65-сонли мактабда “Тарихий хотирасиз келажак йўқ” мавзусида маънавий-маърифий тадбир ўтказилди

65-сонли умумтаълим мактабида “Тарихий хотирасиз келажак йўқ” мавзусида  маънавий-маърифий тадбир ўтказилди. Тадбирда нафақат ўқувчи-ёшлар, балки тадбир меҳмонлари бўлган мактаб ота-оналар қўмитаси аъзолари ҳамда мактаб педагогика жамоаси ҳам халқимизнинг теран тарихий илдизлари, юксак маънавияти, миллий-маданий қадриятлари буюк ва бетакрорлигидан яна бир бора фахрландилар.

Ижтимоий фанлар ойлиги доирасида ўтказилган мазкур тадбирни мактабнинг ижтимоий фанлар бўйича услуббирлашма раҳбари Омонгул Жумабоева очди ва мактабда ижтимоий фанлар ойлиги доирасида фан ўқитувчилари томонидан амалга оширилган ишлар, бири-бирини такрорламайдиган намунали очиқ дарслар, синфлараро беллашувлар ва уларнинг ижобий натижалари ҳақида батафсил тўхталиб ўтди.

Шундан сўнг, мактабнинг 5-синфидан 11-синфигача барча ўқувчилари иштирокида улуғ тарихий сиймолар яратган буюк кашфиётлар, Ўзбекистон заминида туғилиб, дунёнинг турли мамлакатларига бетакрор маънавият, илм-ирфон нурларини таратган, дунё  тамаддунига ўз илмий, бадиий асарлари, йирик кашфиётлари билан жуда катта ҳисса қўшган бобокалонларимиз ҳаёти ва ижодий фаолияти акс эттирилган кўргазма намойиш этилди.

Хусусан, ўқувчи-ёшлар буюк алломалар Ал-Хоразмий, Имом Бухорий, Ал-Беруний, Абу Али Ибн Сино, Амир Темур сиймоларини гавдалантирдилар. Хоразмийнинг математик кашфиётлари, Бухорий ҳадислари, Беруний томонидан кашф этилган жуғрофий аниқликлар,  Абу Али Ибн Синонинг дунё тиббиёти соҳасига қўшган улкан ҳиссаси, Амир Темур ҳазратлари томонидан бунёд этилган буюк давлатчилик тарихи хусусида сўз юритишиб, улуғ аждодларимизнинг бебаҳо тарихий, маданий ва илмий, маънавий меросига эҳтиром кўрсатдилар.

Тадбир давомида Қўқон адабий муҳити намоёндалари Увайсий, Нодира, Анбар отинларнинг бетакрор адабий мероси ҳақидаги ўқувчи-ёшларнинг маърузалари, кичик саҳна кўринишлари тадбир иштирокчиларида катта таассурот қолдирди. Ўқувчилар Увайсий ва Нодира, Анбар отин ғазалларидан ўқидилар. Бу нодир асарларнинг бугунги кунда ҳам ўз қадр-қимматини йўқотмаганини, тарбиявий аҳамиятини ўз чиқишлари орқали ифодалаб бердилар.

Тадбирнинг адабий-мусиқий қисмида 7-синф ўқувчи-қизлари “Ўзбекистон” қўшиғига рақсга тушдилар ва “Ўтрор фожеаси”ни акс эттирувчи саҳна кўринишини намойиш этиб, ўзбек халқининг Чингизхон қўшинларига қарши олиб борган тарихий курашини кўрсатиб бердилар.

Шунингдек, 6-синф ўқувчилари томонидан саҳналаштирилган “Аждодлар” рақси, 10-синф ўқувчилари томонидан тайёрланган Амир Темурнинг ёшлигини ифодаловчи кичик саҳна кўриниши тадбирга янада гўзал маънавий руҳ бағишлади.

“Тарихий хотирасиз келажак йўқ” деб номланган ижтимоий фанлар ойлиги доирасида ташкил этилган мазкур тадбир аждодлар хотирасига ҳурмат ва эҳтиром туйғуларини янада мустаҳкамлади.

Робия ЙЎЛДОШЕВА.