улуғбек Худойберганов, Ички ишлар бўлими бошлиғи ўринбосари Мухтор Раҳматуллаев ҳамда Халқ қабулхонаси туман бўлими мудири Эркин Ражабовлар ва фуқаролар йиғинлари раислари, Ёшлар ишлари агентлиги туман бўлими масъуллари, ҳудуд ёшлари ва тегишли ташкилотлар масъуллари иштирок этишди.

Бугунги кунда ёшларнинг таълим олишлари ва ўз қобилиятларини рўёбга чиқаришлари учун барча шарт-шароитлар яратилган. Галдаги вазифа, ушбу ёшлар билан бирма-бир суҳбатлашиб уларни касб-ҳунарга ўргатиш, бандлигини таъминлаш, бизнес ташаббусларини қўллаб-қувватлаш, ижтимоий ҳимоясини кучайтириш ва муаммоларини ҳал этиш борасидаги ишларни тизимли йўлга қўйишдир.

Учрашув аввалида, Ёшлар ишлари Агентлиги туман бўлими ходими Сардор Исломов сўзга чиқиб, бугунги кунда ёшларга яратилаётган кенг имкониятлар, айниқса, Президентимиз томонидан “Ёшлар дафтари” тизими жорий этилганлиги, бу шу йўналишдаги ишларни тўғри ташкил этишда бош омил бўлиб хизмат қилаётганлигини айтиб ўтди.

Таъкидланганидек, бугунги кунда сектор ҳудудида “Ёшлар дафтари”, “Темир дафтар” ва “Аёллар дафтари”га киритилган фуқароларни қўллаб-қувватлаш, уларга моддий, психологик, ижтимоий ёрдам кўрсатиш борасида кўплаб чора-тадбирлар амалга оширилмоқда. Хусусан, ишсиз фуқароларнинг бандлиги таъминланиб, ишга жойлаштирилмоқда. Тадбиркорлик қилиш истагидаги фуқароларга кредит олишларида амалий ёрдам берилмоқда, уй-жой билан боғлиқ масалаларда мурожаат қилган фуқароларнинг ҳам муаммолари бартараф қилинмоқда.

Сайёр учрашув давомида ёшларнинг мурожаатлари тинглашга алоҳида эътибор қаратилди. Маҳалла ёшларидан Сохиба Исмоилова, Озода Бозорбоева, Амангул Камолова, Санжар Матмуродов, Умида Янгибоева, Дилнора Мадиёрова, Сарвиноз Ҳайитбоева, Дилрабо Камолова ҳамда Иззат Норимбетовлар томонидан бандликни таъминлаш, тикув машинаси олиш, субсидия ажратилиши, тадбиркорликни йўлга қўйиш, имтиёзли кредит олиш каби масалаларда амалий ёрдам сўраб мурожаат қилдилар.

Қабулда муаммоларга ечим топиш чоралари кўрилди ва масъуллар бириктирилди. Ҳар бир мурожаатнинг ижроси назоратга олинди.

Айтиш жоизки, ўтказилаётган бундай тадбирлар ёшларнинг ижтимоий-иқтисодий муаммоларни ҳал этиш, орзу-истакларини рўёбга чиқаришларига қулай шароитлар яратиб беришда муҳим омил бўлиб хизмат қилмоқда.

Фуқароларнинг мурожаатларини тинглаш, уларга амалий ечим топишда ҳудудлар бўйлаб ўтказилаётган бу каби сайёр қабулларнинг аҳамияти каттадир. Шу ўринда халқ билан юзма-юз мулоқот қилиб, уларнинг дардини тинглашда ва ижобий ечим топишда барча вазирлик ва идора-ташкилот масъулларининг ўрни алоҳида аҳамиятга касб этади.

Фарҳод Абдураҳимов, 3-сектор котиби.