ЁШЛАР ИШТИРОКИДА САЙЁР ҚАБУЛ ЎТКАЗИЛДИ

Мамлакатимизда инсон манфаатлари олий қадрият даражасига кўтарилган. Бугун барча давлат идоралари фаолиятида аҳолининг мурожаатлари билан ишлаш бўйича сифат жиҳатидан мутлақо янги тизим яратилди.

Жойларда ўтаётган сайёр қабуллар халқнинг дардини эшитиш, уларнинг муаммоларини ҳал этишда, шак-шубҳасиз кутилган натижаларни бермоқда. Шу маънода айтиш мумкинки, 8 январь куни Амударё туманининг Хитой овулида жойлашган 85-сонли умумтаълим мактабида ўтказилган ёшлар иштирокидаги навбатдаги сайёр қабул ҳам ёшларнинг мушкулини осон қилиш, уларни қийнаётган муаммоларнинг ечимини топишда муҳим восита бўлиши аниқ.

Сайёр қабулда туман Халқ қабулхонаси вакиллари, Ички ишлар органлари ходимлари, маҳалла раислари, сектор раҳбарлари, Ёшлар ишлари агентлиги туман бўлими ходимлари, маҳалла ёшлари ва тегишли ташкилот масъуллари  иштирок этишди.

Бугунги кунда ёшларнинг таълим олишлари ва ўз қобилиятларини рўёбга чиқаришлари учун барча шарт-шароитлар яратилган. Галдаги вазифа, ушбу ёшлар билан бирма-бир суҳбатлашиб уларни касб-ҳунарга ўргатиш, бандлигини таъминлаш, бизнес ташаббусларини қўллаб-қувватлаш, ижтимоий ҳимоясини кучайтириш ва муаммоларини ҳал этиш борасидаги ишларни тизимли йўлга қўйишдир.

Учрашув аввалида, Ёшлар ишлари агентлиги туман бўлими ходими Сардор Исломов сўзга чиқиб, бугунги кунда ёшларга яратилаётган кенг имкониятлар, айниқса, Муҳтарам Президентимиз томонидан “Ёшлар дафтари” тизими жорий этилганлиги бу борадаги ишларни тўғри ташкил этишда бош омил бўлиб хизмат қилаётганлигини таъкидлаб ўтди.

Шундан сўнг, ёшларнинг мурожаатлари тингланди. Маҳалла ёшларидан, Хушнуд Мамбетов ишсизлик масаласи бўйича мурожаат қилган бўлса, Хосият Бобожанова тикув машинаси олишда субсидия ажратилишида амалий ёрдам сўраб мурожаат қилди. Оғабек Жуманиязов эса тадбиркорлик қилиш истаги борлигини билдириб, имтиёзли кредит олишда амалий ёрдам сўради.

Қабулда ҳар бир муаммога ечим топиш чоралари кўрилди ва масъуллар бириктирилди. Тегишли идоралар раҳбарларининг муайян топшириқни бажаришга оид ваъдалари олинди.

Айтиш жоизки, ўтказилаётган бундай тадбирлар ёшларнинг ижтимоий-иқтисодий муаммоларни ҳал этиш, орзу-истакларини рўёбга чиқаришларига қулай шароитлар яратиб беришда муҳим омил бўлиб хизмат қилмоқда.

Шундан сўнг, сектор раҳбарлари ва Амударё тумани Ички ишлар бўлими бошлиғи уринбосарлари майор, Бахтиёр Ўразов ва майор Муҳтор Рахматуллаев ҳамда Халқ кабулхонаси Амударё тумани булими мудири Эркин Ражабовлар томонидан 3-сектор ҳудудидаги “Темир дафтар”га киритилган “Намуна”, “Куюк кўпир”, “Хитой” овулларида  яшовчи 3 нафар фуқароларга ёғ, ун, тухум ҳамда ширинликлардан иборат жами 1,2 млн. сўмлик озиқ-овқат маҳсулотлари этказиб берилди.  

Бугунги кунда Амударё тумани бўйлаб “Ёшлар дафтари”, “Темир дафтар” ва “Аёллар дафтари” га киритилган фуқароларни қўллаб-қувватлаш, уларга моддий, психологик, ижтимоий ёрдам кўрсатиш борасида кўплаб чора-тадбирлар амалга оширилмоқда. Хусусан, ишсиз фуқароларнинг бандлиги таъминланиб, ишга жойлаштирилмоқда. Тадбиркорлик қилиш истагидаги фуқароларга кредит олишларида амалий ёрдам берилмоқда, уй-жой билан боғлиқ масалаларда мурожаат қилган фуқароларнинг муаммолари ҳам имкон қадар бартараф қилинаётир.

 Фуқароларнинг мурожаатларини тинглаш, уларга амалий ечим топишда ҳудудлар бўйлаб ўтказилаётган бу каби сайёр қабулларнинг аҳамияти катта. 

Ф.Эшимбетова.