56-СОНЛИ МАКТАБДА “ЯНГИ ЙИЛ САРГУЗАШТЛАРИ” БАЙРАМ КЕЧАСИ ЎТКАЗИЛДИ
“Янги йил” байрами болажонлар томонидан интиқиб кутиладиган қувончли байрамлардан бири ҳисобланади. Айниқса безатилган арча атрофида куй-қўшиқлар, рақслар ва саҳна кўринишлари ижро этилиши, даврага турли эртак қаҳрамонларининг ташриф буюриши ва Қорбобо ҳамда Қорқиз томонидан совғалар улашилиши болажонларга олам-олам қувонч бағишлайди.
Янги йил арафасида туманимиздаги барча мактабларда ва мактабгача таълим муассасаларида Янги йил байрами тантаналари ташкил этилмоқда.
Ана шундай тадбир шу йилнинг 24 декабрида Манғит шаҳрининг Дурунки маҳалласидаги 56-сонли мактабда ҳам катта шодиёналар билан ўтказилди. “Янги йил саргузаштлари” мавзусида ўтказилган ушбу байрам тадбирида эртак қаҳрамонларининг чиқишлари, кичкинтой болажонлар томонидан ижро этилган куй-қўшиқлар ва рақслар барчага бирдек манзур бўлди.
Айниқса байрам тадбирида Миттивой, Қизил қалпоқча, Шум бола, Шумтака, бўри каби эртак қаҳрамонларининг чиқишлари, уларнинг ўғирланган Оппоғойни ёвуз ниятли Ялмоғиз ва қароқчилардан қутқариш йўлидаги саргузаштлари ишонарли тарзда жонлантириб берилган. Бундай кўринишлар болажонларда яхшилик сари интилиш ҳислатларини пайдо қилади албатта. Мўъжизага ишонган бола улғайгач, ўзи ҳам, албатта, хаёлот мевасини ҳаётга татбиқ этишга, эртак қаҳрамонлари сингари яхшиликни амалга ошириш учун курашишга, жасоратли бўлишга, ёвузлик устидан ғалаба қозонишга интилади.
Даврага Қорбобо ва Қорқизнинг кириб келиши, уларнинг барчани Янги йил байрами билан табриклаши ҳамда совғалар улашиши болажонлар қувончига қувонч қўшди.
Қорбобо ва Қорқиз болажонлар билан ўқишлари, синфдош дўстлари, янги ўқиган китоблари ҳақида суҳбатлашди. Топишмоқлар айтиб, болаларнинг зеҳнини, ақлини синовдан ўтказди ва ҳозиржавоблиги, билимдонлигидан хурсанд бўлди. Айниқса, мазмунли мақоллар айтиши Қорбобо ва Қорқизни жуда қувонтирди.
Шундан кейин байрамона безатилган арча атрофида болжонлар ижросидаги рақслар ва қўшиқлар яна қизғин давом этди. Байрам томошалари болажонларга бир олам завқ бағишлади. Улар ранг-баранг чироқлари товланиб турган мафтункор арча атрофида Қорбобо, Қорқиз ва турли эртак қаҳрамонлари билан бирга қўшиқ айтиб, рақсга тушди.
Мактабда ташкил этилган Янги йил байрами нафақат ўқувчиларда, балки, барча ўқитувчиларда ҳам зўр кайфият пайдо қилди. Чунки ҳар бир ўқитувчи, ҳар бир устоз ўз ўқувчисининг, ўз шогирдининг қувончли дамларини кўришдан, албатта чексиз хурсанд бўлади.
Мактаб жамоаси 2 “Б”-синф ўқитувчиси Дилфуза Сафарбоева ва 3 “Б”-синф ўқитувчиси Муборак Аҳмедоваларнинг янги йил байрами тадбирига тайёргарлик кўриш ва уни ўтказишдаги фаол ҳаракатлардан миннатдор бўлишди.
Алламберган ЖУМАНИЁЗОВ.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
