Диний қадриятларимиз топталган ҚОРА КУНЛАР
Ҳаммамиз яхши биламизки, муқаддас ислом динимиз асрлар давомида бутун дунё халқларини меҳр-оқибатли, хайр-саховатли, бўлишга ундаб келган. Айниқса, муқаддас динимизда инсон хотирасига алоҳида ҳурмат билан қаралади. Ваҳоланки, собиқ иттифоқ даврида ана шундай инсонпарвар, халқпарвар ва адолатпеша динимизни эскилик сарқити, хурофот деб баҳолаб, халқимизни имон-эътиқодидан маҳрум қилишга очиқдан-очиқ уринишлар бўлгани айни ҳақиқат. Собиқ тузум мафкураси маййитларни қабрга қўйишдан олдин жамоат олдида юзини очиб қўйиб, митинглар ўтказиб, тобут устида диний маърифатга зид маърузалар (жаноза эмас!) ўқиб, маййитларнинг руҳларини чирқиратиб, дафн маросимлари ўтказишга миллатимизни мажбурлашгача бориб етдилар. Ана шундай русча митинглар, дафн маросимлари Манғит шаҳрининг "Беш гужум” даҳасида, туманимизнинг кўпчилик овулларида ҳам ўтказилганини кўпчилик билади. Бундан ташқари, масжидларга тегишли мулклар мусодара этилиб, сотувга чиқариб юборилди, ўтган асрнинг 20-30 йилларида "Курашчан худосизлар иттифоқи" деган уюшма, Тошкент шаҳрида динга қарши тарғибот музейлари фаолият олиб борарди.
Бу нимани билдиради?
Албатта, бу - биринчидан, диний-ахлоқий, маънавий-маърифий қадриятларимиз, урф-одатларимизни камситиш бўлса, иккинчидан, миллатни эркидан, имон-эътиқодидан маҳрум манқуртларга айлантиришга ошкора уриниш эди.
Диний байрамлар – қурбон ҳайити ва рамазон ҳайитлари азал-азалдан халқимизни меҳр-мурувват, ўзаро оқибат, имон-эътиқод, хайр-саховат тамойилларига садоқат туйғулари ила бирлаштириб келган муборак саналарки, айнан ана шу байрам кунларида инсонлар гина-кудуратларни унутиб, бир-бирларига яхши, самимий тилаклар тилаган ҳолда маънан бирлашадилар. Динимизнинг камситилиши – халқимизнинг ана шу асрлар оша шаклланган маънавий бирлик камолотига қарши қаратилган хуруж бўлди.
Минг шукурки, 23 йилдан бери ҳур ва озодмиз. Виждон ва эътиқод эркинлиги, диний қадриятларга ҳурмат ва садоқат тамойиллари Конституциямиз орқали мустаҳкам кафолатланган. Атрофимиздаги гўзалликка, эркинликка, ўзгаришларга, халқимизнинг аҳиллиги ва биродарлигига, ҳаётимиздаги тўкин-сочинликка шукроналар айтаман. Илоҳим, барчаларимизни Яратганнинг ўзи қўллаб, рушду ҳидоятга бошласин, кўнгилларимизни имон нури билан мунаввар айласин.
Абдураҳмон Абдукаримов,
"Қаршили хўжа” жомъе масжиди имом-хатиби.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
