ЖУМУРТОВ ШАҲАРЧА ВА НАМУНА МАҲАЛЛА ФУҚАРОЛАР ЙИҒИНЛАРИНИНГ ЯНГИ ҚУРИЛГАН ХИЗМАТ БИНОЛАРИ ФОЙДАЛАНИШГА ТОПШИРИЛДИ
Юртимизда маҳалла тизимига берилаётган катта эътибор ҳамда соҳа ходимларига қулай шарт-шароитлар яратиб бериш борасида кенг кўламли ислоҳотлар амалга оширилмоқда. Сўнгги даврларда энг чекка ҳудудларда ҳам қатор фуқаролар йиғинларида хизмат бинолари янгидан қурилиб, замонавий кўринишга келтирилиб, фойдаланишга топширилмоқда.
Амударё туманида ҳам бу борада алоҳида эътибор қаратилиб, овул ва маҳалла фуқаролар йиғинларининг маъмурий бинолари қайтадан таъмирланиб, ходимларга қулай шароитларда хизмат қилишларига имконият яратилмоқда. Қатор овул ва маҳаллаларнинг хизмат бинолари янги қиёфа касб этиб, ҳудуд кўркига кўрк қўшилмоқда, ишдаги самарадорлик ҳам ортмоқда.
1 декабрь куни Жумуртов шаҳарчасида фуқаролар йиғини янги хизмат биносининг очилиш маросими бўлиб ўтди. Тантанали маросимда туман Маҳалла ва оилани қўллаб-қувватлаш бўлими бошлиғи Алишер Йўлдошев, ўринбосари Баҳодир Болтабоев ҳамда туман ҳокимлиги мутасаддилари, фуқаролар йиғинлари ходимлари ва фаоллари иштирок этдилар.
Жумуртов шаҳарча фуқаролар йиғини бугунги кунга қадар ўз биносига эга эмас эди. Шу сабабли “Обод қишлоқ” дастури доирасида шаҳарча фуқаролар йиғинига замонавий лойиҳа асосида янги бино қурилди. Ушбу лойиҳани амалга ошириш учун маҳаллий бюджет маблағларидан жами 340,1 млн. сўм маблағ ажратилди.
Очилиш маросимида сўзга чиққанлар аввало барча иштирокчиларни қорақалпоқ тилига давлат тили мақоми берилган кун билан самимий табрикладилар. Шундан сўнг, давлатимиз раҳбари томонидан маҳалла тизимига берилаётган юксак эътибор натижасида сўнгги йилларда фуқаролар йиғинлари учун қулай шарт-шароитлар яратиб берилаётганлигини алоҳида қайд этиб ўтишди. Шунингдек, тадбирда иштирок этган шаҳарча нуронийлари ва фаоллари ҳам ушбу масканнинг ҳудуд аҳолиси учун жуда муҳим эканлигини, бу орқали одамларга қатор қулайликлар яратилганлигини таъкидлашди.
Тадбир давомида иштирокчилар бу ерда фуқаролар йиғини ходимларига яратилган шарт-шароитлар билан яқиндан танишдилар.
Шу куни тумандаги Намуна маҳалла фуқаролар йиғинида ҳам янгидан қуриб битказилган хизмат биноси фойдаланишга топширилди. Шу муносабат бюилан ўтказилган очилиш маросимида ҳам туман Маҳалла ва оилани қўллаб-қувватлаш бўлими бошлиғи Алишер Йўлдошев, ўринбосари Баҳодир Болтабоев ҳамда туман ҳокимлиги мутасаддилари, фуқаролар йиғинлари ходимлари ва фаоллари иштирок этдилар.
Маросимда сўзга чиққанлар “Обод қишлоқ” дастури доирасида Намуна маҳалла фуқаролар йиғини биноси мукаммал таъмирлангани, бунга жами 283,8 млн. сўм маблағ ажратилгани хусусида маълумот беришди. Намуна маҳалла фуқаролар йиғинига Қорақалпоғистон Республикаси Маҳалла ва оилани қўллаб-қувватлаш вазирлиги томонидан 3 комплект янгидан мебел жамланмаси берилганини мамнуният билан эътироф этишди. Шунингдек, мазкур маҳалла биноси аҳолига узоқ йиллар хизмат қилиб, фуқароларнинг ўзларини қизиқтирган барча масалаларда мурожаат қиладиган манзилга айланишини таъкидлаб ўтишди.
Мазкур ҳудудларда янги ва замонавий кўринишдаги фуқаролар йиғини бинолари қурилгани, қорақалпоқ тили байрами куни фойдаланишга топширилгани у ерда истиқомат қилаётган аҳолини ниҳоятда мамнун қилди.
О.Худойберганова
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
