2-сонли мактабни 2001 йилда тамомлаган синфдошлар 20 йилдан кейин яна мактабда учрашдилар

Болалик дамларини қўмсаб, олис йиллар хотиралари оғушида яшашнинг гашти ўзгача. Буни болаликдаги дўстлари билан дийдорлашган инсонлар жуда яхши билишади. Беғуборлик, ростгўйлик, самимийликдан чароғон болалик дамлари ана шундай дийдорлашув лаҳзаларида эски қадрдонларни бир-бирларига янада яқинлаштирадилар. Ўртадаги меҳр-оқибат туйғулари қадрдон дўстлар дийдоридан баҳраманд дилларга янада самимийлик, жўшқинлик бағишлайди.

Туманимиздаги 2-сонли умумтаълим мактабини 2001 йилда битирган, 1984 йилда туғилган собиқ синфдошларнинг 20 йилдан кейинги “Дийдор ширин” деб номланган учрашув маросими ҳам нафақат собиқ синфдош дўстлар, балки уларнинг устозлари учун ҳам ҳақиқий байрамона кайфият бағишлади.

Худди ўқувчи дарсга ошиққани каби собиқ синфдош дўстлар эрта тонгданоқ қадрдон мактаб остонасига қадам қўйдилар. Болалик даврларидаги каби бундан 20 йил аввал таълим-тарбия олган, устозларининг мароқли дарс-машғулотларини тинглаб, таъсирланган синфхоналарига кириб, ўзлари учун азиз парталарга ўтириб, устозларини кутдилар. Собиқ синф раҳбарлари Янгибой Алламберганов ҳамда Собир Қодировлар синф журналини очиб, йўқлама қилишди. Собиқ ўқувчиларининг хотираларини синовдан ўтказиб, уларга саволлар беришди.

Шундан сўнг, “Дийдор ширин” тадбирининг маънавий-маърифий, адабий-мусиқий қисми бошланди.

Унда мактаб директори Анвар Алламберганов сўзга чиқиб, собиқ синфдошларни дийдорлашув кечаси муносабати билан самимий табриклади. Шу билан бирга собиқ синфдошларнинг ҳаётда эришган ва эришаётган ютуқлари ҳақида қувониб сўз юритди.

Ўз навбатида собиқ синфдош дўстлар ҳам бир-бирларига ўз ҳаётларидаги ўзгаришлар, эзгу ишлари ҳақида гапиришиб, эришаётган ютуқларида устозларининг ҳиссаси катталигини, уларнинг ўгит ва насиҳатлари улар учун ҳаётда ҳамиша муҳимлигини таъкидладилар.

Ўзлари таълим-тарбия олган, беғубор болалик хотираларига гувоҳ қадрдон мактаб, синфхоналарга бир-бир кириб, олис йиллардаги жўшқин ёшлик, ўсмирлик, болалик  дамларига қайтиб, устозлар суҳбатидан яна бир бора баҳраманд бўлдилар. Шундан сўнг, собиқ синфдош дўстлар ўзларига илк сабоқ бериб, оқ-қорани танитган биринчи устозлари, марҳума Роза Абуовани эслаб, унинг порлоқ хотираси учун Қуръон оятларидан тиловатлар қилдилар.

Бугунги кунда ҳаёт гаштини сураётган азиз устозлари Ҳанифа Ражабова, собиқ математика фани ўқитувчиси Гулмирза Аҳмедов ва бошқа азиз устозларига совғалар беришди. Файзли дастурхон ёзилиб, куй-қўшиқлар оғушида самимият ҳурмат-эҳтиром, эътибор қулф урган “Дийдор ширин” учрашуви давомида собиқ синфдошлар ўзлари учун ҳамиша қадрли ҳаёт ҳикматларини ўргатган азиз устозлари ҳамда ҳамиша муқаддас илм маскани – 2-сонли  мактаб маъмурияти учун мебель совға қилдилар.

Учрашув тадбири якунида собиқ устозлар ва собиқ синфдош дўстлар “Дийдор ширин” учрашув кечасини ташкил этган Ботир Исмоилов, Дилшод Матсипов, Шуҳрат Султонов, Шукурулло Матёқубов, Жавлонбек Юсупов, Жўрабек Собиров ҳамда Руслан Собировларга чин дилдан миннатдорчилик билдирдилар.

“Дийдор ширин” учрашув тадбири собиқ синфдошлар ўртасидаги дўстлик ва қадрдонлик пишталарини янада мустаҳкамлади.

Робия ЙЎЛДОШЕВА.