1 декабрь – қорақалпоқ тилига давлат тили мақоми берилган кун муносабати тадбир ўтказилди

1 декабрь – қорақалпоқ тилига давлат тили мақоми берилган кун сифатида халқимиз томонидан кенг нишонланади. Умумтаълим мактабларида, жамоат ташкилотларида ҳам қорақалпоқ тили байрамига бағишланган адабий учрашувлар, маънавий-маърифий тадбирлар ўтказилади.

27 ноябрь куни Амударё тумани халқ таълими бўлимига қарашли 28-сонли мактабда қорақалпоқ тилига давлат тили мақоми берилган кун муносабати билан “Til ǵaziyneler qorǵanı” мавзусида маънавий-маърифий тадбир бўлиб ўтди. Тадбирни мактабнинг қорақалпоқ тили фани ўқитувчиси Дилбар Жуманазарова олиб борди ва мактабнинг маънавий-маърифий, тарбиявий ишлар бўйича директор ўринбосари Ҳамдам Жуматов очиб, қорақалпоқ тили Қорақалпоғистон Республикаси ҳудудида ўзбек тили билан бир хил мақомда амал қилиниши, барча турдаги расмий ҳужжатлар ўзбек ва қорақалпоқ тилларида юритилиши ҳақида тўхталиб ўтди.

Шундан сўнг, 11-синф ўқувчилари томонидан тайёрланган  “Тил - миллет негизи” мавзусидаги маъруза ўқилди.

6“А”-синф ўқувчилари қорақалпоқ шоирларининг тил, Ватан ҳақидаги шеърларидан парчалар айтдилар. 8 “А”-синфнинг қизлар жамоаси “Қорақалпоқ” қўшиғига гуруҳ бўлиб рақсга тушдилар. 11-синф қизлари “Дўстлик” мавзусида саҳна кўринишлари тайёрлаб, ўз иқтидорларини намоён этдилар. 11-синф қизлари эса “Қорақалпоғим” қўшиғига рақсга тушишиб, қорақалпоқ халқининг жозибали рақсларини маҳорат билан намойиш этдилар.

Тадбирда мактаб ўқувчилари ҳамжиҳатлик билан фаол қатнашдилар. Ҳар бир иштирокчи ўзининг қорақалпоқ тили ва маданиятига ҳурмат-эҳтироми чексизлиги ҳақида фахрланиб сўзладилар.

Тадбир давомида ўқувчилар Ажинияз, Кунхўжа, Абай Қунанбай ули ижоди ва фаолияти ҳақида маърузалар ўқидилар. Бердақ ҳамда Ажинияз боболарининг шеърларини ёддан айтиб беришди. Шу билан бирга,  уларнинг бугунги кунда ҳам таниқли ўзбек, қорақалпоқ, ҳатто қозоқ ва туркман халқлари томонидан севиб куйланаётган, халқимиз қалбидан муносиб жой олган қўшиқларининг мазмун-моҳияти хусусида фикр юритишди. Ҳикматлар хазинасига айланган Ажинияз, Кунхўжа, Бердақ ва Абай Қунанбай ўғли, ХХ аср охири ва ҳозирги замон қорақалпоқ адабиётининг йирик намоёндалари Ўзбекистон Қаҳрамонлари Тўлепберген Қайипбергенов, Ибройим Юсупов, Ўзбекистон халқ ёзувчиси Кенесбой Каримов, Қорақалпоғистон халқ шоираси Набийре Тўрешоваларнинг ижодларидан намуналар ўқидилар.

Тадбир давомида ўқувчилар қорақалпоқ тилининг сўз бойлигини ифода этувчи қорақалпоқ халқ мақоллари ва уларнинг мазмун-моҳияти ҳақидаги фикрларини билдирдилар.

Бўлиб ўтган тадбир ўз мазмун-моҳияти билан ўқувчи-ёшлар қалбида миллатлараро тотувлик, дўстлик ва бағрикенглик туйғуларини янада мустаҳкамлаш, уларни қардош халқлар тили, маданияти ва маънавиятига ҳурмат-эҳтиром руҳида тарбиялашга қаратилгани билан муҳим аҳамият касб этди.

Робия ЙЎЛДОШЕВА.