ҲАРБИЙ ВАТАНПАРВАРЛИК – ЮРТГА МУҲАББАТ ВА БУРЧГА САДОҚАТ

Ҳар қандай давлат ўз истиқболини соғлом ва баркамол авлод тимсолида кўради. Аксарият ривожланган мамлакатларда ёшларни ватанпарварлик руҳида тарбиялаш мақсадидаги кўплаб жамоатчилик ташкилотлари ташкил этилган. Мамлакатимизда ҳам ёшларни ватанпарварлик руҳида тарбиялашда катта аҳамиятга эга бўлган мудофаага кўмаклашувчи “Ватанпарвар” ташкилоти фаолият юритиб келмоқда.
Ташкилот томонидан ёш авлодни ҳарбий ватанпарварлик руҳида тарбиялаш борасида изчил саъй-ҳаракатлар олиб борилиб, асосан уч йўналишдаги фаолият йўлга қўйилган. Биринчи йўналиш − аҳоли, айниқса, ёшларни Ватанга садоқат, ҳарбий-ватанпарварлик, миллий маънавиятимизга ҳурмат руҳида тарбиялашдир. Ташкилотнинг иккинчи йўналиши − ёшларни ташкилот тизимидаги автокросс, мотокросс, картинг, триатлон, дуатлон, ёзги биатлон, пневматик қуролдан ўқ отиш, денгиз кўпкураши, ҳарбий-амалий кўпкураш, хизматчи итлар, авиамодель, ракетамодель, кемамодель, радиоспорт каби спортнинг техник ва амалий турларига жалб этиш, улар орасида соғлом турмуш тарзини тарғиб қилиш ҳисобланади. Ташкилотимизнинг учинчи йўналиши эса фуқароларни оммавий техник касбларга тайёрлаш ҳисобланади.
Ташкилотимизда ушбу йўналишлар бўйича амалий ишлар йўлга қўйилган бўлиб, турли спорт мусобақалари ҳам ўтказилиб келинмоқда. Бу борада туман ҳокимлиги, Ёшлар ишлари агентлиги туман бўлими,  Миллий гвардиянинг қўриқлаш хизмати, туман Ички ишлар бўлими ва бошқа ташкилотлар билан ҳамкорликда “Шунқорлар”, “Ҳаво милтиғида ўқ отиш” ва “Ёзги биатлон” ҳарбий спорт мусобақалари мунтазам равишда ташкил этилади. Шу каби мусобақаларда ғолиб бўлган жамоалар Республика босқичида қатнашиш имкониятига эга бўлишмоқда.
Ташкилот томонидан ёшларни ҳарбий ватанпарварлик руҳида тарбиялаш мақсадида турли учрашув ва давра суҳбатлари, тарғибот тадбирлари ҳам ташкил этилиб, ватанпарварликнинг тимсоли бўлган аждодларимизнинг жасорати ва жанговар тактикаси ҳақида сўзлаб берилади. Шунингдек, Ватан учун жонини фидо қилган, хизмат бурчини бажариш чоғида мардларча ҳалок бўлган ҳарбий хизматчиларнинг жасорати намуна қилиб кўрсатилиб, ёшлар қалбида бурчга садоқат, юртга муҳаббат туйғулари мустаҳкамлаб борилади.
Хулоса ўрнида шуни айтиш керакки, ёшларда Ватанга дахлдорлик ҳиссини кучайтириш, Ватанни севиш ва асраш туйғуларини шакллантириш бугунги кунда энг асосий вазифалардан саналади. Биз мана шундай шарафли ва масъулиятли вазифани бажараётганимиздан, ёшларнинг ватанпарвар инсонлар бўлиб вояга етишларига ҳисса қўшаётганимиздан фахрланамиз.

Шуҳрат КАМОЛОВ, Мудофаага кўмаклашувчи “Ватанпарвар” ташкилоти

туман ўқув-спорт техника клуби бошлиғи.